އިހަވަންދޫ މީހެއް ވިހެއުމުގެ އޮޕަރޭޝަނަށްފަހު ނިޔާވެއްޖެ

ވިހެއުމުގެ އޮޕަރޭޝަނަކަށްފަހު ހއ. އިހަވަންދޫ އަންހެނެއް ކުޅުދުއްފުށީ ރީޖަނަލް ހޮސްޕިޓަލްގައި ނިޔާވެއްޖެ އެވެ.

މިއަދު ރޭމެންދަމު ކުޅުދުއްފުށީ ރީޖަނަލް ހޮސްޕިޓަލްގައި ކުރި އޮޕަރޭޝަނަށް ފަހު ނިޔާވެފައި ވަނީ ހއ. އިހަވަންދޫ އަލިނޫރު، ހަލީމަތު ނާސިރާ، 42 އެވެ.

ހަލީމަތުގެ އާއިލާއިން މައުލޫމާތު ދިންގޮތުގައި އޭނާ މަރުވެފައިވަނީ ވިހެއުމަށްފަހު ލޭމަނާނުވެގެންނެވެ. ނަމަވެސް އޭނާ ވިހޭ ފިރިހެން ދަރިފުޅު ހާލު ރަނގަޅެވެ.

އާއިލާއިން މައުލޫމާތު ދިން ގޮތުގައި މިދިޔަ ހޮނިހިރު ދުވަހު ކުޅުދުއްފުއްޓަށް އައި ހަލީމަތު ވިހެއުމުގެ އޮފަރޭޝަން ކުރުމަށް ވައްދާފައިވަނީ ރޭ މެންދަމު 1:30 ގައެވެ. އަދި ހެނދުނު 8 ޖަހާކަށްހާއިރު އޭނާ އައި.ސީ.ޔޫ އަށް ބަދަލުކުރެވުނެވެ. އަދި ހަލީމަތު ނިޔާވެފައިވަނީ އޭގެ ބައިގަޑިއެއްހާއިރު ފަހުންނެވެ.

މިކަމާ ގުޅިގެން ހޮސްޕިޓަލުގެ ބަހެއް ވަނީ ލިބޭގޮތް ނުވެފައެވެ.