ޖަލާލުއްދީން ސްކޫލުގެ އޭ ލެވެލް ކުލާސްތަކަށް ވަނުމުގެ ފުރުސަތު ހުޅުވާލައިފި

މި އަހަރުގެ ޖޫން މަހު ފަށާ އޭ ލެވެލް ކުލާސްތަކަށް ވަނުމުގެ ފުރުސަތު ޖަލާލުއްދީން ސްކޫލުން ހުޅުވާލައިފި އެވެ.

ޖަލާލުއްދީން ސްކޫލުން އާންމު ކޮށްފައިވާ އިއުލާނެއްގައި ބުނެފައިވަނީ މި އަހަރު އޭ ލެވެލްގައި ކިޔަވައިދެނީ އެޑެކްސެލް އިންޓަރނޭޝަނަލް އޭ ލެވެލްގެ މުޤައްރަރަށް ކަމަށާއި އެ މުޤައްރަރުގެ އިތުރުން ކޭމްބްރިޖް އޯލެވެލް، އީސޯލް އަދި އެޗް.އެސް.ސީ ހިމެނޭ ކަމަށެވެ.

އޭ ލެވެލް ކުލާސްތަކަށް ވަންނަން އެދޭ ފޯމް ޖަލާލުއްދީން ސްކޫލްއިން އަންނަ އޭޕްރީލް މަހުގެ 17 ގެ ނިޔަލަށް ލިބެން ހުންނާނެ ކަމަށް އެ ސްކޫލުން މައުލޫމާތު ދެއެވެ.

60 ޖާގަ ހުޅުވާލެވިފައިވާ އޭލެވެލް ކުލާސްތަކަށް 2 ކްރައިޓީރިއާއިން ކުދިން ނެގުމަށް ހަމަޖެހިފައި ވެއެވެ. އެގޮތުން ފުރަތަމަ ކްރައިޓީރިއާއަކީ މަޖުބޫރު 4 މާއްދާތަކުގެ ގޮތުގައި ހިމެނޭ ދިވެހި، އިސްލާމް، އިނގިރޭސި އަދި ހިސާބުގެ ތެރެއިން 3 މާއްދާއިން ފާސްވެ، މި މާއްދާތަކާއެކު ޖުމްލަ 7 މާއްދާއިން ފާސްވެފައިވުމެވެ.

ދެވަނަ ކްރައިޓީރިއާގައި ހިމެނެނީ ދިވެހި، އިސްލާމްއިން ފާސްވުމާއެކު އިނގިރޭސި ނުވަތަ ހިސާބުން ފާސްވުމެވެ.

މި މާއްދާތަކުގެ އިތުރުން ސައިންސް ސްޓްރީމް ކިޔަވާފައި ހުރި ދަރިވަރުން ހިސާބު، ފިޒިކްސް، ކެމިސްޓްރީ އަދި ބައޮލޮޖީގެ ތެރެއިން 2 މާއްދާއިން ފާސްވާން ޖެހެ އެވެ. އަދި ބިޒްނަސް ސްޓްރީމް ކިޔަވާފައިވާ ދަރިވަރުން ހިސާބު، އެކައުންޓްސް، ބިޒްނަސް ސްޓަޑީޒް އަދި އެކޮނޮމިކްސްގެ ތެރެއިން 2 މާއްދާއިން ފާސްވެފައިވާން ޖެހެ އެވެ.

މެއި 17 ގައި އަލަށް ފަށާ ގްރޭޑް 11 ގެ ކުލާސްތަކާ ބެހޭ އިތުރު މައުލޫމާތު ސްކޫލު އޮފީހުން ލިބެން ހުންނާނެ ކަމަށް އެ ސްކޫލުން މައުލޫމާތު ދެ އެވެ.

ޖަލާލުއްދީން ސްކޫލުގައި ގްރޭޑް 11 ގައި 61 ދަރިވަރުން ތައުލީމު ހާސިލު ކުރަމުން އަންނައިރު ގްރޭޑް 12 ގައި 49 ދަރިވަރުން ޖަލާލުއްދީން ސްކޫލުގައި ތައުލީމު ހާސިލުކުރަމުންދެ އެވެ.