މެމްބަރު ނަޝީދު ކުޅުދުއްފުށީގެ ސްކޫލުތަކަށް މިލިއަނަކަށް ވުރެ ގިނަ ފައިސާ ހަދިޔާ ކޮށްފި

ރައްޔިތުން މަޖިލީހުގެ ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދު ކުޅުދުއްފުށީގެ ސްކޫލުތަކަށް މިލިއަނަކަށް ވުރެ ގިނަ ފައިސާ ހަދިޔާ ކޮށްފި އެވެ.

އެގޮތުން މެމްބަރު ނަޝީދު ވަނީ ޖުމްލަ 1152985ރ. އަށްވުރެ ގިނަ ފައިސާ ކުޅުދުއްފުށީގެ ސްކޫލުތަކަށް ހަދިޔާ ކޮށްފައި އެވެ. މިކަމާ ގުޅިގެން މެމްބަރު ނަޝީދުގެ ކެމްޕެއިންގެ އިސްކޮށް އުޅުއްވާ ފަރާތެއް ކަމަށްވާ ކުޅުދުއްފުށީ ސަމުގާ، މުހައްމަދު ޤާސިމް ވިދާޅުވީ ނަޝީދު ކުޅުދުއްފުށީގެ ސްކޫލުތަކަށް ހަދިޔާ ކުރެއްވި ފައިސާގެ ތަފްސީލް މީޑިއާތަކަށް ދޭން އަދި ބޭނުން ނުވާ ކަމަށެވެ.

މުއުތަބަރު ފަރާތަކުން މި ނޫހަށް މައުލޫމަތު ދެމުން ބުނީ މެމްބަރު ނަޝީދު ކުޅުދުއްފުށީގެ ސްކޫލުތަކަށް ފައިސާ ދީފައި ވަނީ ސްކޫލުގައި ކިޔަވާ ކޮންމެ ދަރިވަރެއްގެ ބޮލަކަށްވާ ވަކި އަދަދެއްގެ ނިސްބަތުން ކަމަށެވެ.

އެގޮތުން އެންމެ ގިނަ ފައިސާ ލިބިފައިވަނީ އެންމެ ގިނަ ދަރިވަރުން ތައުލީމު ހާސިލު ކުރަމުން އަންނަ ހދ އަތޮޅު ތައުލީމީ މަރުކަޒަށެވެ. އެސްކޫލަށް ވަނީ 296،655ރ. ދީފަ އެވެ. އަފީފުއްދީން ސްކޫލަށް 224،700ރ. އަށް ވުރެ ގިނަ ރުފިޔާ ލިބިފައިވާ އިރު ޖަލާލުއްދީން ސްކޫލަށް ލިބިފައިވަނީ 211،404.96ރ. އެވެ.

ޕްރައިމަރީއަކާ ނުލާ ޕީޕީއެމް އިން ޓިކެޓް ދީފައިވާ މިހާރުގެ ވެސް ކުޅުދުއްފުށީ ދެކުނު ދާއިރާ ތަމްސީލު ކުރައްވާ މުހައްމަދު ނަޝީދު ވަނީ ކުޅުދުއްފުށީ ޕްރީ ސްކޫލު ތައުލީމް ފޯރު ކޮށްދޭ ދެ ސްކޫލަށް ވެސް ފައިސާގެ އެހީ ވެދެއްވާފަ އެވެ. އެގޮތުން އަމީރު އަމީން ސްކޫލަށް 20213.127ރ. ދީފައިވާ އިރު އިރުމަތި އަވަށު ޕްރީ ސްކޫލަށް މެމްބަރު ނަޝީދު ވަނީ 207099.36ރ. ދެއްވާފަ އެވެ.

17 ވަނަ ރައްޔިތުންގެ މަޖީހަށް ކުރިމަތިލެއްވިއިރު މެމްބަރު ނަޝީދު ވަނީ ކުޅުދުއްފުށީގެ ރައްޔިތުންނަން މައިގަނޑު 2 ވައުދެއް ވެވަޑައިގެންފަ އެވެ. އޭގެ ތެރޭގައި ހިމެނެމީ މުސާރައިގެ 20 އިންސަތަށް ދާއިރާގެ ތަރައްޤީ އަށް ހަދިޔާ ކުރެއްވުމާއި ކޮންމެ 3 މަހުން އެއް މަހު ދާއިރާގެ ރައްޔިތުންނާ ބައްދަލު ކުރެއްވުމަށެވެ. ވެ.

މެމްބަރު ނަޝީދު މީގެ ކުރިން ވެސް ވަނީ ކުޅުދުއްފުށީގެ ސްކޫލުތަކަށާއި އަދި އީދު ކުޅިވަރުތަކަށް އަދި މިނޫންވެސް އެކި ކަންތައްތަކަށް ފައިސާ އާއި މިނޫންވެސް ތަފާތު އެހީތައް ވެދެއްވާފަ އެވެ.