ސެލްފް ޑިފެންސްގެ އިތުރު ކޯހެއް ކުޅުދުއްފުށީގައި ފަށަނީ

މާޝިއަލް އާރޓްސް އެސޯސިއޭޝަން އޮފް މޯލްޑިވްސްގެ ފަރާތުން ކުރިއަށް ގެންދާ ސެލްފް ޑިފެންސް ކޯހުގެ އިތުރު ބުރެއް މި މަހުގެ 17 ގައި ކުޅުދުއްފުށީގައި ފައްޓާނެ ކަމަށް އެފަރާތުން މައުލޫމާތު ދެއްވާފި އެވެ.

ފަނަރަ ދުވަހުގެ މުއްދަތަށް ހިންގާ މި ކޯހަކީ ނަފްސު ދިފާއު ކުރުމާއި ޑިސިޕްލިން އަދި ރުޅި ކޮންޓްރޯލް ކުރުމާއި ނަފްސު ކޮންޓްޜޯލް ކުރުން އެކުލެވިގެން ހިންގާ ކޯހެއް ކަމަށް ކޯހުގެ ކޯޑިނޭޓަރު ވިދާޅުވި އެވެ.

އެގޮތުން ވަޅި އަދި ދަނޑިބުރިފަދަ ތަކެތިން ދޭ ހަމަލާ އަކުން ދިފާޢުވާނެގޮތް މިކޯހުގައި ދަސްކޮށްދެވެ އެވެ.

ކޯހުގެ ޗީފް އިންސްޓްރަކްޓަރު މުޙައްމަދު ފައިސަލް ވިދާޅުވީ އެ ބޭފުޅުންގެ އަމާޒަކީ ކުޅުދުއްފުށީގައި މާޝިއަލް އާރޓްސް އިންޓަރނޭޝަނަލް ލެވެލްއެއްގައި ސްޓެބިލައިޒްކުރުން ކަމަށެވެ.

މިހާރު ކުޅުދުއްފުށީގައި މިކްސް މާޝިއަލް އާރޓްސް ކުލަބެއް ފެޑެރޭޝަންއެއްގެ ގޮތުގައި ރަޖިސްޓްރީ ކުރުމުގެ މަސައްކަތް ކުރިއަށްދާ ކަމަށްވެސް މުޙައްމަދު ފައިސަލް ވިދާޅުވި އެވެ.

މި މަހު ފަށާ ކޯހުގައި ކުދިން ބައިވެރިވާ މިންވަރަކުން ފުރުސަތު ހުޅުވާލެވިފައިވާކަމަށް މާޝިއަލް އާރޓްސް އެސޯސިއޭޝަނުން މަޢުލޫމާތު ދެއްވައެވެ. އިންޓަރނޭޝަނަލް ލެވެލްގެ މިކޯހުގައި އަންހެން ކުދިން ބައިވެރިވުމުގެ ފުރުސަތު ހުޅުވާލެވިފައިވާއިރު 10 ކުދިންގެ ގުރޫޕަކަށް ވަކިން ކުލާސްތަކެއް ހިންގުމަށްވަނީ ހަމަޖެހިފަ އެވެ.

މާޝިއަލް އާރޓްސް އެސޯސިއޭޝަން އޮފް މޯލްޑިވްސްގެ ފަރާތުން މިދިޔަ މަހު ބޭއްވި ކޯހުގައި 23 ދަރިވަރުން ސެޓްފިކެޓް ހާސިލްކޮށްފައި ވެއެވެ.