ތަފާތު ފަސް މައްސަލައެއްގައި ކުޅުދުއްފުށީ މީހެއްގެ މައްޗަށް 15 އަހަރު ދުވަހުގެ ޖަލު ހުކުމެއް

ވައްކަމާއި މާރާމާރީ އާއި އަމުރަށް ނުކިޔަމަންތެރިވުމުގެ ކުށް ސާބިތުވުމާ ގުޅިގެން ކުޅުދުއްފުށީ މީހަކު 15 އަހަރަށް ޖަލަށް ލުމަށް ހުކުމް ކޮށްފި އެވެ.

މި މައްސަލަތަށް ސާބިތުވުމާ ގުޅިގެން ކުޅުދުއްފުށީ މެޖިސްޓްރޭޓް ކޯޓުން ހުކުމް ކޮށްފައިވަނީ، ކުޅުދުއްފުށި ދިލާސާގެ ޢަބްދުﷲ ޢަލީ، 24،ގެ މައްޗަށެވެ.

މިގޮތުން 17 އޭޕްރީލް 2012 ގައި ބިދޭސީއަކު ދިރިއުޅެމުންދާ ގެއަކުން ނޮކިޔާ ބްރޭންޑްގެ ފޯނެއް ވަގަށް ނަގާފައިވާ ކަމަށާއި ހަމަ އެ މަހު 30 ވަނަ ދުވަހު ކުޅުދުއްފުށީ ގެއެއްގެ ސިޓިންގްރޫމްގައި އޮތް ސެމްސަންގް ބްރޭންޑްގެ ފޯނެއް ވަގަށް ނެގިކަމަށް ޝަރީއަތަށް ސާބިތުވެފައި ވެއެވެ. މީގެ އިތުރުން އޭނާ ވަނީ މިދިޔަ އަހަރުގެ އޭޕްރީލް 8 ވަނަ ދުވަހު ކުޅުދުއްފުށީ ގެއަކުން ޗައިނީސް ޕީއީއެލް ބްރޭންޑުގެ ފޯނެއް ވަގަށް ނަގައި ކުޅުދުއްފުށީ މީހަކަށް ވިއްކާފައިވާ ކަމަށް ޝަރީއަތުގެ މަޖިލީހުގައި އިއުތިރާފުވެފައެވެ.

ވައްކަމުގެ މައްސަލައިގެ އިތުރުން ދެން އޭނާގެ މައްޗަށް ހުކުމެއް އައިސްފައިވަނީ، އޭނާގެ އެއްބަނޑު އެއްބަފާ ދައްތައާ މާރާމާރީ ހިންގައި ދައްތަގެ ބޮލުގައި ކޮޅުފައިން ޖެހި މައްސަލައިގައި ޤާނޫނުލްޢުޤޫބާތުގެ 126 ވަނަ މާއްދާގެ ދަށުން ހަ މަސް ދުވަހަށް ޖަލަށް ލުމަށެވެ.

އަމުރަށް ނުކިޔަމަންތެރިވުމުގެ ކުށުގެ މައްސަލައަކީ، ޖޫން 23 ވަނަ ދުވަހުގެ 00:30 ހާއިރު ހދ.ކުޅުދުއްފުށީ ގެއަކަށް އެގޭގެ ވެރިންގެ ހުއްދަނެތި ވަދެފައިވާތީ އޭނާއާ ދެކޮޅަށް ކޮށްފައިވާ ދައުވާއެކެވެ. އެ ދައުވާވެސް އޭނާގެ މައްޗަށް ސާބިތުވުމާ ގުޅިގެން ޢަމުރަށް ނުކިޔަމަންތެރިވުމުގެ ކުށުގެ ޢުޤޫބާތެއްގެ ގޮތުން ހަމަސް ދުވަހުގެ މުއްދަތަށް ޖަލަށްލުމަށް ރަށު ކޯޓުން ވަނީ ހުކުމް ކުރެވިފަ އެވެ.