އެންމެ އުތުރުގެ ތިން އަތޮޅުގެ ފެރީގެ ހިދުމަތް ދިނުމަށް ބަޔަކާ ހަވާލުކޮށްފި

އެންމެ އުތުރުގެ ތިން އަތޮޅު ކަމަށްވާ ހއ.ހދ އަދި ށ އަތޮޅުގެ ފެރީގެ ހިދުމަތް ދިނުން ސަރުކާރުން އެއާޕޯޓް ފެރީ އޮޕަރޭޓާސް އެސޯސިއޭޝަނާ މިއަދު ހަވާލު ކޮށްފި އެވެ.

ފެރީގެ ހިދުމަތް ދިނުމަށް މިއަދު ސޮއިކުރި އެއްބަސްވުމާ ބެހޭގޮތުން ޓްރާންސްޕޯޓުގެ ސްޓޭޓް މިނިސްޓަރ އަނީސް ވިދާޅުވީ މިހާރު ފެރީގެ ހިދުމަތްދޭ ފެންވަރަށް ވުރެ ރަނގަޅު ފެންވަރެއްގައި ސަރުކާރުން އެ ހިދުމަތް ދޭން ބޭނުންވާ ކަމަށާއި އެގޮތުން މިއަދު ފެށުމަށް ހަމަޖެހުނު ހިދުމަތަކީ ވަގުތީ ހިދުމަތެއް ކަމަށެވެ. އަދި ކުރިއަށް އޮތް އެއް އަހަރު ދުވަހަށް މި ހިދުމަތް ލިބިގެންދާނެ ކަމަށެވެ.

އަނީސް ވިދާޅުވީ އެ ހިދުމަތް އެ ތިން އަތޮޅަށް ދިނުމަށް ސަރުކާރުން މަހަކު ގާތްގަނޑަކަށް 300000ރ. ކޮންމެ އަތޮޅަކަށް ވެސް ހަރަދުކުރާނެ ކަމަށާއި އޭގެ އިތުރުން އެ ހިދުމަތުން ލިބޭ ހުރިހާ ފައިސާއެއް ވެސް ލިބިގެންދާނީ އެ ހިދުމަތްދޭ އެސޯސިއޭޝަނަށް ކަމަށެވެ.

އެސޯސިއޭޝަންގެ ސެކްރެޓަރީ ޖެނެރަލް އުމަރު މުހައްމަދު ވިދާޅުވީ އެހިދުމަތް ދިނުމަށް ހަމަޖެހިފައި އަދި ވަނީ 8 ފެރީ ބޭނުން ކޮށްގެން ކަމަށާއި ދެއަހަރު ނުވާ ކުދިންނާއި 65 އަހަރުން މަތީގެ މީހުންނާއި ހާއްސަ އެހީ އަށް ބޭނުންވާ މީހުންނަން ހިލޭ އެ ފެރީތަކުން ދަތުރު ކުރެވޭނެ ކަމަށެވެ.

އެސޯސިއޭޝަންގެ ސެކްރެޓަރީ ޖެނެރަލް އުމަރު މުހައްމަދު ވިދާޅުވީ ކުރިއަށް އޮތް ހަފުތާއެއްގެ ތެރޭގައި އާއްމުންނަށް އެ ހިދުމަތް ދޭން ފަށާ އިރު އެ ހިދުމަތުގައި ބޭނުން ކުރާނީ މިހާރު ވެސް މާލެ އާއި ހުޅުލެ އާއި ދޭތެރޭގައި ބޭނުންކުރާ ފެންވަރުގެ ފެރީތައް ކަމަށެވެ. އެނާ ވިދާޅުވީ އަތޮޅު ތެރޭގައި ދަތުރަކަށް 20 ރުފިޔާ ނަގާއިރު އަތޮޅުން ބޭރަށް ކުރާ ދަތުރު ތަކަށް 35 ރުފިޔާ ނަގާނެ ކަމަށެވެ. އެހިދުމަތް ދިނުމަށް ހަމަޖެހިފައިވަނީ ހަފްތާ އަކު 3 ދުވަހު ކަމަށް އުމަރު ވިދާޅުވި އެވެ.

ޓްރާސްޕޯޓް މިނިސްޓްރީގައި އޮތް ރަސްމިއްޔާތެއްގައި އެ އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު މުހައްމަދު އަނީސެވެ. އަދި ފެރީ އޮޕަރޭޓާސް އެސޯސިއޭޝަންގެ ފަރާތުން ސޮއިކުރެއްވީ އެ އެސޯސިއޭޝަންގެ ނައިބު ރައީސް ހުސެއިން ލުގްމާނެވެ.