އޮލިމްޕިކް ކޮމެޓީގެ ސްކޮލަޝިޕެއް ކުޅުދުއްފުށީގެ ދުވުންތެރިއަކަށް ލިބިއްޖެ

މޯލްޑިވްސް އޮލިމްޕިކް ކޮމެޓީން ދޭ ތަމްރީނު ސްކޮލަޝިޕް ކުޅުދުއްފުށީގެ އެތްލީޓެއް ކަމަށްވާ ހުސައިން ރިޒާއަށް ލިބިއްޖެ އެވެ.

ހުސައިން ރިޒާގެ އިތުރުން އެ ސްކޮލަޝިޕް ވަނީ ރާއްޖޭގެ 30 އެތުލީޓަކަށް ލިބިފަ އެވެ.

ހުސައިން ރިޒާ ވަނީ މިދިޔަ އަހަރު އިންޑިޔާގެ ރަންޗީގައި ބޭއްވި ދެކުނު އޭޝިއާގެ ދެވަނަ ޖޫނިއާ އެތުލެޓިކްސް ޗެމްޕިއަންޝިޕްގައި ރާއްޖޭން ބައިވެރިވި ފަސް އެތުލީޓުންގެ ތެރޭގައި ވެސް ހިމެނިފަ އެވެ.

އޮލިމްޕިކް ކޮމެޓީން ކުރިއަށްގެންދާ އެލީޓް އެންޑް ޔަންގް އެތްލީޓް ޓްރެއިނިން ޕްރޮގްރާމުގެ ދަށުން ސްކޮލަޝިޕް ލިބުނު އެތުލީޓުންނަށް އެކަމުގެ ލިޔުން ހަވާލުކޮށްދެއްވީ، އާޓް ގެލެރީގައި ރޭ ބޭއްވި ހާއްސަ ރަސްމިއްޔާތެއްގައި ކުޅިވަރާ ބެހޭ ވަޒީރު މުހައްމަދު މަލީހު ޖަމާލެވެ.

މި ސްކޮލަޝިޕްތަކަކީ، އޮލިމްޕިކް ކޮމިޓީން ބަޖެޓް ދީގެން، ވަކިވަކި ކުޅިވަރު އެސޯސިއޭޝަންތަކަށް އެ އެސޯސިއޭޝަނަކުން އިހުތިޔާރުކުރާ އެތްލީޓުންނަށް ބޭނުންވާ ގައުމެއްގައި ތަމްރީން ހަދަން ދިން ސްކޮލަޝިޕްތަކެކެވެ.

މީގެ ތެރެއިން އަދި 10 އެތުލީޓުން ހޮވައި އެ ފަރާތްތަކަށް އޮލިމްޕިކް ސްކޮލަޝިޕް ދޭ ގޮތަށް އޮލިމްޕިކް ކޮމިޓީން ވަނީ ނިންމައިފަ އެވެ.

ސްކޮލަޝިޕް ލިބުނު ބައެއް އެތުލީޓުން މިހާރު ވެސް ތަމްރީން ހަދަމުން އަންނައިރު އެހެން އެތުލީޓުން ކުރިއަށް އޮތް ދުވަސްތަކުގައި ފުރާނެ ކަމަށް އެފަރާތުން މައުލޫމާތު ދެއެވެ.

ހުސައިން ރިޒާ އަކީ ކުޅުދުއްފުށީ ޖަލާލުއްދީން ސްކޫލުގައި ތައުލީމު ހާސިލުކުރަމުން ދިޔަ ދުވަސްވަރުވެސް ދުވުމުގެ އެކި މުބާރާތްތަކުން ވަނަތައް ހޯދާފައިވާ ޒުވާނެކެވެ.