އަފީފުއްދީން ސްކޫލާއި ޖަލާލުއްދީން ސްކޫލުގައި ޕީޑީ ދުވަސް ފާހަގަކޮށްފި

ކުޅުދުއްފުށީ އަފީފުއްދީން ސްކޫލާއި ޖަލާލުއްދީން ސްކޫލުގައި ޕްރޮފެޝަނަލް ޑިވޮލޮޕްމެންޓް (ޕީޑީ) ދުވަސް ފާހަގަކޮށްފި އެވެ.

އަފީފުއްދީން ސްކޫލުން މައުލޫމާތު ދޭގޮތުގައި މިދިޔަ ބުރާސްފަތި ދުވަހު ބޭއްވި ޕީޑީ ދުވަހުގައި މައުލޫމާތު ދީފައިވަނީ ސްކޫލުގެ ޓީޗަރުންނެވެ. އެގޮތުން ޕީއީ އަދި ޕީއޭ ސެޝަންތަކެއް ނަގައިދީފައިވާ ކަމަށާއި ޓެސްޓް ޕޭޕަރާއި ވޯކްޝީޓު ފަދަ ތަކެތި ހެދުމުގެ ފަންނީ މައުލޫމާތު ޓީޗަރުންނަށް ދެވިފައިވާ ކަމަށް ވެސް އެ ސްކޫލުން ބުންޏެވެ. އަދި ‘ކޮރަލް ޑްރޯ’ ޕްރޮގުރާމު ބޭނުން ކުރާނޭ ގޮތްތައް ވަނީ ދަސްކޮށްދީފަ އެވެ.

އަފީފުއްދީން ސްކޫލުގެ ޕްރިންސިޕަލް އާދަމް މޫސާ ވިދާޅުވީ ޕީޑީ ދުވަހެއް ބޭއްވުމުގެ މައިގަނޑު މަގުސަދަކީ ކިޔަވައިދިނުމާ ބެހޭ ހުނަރުތައް އިތުރަށް ތަރައްގީ ކުރުމާއި ކުރިން ދަސްވެފައިވާ ކަންތައްތަށް އިތުރަށް “ރިފްރެޝް” ކުރުން ކުރުން ކަމަށެވެ.

މިވަގުތު ޗުއްޓީގައި ހުންނެވި ޓީޗަރަކު ފިޔަވައި އެހެން ހުރިހާ ޓީޗަރުން ބައިވެރިވި މި ޕީޑީ ދުވަހުގެ ހަރަކާތްތަށް ވަނީ ބައިތަކަކަށް ބަހާލާފައެވެ. އެގޮތުން އެ ސްކޫލުގެ ޕްރައިމަރީ ޓީޗަރުން ވަނީ ހދ. އަތޮޅު ތައުލީމީ މަރުކަޒަށް ޒިޔާރަތްކޮށް އެ ސްކޫލުގައި ކިޔަވައިދޭ ގޮތާ ބެހޭ މައުލޫމާތު ހޯދާފަ އެވެ. އަދި ސެކަންޑަރީ ޓީޗަރުން ވަނީ ޖަލާލުއްދީން ސްކޫލަށް ޒިޔާރަތް ކޮށްފަ އެވެ.

ޕީޑީ ދުވަސް ފާހަގަކުރި އަނެއް ސްކޫލު ކަމަށްވާ ޖަލާލުއްދީން ސްކޫލުގައި ޕީޑީ ދުވަސް ފާހަގަ ކުރަމުން ގެންދިޔުމާއެކު އެ ޓީޗަރުންނަށް ވަރަށް ބޮޑަށް ފަސޭހަވެގެން ދިޔަ ކަމަށް އަފީފުއްދީން ސްކޫލުން މައުލޫމާތު ދެއެވެ.

ޖަލާލުއްދީން ސްކޫލުގެ ޕީޑީ ދުވަހުގެ ފުރަތަމަ ބައިގައި އެ ސްކޫލުގެ ޓީޗަރުންނަށް ސްކޫލު ތަރައްގީ ކުރުމާ ބެހޭގޮތުން ލެކްޗާރއެއް ގައުމީ ޔުނިވަސިޓީގެ ލެކްޗަރަރ މުހައްމަދު އުމަރު ދެއްވި ކަމަށް އެ ސްކޫލުން މައުލޫމާތު ދެއެވެ.

އަދި އަފީފުއްދީން ސްކޫލުން ޒިޔާރަތް ކުރި މުދައްރިސުންނާއެކު ކިޔަވައިދިނުން އިތުރަށް ހަރުދަނާކޮށް ނަތީޖާ ރަނގަޅު ކުރާނޭ ގޮތުގެ މައުލޫމާތު ދެވިފައިވާ ކަމަށް ޖަލާލުއްދީން ސްކޫލުން ބުންޏެވެ.

މީގެ އިތުރުން ކިޔަވައިދިނުމުގައި ދިމާވާ ދަތިތަކާއި ބެހޭގޮތުން މަޝްވަރާތަކެއް އެސްއެމްޓީގެ ބައްދަލުވުމުގައި ކުރެވުނު ކަމަށާއި ޓީޗަރުންގެ ފަންނީ ތަރައްގީއަށް ކުރެވޭ މަސައްކަތުން ގިނަގުނަ ފައިދާތަކެއް ލިބިގެންދާ ކަމަށް އެސްކޫލުގެ ޑެޕިއުޓީ ޕްރިންސިޕަލް އަލީ އިސްމާއިލް ވިދާޅުވި އެވެ

ޖަލާލުއްދީން ސްކޫލުގެ 45 ޓީޗަރުން މި ޕްރޮގްރާމުގައި ބައިވެރިވެފައި ވެއެވެ.