ކުޅުދުއްފުށީ ކައުންސިލާއި ހދ އަތޮޅު ކައުންސިލަށް އަލަށް އިންތިހާބުކުރި ކައުންސިލަރުން މަގާމުގެ ހުވާކުރައްވައިފި

ލޯކަލް ކައުންސިލު އިންތިހާބުގައި ހދ އަތޮޅު ކައުންސިލަށް އިންތިހާބުކުރި 10 ކައުންސިލަރުންނާއި ކުޅުދުއްފުށީ ކައުންސިލަށް އިންތިހާބު ކުރި 7 ކައުންސިލަރުން ހުވާ ކުރުމުގެ ރަސްމިއްޔާތު މިއަދު ބާއްވައިފި އެވެ.

ކުޅުދުއްފުށީ އަފީފުއްދީން ސްކޫލުގައި މިއަދު ހެނދުނު ބޭއްވި މި ރަސްމިއްޔާތުގައި ހދ އަތޮޅު ކައުންސިލް އަދި ކުޅުދުއްފުށި ރަށު ކައުންސިލަށް އިންތިހާބުވި ކައުންސިލަރުންނަން ހުވާ ލައިދެއްވީ ކުޅުދުއްފުށީ މެޖިސްޓްރޭޓް ކޯޓްގެ މެޖިސްޓްރޭޓް އަލީ އާދަމެވެ.

ކައުންސިލަރުން ހުވާކުރުމަށް ބޭއްވި މި ދަރުބަރުގައި ކައުންސިލަރުން ހުވާ ކުރެއްވުމަށް ފަހު ހުވާގެ އިޤުރާރުގައި ސޮއި ކުރައްވާފައި ވެއެވެ.

މި ދަރުބާރުގައި ރައްޔިތުންގެ މަޖިލީހުގެ ކުޅުދުއްފުށީ ދެކުނު ދާއިރާގެ މެމްބަރު މުހައްމަދު ނަޝީދާއި ކުޅުދުއްފުށި ކައުންސިލުގެ ކުރީގެ މެމްބަރުންނާއި ހދ.އަތޮޅު ކައުންސިލުގެ ކުރީގެ މެމްބަރުންގެ އިތުރުން އާންމު ރައްޔިތުންގެ ތެރެއިންވެސް ގިނަ ބަޔަކު ބައިވެރިވެފައި ވެއެވެ.