ކުޅުދުއްފުށީ ދެކުނު ދާއިރާއަށް ކުރިމަތިލާފައިވާ ކެނޑިޑޭޓުން ގިނަ ވައުދުތަކެއް ވެވަޑައިގެންފި

ޓީވީ މޯލްޑިވްސްއިން ގެނެސްދެމުން އަންނަ މަޖިލިސް ބަހުސް ޕްރޮގްރާމުގައި އިއްޔެ ކުރިއަށް ދިޔަ ކުޅުދުއްފުށީ ދެކުނު ދާއިރާގެ މަޖިލިސް ބަހުސްގައި އެ ދާއިރާއަށް ވާދަކުރާ ހުރިހާ ކެނޑިޑޭޓުންވެސް ބޮޑެތި ވައުދުތަކެއް ވެވަޑައިގެންފި އެވެ.

ކުޅުދުއްފުށީގެ ނަން މަޖިލީހުގައި ގުގުމާލަދޭނެ ކަމަށް އެމްޑީޕީގެ ކެނޑިޑޭޓު އައިޝަތު ލީޝާ ވަނީ ވައުދުވެ ވަޑައިގެންފަ އެވެ. ލީޝާ އަކީ ދާއިރާގެ އެންމެ ގިނަ ގެތަކަށް ޒިޔާރަތްކޮށް ރައްޔިތުންގެ ހިޔާލާއި މަޝްވަރާ ހޯއްދެވި ކެންޑިޑޭޓް ކަމަށް ވިދާޅުވެ އޭނާ މަޖިލީހަށް ހޮވިއްޖެނަމަ ހުށަހެޅޭ ކޮންމެ ބިލަކާ ގުޅޭ ރައްޔިތުންގެ އަޑު އަހާ ދެފުށް ފެންނަ ގޮތަކަށް މަސައްކަތް ކުރައްވާނެ ކަމުގެ ޔަގީންކަން ދެއްވި އެވެ.

ލީޝާ ވިދާޅުވީ ކުޅުދުއްފުށީގެ ރައްޔިތުންގެ އެންމެ ބޮޑު ކަންބޮޑުވުމެއް އޮތީ ސިއްހީ ދާއިރާގައި ކަމށެވެ. މަޖިލީހުގެ ކުޅުދުއްފުށީ ދެކުނު ދާއިރާގެ ގޮނޑިއަށް ހޮވިއްޖެނަމަ ސިއްހީ ދާއިރާގައި ހުރި މައްސަލަތައް ހައްލު ކޮށްދެއްވާނެ ކަމަށް ލީޝާ ވިދާޅުވި އެވެ. އެގޮތުން ކުޅުދުއްފުށީ ހޮސްޕިޓަލުގެ ހިދުމަތް ޓާޝަރީ ފެންވަރަށް ގެނެސްދެއްވާނެ ކަމަށް ވިދާޅުވި އެވެ.

ތައުލީމީ ދާއިރާއަށް ދިމާވެފައިވާ މައްސަލަަތައް ހައްލު ކޮށްދޭނެ ކަމަށާއި ޓީޗަރުންގެ އެލަވަންސްތައް އިތުރުކޮށް މުސާރައިގެ މައްސަލަތައް ހައްލުކޮށްދޭނެ ކަމަށްވެސް އެމްޑީޕީގެ ޓިކެޓުގައި މަޖިލީހުގެ މެމްބަރުކަމަށް ވާދަކުރާއްވާ ލީޝާ ވިދާޅުވި އެވެ. މީގެ އިތުރުން އިޖުތިމާއީ ގޮތުން ހުރި ގޮންޖެހުންތައް ކަމަށްވާ ގެވަޅުގެ މައްސަލައާއި ކުނީގެ މައްސަލަ އަދި ރޯނުގެ އަގުގެ މައްސަލަައިގެ އިތުރުން ރައްޔިތުންނަށް ދަތިވާ ކޮންމެ ކަމެއްގައި ހައްލު ހޯދައި ދެއްވާނެ ކަމަށް ވިދާޅުވެ ކުޅިވަރުގެ ދާއިރާ އަށް އިތުރަށް މަސައްކަތް ކޮށްދެއްވާނެ ކަމަށް ލީޝާ ވިދާޅުވި އެވެ. ފަސްބައިގައި ކިލަނބު ކަމެއް ނުހުންނާނެ ކަމަށް ވިދާޅުވެ ކުޅުދުއްފުށީ ރައްޔިތުން ލަދުގަންނާނެ ފަދަ އެއްވެސް އަމަލެއް އޭނާގެ ކިބައިން ނުފެންނާނެ ކަމަށާއި ގުޅިގެން މަސައްކަތްކުރެވޭ އޯގާތެރި މީހަކަށް ވާނެ ކަމަށް އޭނާ ޔަގީން ކުރެއްވި އެވެ.

ކުޅުދުއްފުށީ ދެކުނު ދާއިރާއަށް ކުރިމަތިލާފައިވާ އަންހެން ދެވަނަ ކެނޑިޑޭޓް ކަމަށްވާ ނާޒިމާ ރައްޔިތުންގެ އަޑު އަހާނެކަމަށް ވިދާޅުވި އެވެ. އެގޮތުން ރައްޔިތުންގެ މައްސަލަތައް ހުށަހެޅުމަށް ރަށުގައި ‘ލޮލަށް ފެންނަ ގޮތަށް’ އޮފީހެއް އަޅުއްވާނެ ކަމަށާއި ޓްވިޓަރ، ފޭސްބުކް އަދި އެސްއެމްއެސްގެ ޒަރީއާއިންވެސް ނާޒިމާއާ ހިޔާލު ބަދަލު ކުރެވޭނެ ކަމަށް އޭނާ ވިދާޅުވި އެވެ. ރާއްޖޭގައި ރައްކާތެރި ވެއްޓެއް ގާއިމު ކުރުމަށްޓަކައި އެންމެ ފުރަތަމަ އިސްލާމިކް ޝަރީއާ ބެހޭ ބިލުތައް ފާސްކުރުން މުހިއްމު ކަމަށް ނާޒިމާ ވިދާޅުވި އެވެ. އަދި އެންމެ ފުރަތަމަ ހުށަހަޅަން ޖެހޭ ބިލަކީ ރައްޔިތުން މަޖިލީހުގެ މުސާރައާއި އިނާޔަތްތައް ހަމަހަމަ ކުރުމަށް ޕޭ ކޮމިޝަނެއް ހެދުމުގެ ބިލް ކަމަށް ނާޒިމާ ވިދާޅުވި އެވެ.

“އިތުބާރުކުރައްވާ، ފުރުސަތު ދެއްވާ އަދި ތަޖުރިބާ ކޮށްލައްވާ” މިފަދައިން ވިދާޅުވެ ނާޒިމާ ވަނީ އޭނާގެ ކިބައިން އަހުލާގީ ގޮތުން ދަށް ސުލޫކީ މިންގަނޑުތަކާ ހިލާފު އެއްވެސް އަމަލެއް ނުފެންނާނެ ކަމުގެ ޔަގީންކަން ދެއްވާފަ އެވެ. ހިރަފުސް ދަނޑުގައި ކުޅޭ ކުޅިވަރުތަކުގައި އެއްބާޜުލުން ދޭނެ ކަމަށާއި އަމީރު އަމީން ސްކޫލު ޓީޗަރުންގެ މުސާރައިގެ ކަންތައްތައް ހަމަޖައްސައިދޭނެ ކަމަށާއި ސްކޫލުތަކުގެ ޕޭރެންޓުންގެ ހުރި ހިތްހަަމަ ނުޖެހުންތައްކުގައި އެއްބާރުލުން ދޭނެ ކަމަށް ނާޒިމާ އިތުރަށް ވިދާޅުވި އެވެ.

ކުޅުދުއްފުށީ ދެކުނު ދާއިރާގެ މަޖިލިސް މެމްބަރުކަން މިހާރުވެސް ފުރުއްވަމުން ގެންދަވާ މުހައްމަދު ނަޝީދު އިއްޔެ ބޭއްވި ބަހުސްގައި ވިދާޅުވީ މިހާތަނަށް ރައީސް ނަޝީދުގެ އެދިލެއްވުމަށް 18 ގާނޫނެއް ތައްޔާރުކޮށް 20 ބިލެއް އަމިއްލަގޮތުން ހުށަހަޅުއްވާފައިވާނެ ކަމަށެވެ.

ނަޝީދު ވިދާޅުވީ ބެންކުން ލޯނު ނަގަން ނުޖެހި މިހާރުވެސް ފުލެޓުތައް އަޅާ އުސޫލުން ދިގު މުއްދަތުން އަދާ ކުރާ ގޮތަށް 500 ގެވަޅު އިމާރާތް ކުރުމުގެ މަޝްރޫއު ހިންގޭނެ ކަމަށް އުންމީދު ކުރައްވާ ކަމަށެވެ. މީގެ އިތުރުން ތާރޑް ޕާޓީ އިންޝުރެންސް ދުއްވާލުމަށާއި ޑްރަގު ރިހެބިލިޓޭޝަން ސެންޓަރެއް ގާއިމު ކުރުމަށް އޭނާ ވައުދުވެ ވަޑައިގަތެވެ.

ސަރުކާރުން ރަށަށް ބޭނުންވާ ކަންތައްތައް ކުރުމަށް އަދި ރަށުން ބޭނުން ކަންތައްތައް ސަރުކާރަށް ގެނައުމުގެ އަޒުމުގައި މިފަހަރު ކުޅުދުއްފުށީ ދެކުނު ދާއިރާއަށް ކުރިމަތިލައްވާފައިވާ ނަޝީދު ވިދާޅުވީ ޕްރީ ސްކޫލު، އެއާޕޯޓު، ސިއްހީ، ފުޓްސަލް ދަނޑު، ކޯޓު ތަރައްގީ ކުރުން، މަދިރި ނުވަތަ ރިސޯޓުތައް ލަސްވެގެން އުޅޭ މައްސަލަ ކަމުގައިވިޔަސް ސަރުކާރުން ވެފައި ހުރި ވައުދުތަކާއި އެއްގޮތަށް އަމަލުކުރުވުމަށް ބާރުއަޅުއްވާނެ ކަމަށް އެވެ.

ގުރުބާނީތަކެއް ވެގެން ގެނައި އެމްޑީޕީއިން ރައްޔިތުންނަށް ގެއްލުންވާފަދަ ކަންތައްތަކެއް ކުރާ މަންޒަރު ފެނުމުން ރައްޔިތުންގެ ހައްގުގައި އެޕާޓީން ދުރަށް ދިޔަކަމަށް ވިދާޅުވަމުން އަންނަ އާދަމް ވަހީދު ވިދާޅުވީ ރައްޔިތުންގެ މަޖިލީހުން ލިބޭ މުސާރައިގެ އެންމެ ލޯ ލާރިއެއްވެސް ބޭނުން ނުކުރާނެ ކަމަށާއި އެ މުސާރަ ޖަމާކޮށް ޓްރަސްޓް ފަންޑެއް ގާއިމު ކޮށްދެއްވާނެ ކަމަށެވެ. އޭނާ ހޮވިއްޖެނަމަ ކުޅުދުއްފުށީގެ އެއާޕޯޓު އެޅުމަށް ސަރުކާރާ ގުޅިގެން މަސައްކަތް ކުރައްވާނެ ކަމަށް އޭނާ ވިދާޅުވި އެވެ.

އާދަމް ވަހީދު ބަހުސް ނިންމަވާލައްވަމުން ވިދާޅުވީ އޭނާއަށް ވޯޓު ނުލައްވާނަމަ ކުޅުދުއްފުށީ ދެކުނު ދާއިރާއަށް އަމިއްލަ ގޮތުން ކުރިމަތިލާފައިވާ ނާޒިމާއަށް ވޯޓު ދެއްވުމަށް އެދިވަޑައިގަންނަވާ ކަމަށެވެ.

އިއްޔެ ކުރިއަށްދިޔަ ކުޅުދުއްފުށީ އުތުރު ދާއިރާގެ ބަހުސްގައި ވެސް ހުރިހާ ކެނޑިޑޭޓުންވެސް ބޮޑެތި ކަންތައްތަކެއް ކޮށްދެއްވާނެ ކަމަށް ވަނީ ވިދާޅުވެފައެވެ.

ރައްޔިތުންގެ މަޖިލީހުގެ އިންތިހާބު އަންނަ މަހުގެ 22 ގައި އޮންނައިރު، ރަށްވެހިވެފައި ރަށް ނޫން އެހެންރަށެއްގައި ވޯޓުދޭނަމަ ރަޖިސްޓްރީކުރަން ދީފައިވާ މުއްދަތު މި މަހުގެ ނިޔަލަށް ހަމަވާނެ އެވެ.