ކުޅުދުއްފުށީ ކައުންސިލުގެ ރައީސްގެ މަގާމަށް އަލީ މުހައްމަދު އިންތިހާބުކޮށްފި

މިދިޔަ މަހު ބޭއްވި ލޯކަލް ކައުންސިލް އިންތިހާބުގައި ކުޅުދުއްފުށީ ކައުންސިލަށް އަލަށް އިންތިހާބުކުރި ކައުންސިލަރުންގެ ތެރެއިން އެ ކައުންސިލްގެ ރައީސްގެ މަގާމަށް އަލީ މުހައްމަދު (ދެރަހަ އަލީ) އެ ކައުންސިލުން އިންތިހާބު ކޮށްފި އެވެ.

ކައުންސިލަރުން ހުވާކުރެއްވުމަށް މިއަދު ބޭއްވި ރަސްމިއްޔާތަށްފަހު ކައުންސިލުން ބޭއްވި ފުރަތަމަ ބައްދަލުވުމުގައި ރައީސްކަމުގެ މަގާމަށް އަލީ މުހައްމަދު އިންތިހާބުވެވަޑައިގަތީ 4 ވޯޓާއެކު އެވެ. ދެން އެ މަގާމަށް ވާދަކުރެއްވި ކައުންސިލަރ އިބްރާހީމް އައްބާސް އަށް ލިބިވަޑައިގަތީ 3 ވޯޓެވެ.

ކުޅުދުއްފުށީ ކައުންސިލުގެ ނައިބު ރައީސްކަމަށް އިންތިހާބުކޮށްފައިވަނީ މުހައްމަދު އައިމަން އެވެ. އައިމަން އަށް ވެސް ލިބިވަޑައިގަތީ 4 ވޯޓެވެ. ނައިބު ރައީސްކަމަށް ވާދަކުރެއްވި އިބްރާހީމް އައްބާސްއަށް ލިބިވަޑައިގަތީ 3 ވޯޓެވެ. އެ މަގާމަށް ވާދަކުރެއްވި އިބްރާހީމް ރަޝީދަށް އެއްވެސް ވޯޓެއް ލިބިވަޑައިގެންފައެއް ނުވެއެވެ.

ކުޅުދުއްފުށީ ކައުންސިލްގެ ރައީސާއި ނައިބު ރައީސްގެ މަގާމަށް އެ ކައުންސިލުން މިއަދު އިންތިހާބުކޮށްފައިވާ ދެ ކައުންސިލަރުންނަކީވެސް އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ދެ ކައުންސިލަރުންނެވެ.

ކުޅުދުއްފުށީ ކައުންސިލުގައި އެމްޑީޕީގެ 4 ކައުންސިލަރަކާއި ޕީޕީއެމް އާއި ޖޭޕީން ކޮންމެ ޕާޓީއަކުން އެއް ކައުންސިލަރެއްގެ އިތުރުން އަމިއްލަގޮތުން އިންތިހާބުވި ކައުންސިލަރަކު ހިމެނެއެވެ.