ހދ އަތޮޅު ތައުލީމީ މަރުކަޒުގެ ދަރިވަރުންގެ ޖަމިއްޔާ އަދި ޕްރިފެކްޓް ބޯޑު އިފްތިތާހު ކޮށްފި

ހދ އަތޮޅު ތައުލީމީ މަރުކަޒު (އޭއީސީ) ގެ ދަރިވަރުންގެ ޖަމިއްޔާ އާއި އެ ސްކޫލުގެ ޕްރިފެކްޓް ބޯޑު އިފްތިތާހުކޮށްފި އެވެ.

އޭއީސީގެ ދަރިވަރުންގެ ޖަމިއްޔާ، ކިޔަވާކުދިންގެ ގުޅުން (ކޭކޭޖީ) އަދި އެ ސްކޫލުގެ ޕްރިފެކްޓް ބޯޑު އިފްތިތާހު ކޮށްފައިވަނީ މިއަދު ހެނދުނު އެ ސްކޫލުގައި ބޭއްވި ހާއްސަ ރަސްމިއްޔާތެއްގައެވެ.

އެ ރަސްމިއްޔާތު ޝަރަފުވެރި ކޮށްދެއްވީ ކުޅުދުއްފުށީ ރަށު ކައުންސިލުގެ ރައީސް އަލީ މުހައްމަދެވެ. އަދި ރަށު ކައުންސިލަށް އިއްޔެ އަލަށް ހުވާކުރެއްވި މެންބަރުންވެސް ވަނީ މި ރަސްމިއްޔާތުގައި ބައިވެރިވެފަ އެވެ.

މިއަދުގެ ރަސްމިއްޔާތުގައި ސްކޫލުގެ އިސް މަގާމުތަކަށާއި ކޭކޭޖީގެ އިސް މަގާމުތަކުގެ ދަރިވަރުންނަށް އެ މަގާމުތައް ހަވާލުކޮށްފައިވެ އެވެ. މަގާމުތަކަށް ދަރިވަރުން ހޮވިފައިވަނީ އިންތިހާބީ އުސޫލުން ކަމަށް އެސްކޫލުން މައުލޫމާތު ދެއެވެ.

އޭއީސީގެ ކެޕްޓަން ކަމުގެ މަގާމަށް ހޮވިފައިވަނީ އަހުމަދު ޖައިލަމް އެވެ. ވައިސް ކެޕްޓަން ކަމުގެ މަގާމު މަޒީނާ ހަސަނަށް ލިބިފައިވާއިރު އެ މަގާމަށް ދެން ހޮވިފައިވަނީ އަހުމަދު މަފާޒު މުހައްމަދު، އެވެ. ސްކޫލުގެ ކެޕްޓަނުންގެ އިތުރަށް ސްކޫލުގެ ތިން ހައުސްގެ ކެޕްޓަނުންނަށް ހޮވިފައިވާ ދަރިވަރުންނަށްވެސް އެމަގާމުތައް މި ރަސްމިއްޔާތުގައި ވަނީ ހަވާލުކޮށްފައެވެ.

އޭއީސީގެ ދަރިވަރުންގެ ގުޅުމަކީ ތަފާތު ގޮފިތަކަކަށް ބަހާލެވިގެން ހިންގާ ޖަމިއްޔާއެއް ކަމަށްވުމާއެކު ޖަމިއްޔާ އަދި ކޮންމެ ކުލަބެއްގެ ރައީސް، ނާއިބު ރައީސް އަދި ސެކްރެޓަރީއަށް ޓެގްކޮޅު ހަވާލުކުރުންވެސް މިއަދުގެ ރަސްމިއްޔާތުގައި އޮތެވެ. ކޭކޭޖީގެ ރައީސްކަމަށް ހޮވިފައިވަނީ މަރިޔަމް މައިޝާ އަހުމަދު އެވެ.

އޭއީސީގެ ކިޔަވާކުދިންގެ ގުޅުމުގައި އިސްލާމް، އާރޓް އެންޑް ކަލްޗާރ އަދި ސައިންސް ނުުުުުވަތަ އެންވައިރޮންމެންޓް ކުލަބު ފަދަ ތަފާތު ކުލަބުތައް އޮވެއެވެ.