ޖަލާލުއްދީން ސްކޫލުގެ 4 ދަރިވަރަކު ނެޝަނަލް ޓޮޕްޓެން އިން ޖާގަ ހޯދައިފި

މިދިޔަ އަހަރު ބޭއްވި އެޑެކްސެލް އޭ ލެވެލް އިމްތިހާނުގައި ޖަލާލުއްދީން ސްކޫލުގެ 4 ދަރިވަރަކު ނޭޝަނަލް ޓޮޕްޓެންގައި ހިމެނިއްޖެ އެވެ.

މިދިޔަ އަހަރުގެ މެއި ޖޫންގައި ބޭއްވި އޭލެވެލް އިމްތިހާނުން އެންމެ ރަނގަޅު ނަތީޖާ ހޯދި ޖަލާލުއްދީން ސްކޫލުގެ ދެ ދަރިވަރުންނަކީ ކުޅުދުއްފުށީ ޝަމިޔާމަންޒިލް، ޝާމިލް އިބްރާހީމް އާއި ހދ. ނޮޅިވަރަންފަރު، ސުހާނީ، ހުމައިދު އަލީ އެވެ.

ތިން މާއްދާއިން އޭ ސްޓާ ހޯދައިގެން އެޑެކްސެލްގެ ހައި އެޗީވާސް އެވޯޑު ހޯދި ތިން ދަރިވަރުންގެ ތެރޭގައި ވެސް ޝާމިލް އިބްރާހީމާއި ހުމައިދު އަލީ ހިމެނުނެވެ.

މީގެ އިތުރުން ހުމައިދު އަލީ ވަނީ މިދިޔަ އަހަރުގެ އޭލެވެލް މުޅި ރާއްޖޭގެ ގަދަ 10 ގައި ވެސް ހިމެނި، ގަދަ ދިހައަކުން 1 ވަނަ ހޯދި 11 ދަރިވަރުންގެ ތެރެއިން ވެސް ޖާގަ ހޯދާފަ އެވެ. އެއީ 18 ސްކޫލަކުން 126 ދަރިވަރުންނާ ވާދަ ކޮށްގެންނެވެ.

ހުމައިދު އަލީ އޭ ސްޓާ ހޯދި މާއްދާތަކަކީ ބައޮލޮޖީ، ފިޒިކްސް، އިސްލާމް އަދި ހިސާބު އެވެ. މީގެ ތެރެއިން އިސްލާމް މާއްދާއި ހިސާބުން މުޅި ރާއްޖެއިން ބެސްޓް އެޗީވާސް އެވޯޑް ހާސިލް ކޮށްފައި ވަނީ ހުމައިދު އެކަނިކަން ފާހަގަ ކޮށްލެވެ އެވެ.

ޝާމިލް އިބްރާހިމް އޭ ސްޓާ ހޯދާފައި ވަނީ ބައޮލޮޖީ، ފިޒިކްސް އަދި ހިސާބުންނެވެ. އަދި ޝާމިލް ވަނީ ކެމިސްޓްރީން ބެސްޓް އެޗީވާސް އެވޯޑު ހޯދައި ނެޝަނަލް ޓޮޕްޓެން އިން 2 ވަނަ ހޯދާފައެވެ.

އެކައުންޓުން 100 ޕަސެންޓް ހޯދައިގެން، އެ މާއްދައިން ފުލް މާކްސް ހޯދި 7 ދަރިވަރުންގެ ތެރޭގައި ކުޅުދުއްފުށީގެ ދަރިވަރަކު ހިމެނިފައި ވެއެވެ. އެއީ އަހުމަދިއްޔާ ސްކޫލުގައި ތައުލީމް ހާސިލު ކުރި ހދ.ކުޅުދުއްފުށީ ،ބަދުރު، އާދިލާ ހަސަނެވެ.

މީގެ އިތުރުން ޖަލާލުއްދީން ސްކޫލުގެ 2 ދަރިވަރަކު ވަނީ ނެޝަނަލް ޓޮޕްޓެން އިން ޖާގަ ހޯދާފަ އެވެ. އެއީ 8 ވަނަ ހޯދި އަހުމަދު ރަޝީދާއި 9 ވަނަ ހޯދި އިހްސާން އަހުމަދެވެ.

އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަބްދުﷲ ނަޒީރު އެ ޖަލްސާގައި ވިދާޅުވީ ގަދަ 10 ގައި ހިމެނިފައި ވަނީ 72 އަންހެން ދަރިވަރުންނާއި 54 ފިރިހެން ދަރިވަރުން ކަމަށެވެ. އެހެން ގައުމުތަކެކޭ އެއްގޮތަށް ރާއްޖޭގައި ވެސް އަންހެން ދަރިވަރުންގެ ނަތީޖާ އަހަރުން އަހަރަށް ކުރިއަރަމުން އަންނަކަން ނަޒީރުގެ އިތުރުން އެޑިއުކޭޝަން މިނިސްޓަރު ޑރ. އައިޝަތު ޝިހާމް ވެސް ފާހަގަކުރެއްވި އެވެ.

ނަޒީރު ވިދާޅުވި ގޮތުގައި އޭ ލެވެލް ތިން މާއްދާ އިން ފާސްވި ޕަސެންޓޭޖް 2012 ވަނަ އަހަރާ އަޅާބަލާއިރު 2.9 ޕަސެންޓް ވަނީ އިތުރުވެފަ އެވެ. މިދިޔަ އަހަރު ތިން މާއްދާ އިން 74.9 ޕަސެންޓް ކުދިން ފާސްވެފައިވާކަން އޭނާ ފާހަގަކުރެއްވި އެވެ.

މިދިޔަ އަހަރުގެ އިމްތިހާނުގައި ދިވެއްސާއި އިސްލާމް މާއްދާ އިން ވެސް 2.4 ޕަސެންޓުގެ ކުރިއެރުމެއް ލިބިފައިވާ ކަމަށް ނަޒީރު ވިދާޅުވި އެވެ. އަދި ކޮމާސް ސްޓްރީމް ދަރިވަރުން މިދިޔަ އަހަރު ހޯދި ނަތީޖާ އެއްވަރެއްގައި ހިފެހެއްޓި ފައިވާއިރު ސައިންސް ސްޓްރީމް ކުޑަކޮށް ދަށްވެފައިވާ ކަމަށް އެޑިއުކޭޝަން މިނިސްޓްރީން އޭނާ ވިދާޅުވި އެވެ.

އޭލެވެލް ގަދަ 10 ގައި ހިމެނުނު ދަރިވަރުން އިއުލާންކުރުމަށް ދަރުބާރުގޭގައި ބޭއްވި ރަސްމިއްޔާތުގައި ދަރިވަރުންނަށް އިނާމާއި ހަނދާނީ ލިޔުމުގެ އިތުރުން ސްކޮލަޝިޕްގެ ފުރުސަތު ހުޅުވާލާފައިވާކަން ވަނީ އިއުލާންކޮށްފަ އެވެ

އެ ޖަލްސާގައި ރައީސް އަބްދުﷲ ޔާމީނާއި ނައިބު ރައީސް ޑރ. މުހައްމަދު ޖަމީލް އަހުމަދާއި އެޑިއުކޭޝަން މިނިސްޓަރު ޑރ. އައިޝަތު ޝިހާމްގެ އިތުރުން ދަރިވަރުންނާއި ބެލެނިވެރިން ވެސް ބައިވެރިވި އެވެ.

 

އެޑިޓަރުގެ ނޯޓް:

ހަބަރު ޝާއިއުކުރި ފަހުން ވަނީ އިސްލާހުކުރެވިފައި. ހަބަރުގައި ދުނިޔެއިން އެއްވަނަ މަގާމު ލިބުނުކަމަށް ލިޔެވިފައިވަނީ ލިބުނު މައުލޫމާތުގައިވާ ކުށަކުން.