އަމީރު އަމީން ސްކޫލުގައި މަގުމަތީގެ ރައްކާތެރިކަމާ ބެހޭގޮތުން މައުލޫމާތު ދިނުމުގެ ސެޝަނެއް ފަށައިފި

އަމީރު އަމީން ސްކޫލާއި ފުލުހުން ގުޅިގެން، މަގުމަތީގެ ރައްކާތެރިކަމާ ބެހޭގޮތުން މައުލޫމާތު ދިނުމުގެ ސެޝަނެއް ފަށައިފި އެވެ.

އަމީރު އަމީން ސްކޫލުގެ ޔޫކޭޖީ ދަރިވަރުންނަށް އަމާޒުކޮށްގެން ހިންގާ މި ސެޝަންތަކަކީ ކުދިން މަގުމަތީގައި އުޅޭއިރު ހޭލުންތެރި ކުރުމަށް ހިންގާ ސެޝަަންތަކެއް ކަމަށް އެސްކޫލުން މައުލޫމާތު ދެ އެވެ. އެގޮތުން މަގުމަތީގައި އުޅޭއިރު މަގުމަތީގެ އަދަބުތަކާއި ހިލާފަށް ބެލެނިވެރިންކުރާ އަމަލުތައް ދެނެގަނެ އެކަން ފާހަގަކުރަން ދަސްކޮށްދިނުމަކީވެސް މިސެޝަނުގެ މަގުސަދެއްކަމަށް އެފަރާތުން ބުންޏެވެ.

މިއަދުގެ ސެޝަންގައި މައުލޫމާތު ދެއްވީ ފޮލިސް ލާންސް ކޯޕްރަލް މޫސާ އަބޫބަކުރާއި ސްޓާފް ސާޖަންޓް މުހައްމަދު ހަސަން އެވެ. މިއަދު ޔޫކޭޖީގެ ދެ ކުލާހަކަށް މައުލޫމާތު ދީފައިވާއިރު މާދަމާ އިތުރު ދެ ކުލާހަކަށް މި ސެޝަން ހިންގުމަށް ވަނީ ހަމަޖެހިފައިވެ އެވެ.

އަމީރު އަމީން ސްކޫލަކީ ޕްރީ ސްކޫލު ތައުލީމު ފޯރުކޮށްދޭ ސްކޫލެކެވެ. އެސްކޫލުގައި މިހާރު ޔޫކޭޖީގައި ފަސް ކުލާހެއްގައި ކިޔަވައިދެ އެވެ.