އަފީފުއްދީން ސްކޫލުގައި “ހަތަރު ދުވަސް އެއްދުވަހެއްގައި” ފާހަގަކޮށްފި

އަފީފުއްދީން ސްކޫލުގައި ގައުމީދުވަހާއި ޅެންވެރިންގެ ދުވަސް އަދި ރާއްޖެ އިސްލާމްވީ ދުވަހާއި މާދަރީބަހުގެ ދުވަސް އެއް ދުވަހެއްގެ ގޮތުގައި ފާހަގަ ކުރުމުގެ ގޮތުން ހަރަކާތްތަކެއް ކުރިއަށް ގެންގޮސްފި އެވެ.

އަފީފުއްދީން ސްކޫލު ހޯލުގައި ވަރަށް ކުލަގަދަ ގޮތެއްގައި ބޭއްވުނު މިހަރަކާތްތައް ޝަރަފުވެރި ކޮށްދެއްވީ ކުޅުދުއްފުށީގެ ޅެންވެރިއެއްކަމަށްވާ އާދަމް އިބްރާހިމް، ދުރުމީ، އެވެ.

ދުވަހުގެ ހަރަކާތްތައް ފެށުމުގެ ގޮތުން ޝަރަފުވެރި މެހެމާނު ދެއްކެވި ވާހަކަފުޅުގައިި ދިވެހި ބަހަށްދޭ އަހައްމިއްޔަތުކަން އިތުރުކުރުމަށާއި ވާހަކަ ދައްކާއިރު ވީހާވެސް ގިނައިން ދިވެހި ބަސް ބޭނުންކުރުމަށް އެދިލެއްވި އެވެ.

މި ހަރަކާތުގައި ސްކޫލުގެ މުސްކުޅި ދަރިވަރުންނާއި މިހާރުގެ ދަރިވަރުން ބައިވެރިވެފައި އެވެ. ހުރިހާ ދަރިވަރުންވެސް ހަރަކާތްތަކުގައި ބައިވެރިވެފައިވަނީ ގައުމީ ހެދުން ލައިގެންނެވެ.

ހަތަރު ދުވަހާ ގުޅޭ އައިޓަމްތައް ކުރިއަށް ގެންދިޔައިރު ބައިތުބާޒީ އާއި ރާއްޖެ އިސްލާމްވި ގޮތާ ބެހޭގޮތުން ދެކެވޭ ފޯކްލޯކު ވާހަކައެއް ކަމަށްވާ އަބުލްބަރަކާތުލް ބަރުބަރީ ރާއްޖެ އިސްލާމްކުރި ގޮތް ދައްކައިދޭ ތަމްސީލެއް ހުށަހަޅައި ދީފައިވެ އެވެ. އަދި މީގެ އިތުރުން ބަނޑިޔާ ޖެހުމާއި، ބޮޑުބެރު ޖެހުން އަދި ދަނޑި ޖެހުން ފަދަ ސަގާފީ ހަރަކާތްތައް އިއްޔެ ފެނިގެން ގޮސްފައިވެ އެވެ.

މި އިވެންޓު ބަލާލުމަށް ސްކޫލުގެ ގިނަ އަދަދެއްގެ ޓިޗަރުންނާ ބެލެނިވެރިން އަދި ދަރިވަރުން ސްކޫލަށް ހާޒިރުވެފައިވެ އެވެ.