އޭއީސީގެ 35 ވަނަ އަހަރީ ދުވަސް ފާހަގަ ކުރުމުގެ ގޮތުން އެ ސްކޫލުގައި ހަދާފައިވާ “އައުޓްޑޯރ ހަޓްތައް” ހުޅުވައިފި

ހދ. އަތޮޅު ތައުލީމީ މަރުކަޒުގެ 35 ވަނަ އަހަރީ ދުވަސް ފާހަގަ ކުރުމުގެ ގޮތުން އެ ސްކޫލުގައި ގާއިމުކޮށްފައިވާ “އައުޓްޑޯރ ހަޓްތައް” މިއަދު ހުޅުވައިފި އެވެ.

މި ހަޓްތައް ހުޅުވައި ދެއްވާފައިވަނީ މިއަދު ބޭއްވުނު ހާއްސަ އެސެމްބްލީގެ ޝަރަފުވެރި މެހެމާނު ދިރާގު ކުޅުދުއްފުށީ އޮޕަރޭޝަންގެ މެނޭޖަރ އަހުމަދު ފާހިރެވެ.

އައުޓްޑޯރ ކްލާސްތަކެއް ހެދުމުގެ މަގުސަދަކީ ބޭރުގައި ތިބެގެން ޝައުގުވެރިކަމާއެކު ދަރިވަރުންނަށް ކިޔެވޭނެ އިންތިޒާމު ހަމަޖެއްސުން ކަމަށް އޭއީސީއިން މައުލޫމާތު ދެ އެވެ.

މި ހަޓްތައް ހެދުމުގައި މާލީ އެހީގެ ގޮތުގައި 60 ހާހަކަށް ރުފިޔާ ކުޅުދުއްފުށީ ދެކުނު ދާއިރާގެ މެންބަރު މުހައްމަދު ނަޝީދު ދެއްވާފައިވާ ކަމަށާއި ހދ. އަތޮޅު ކައުންސިލާއި ކުޅުދުއްފުށީ ރަށު ކައުންސިލުންވެސް މާލީ އެހީ ވެދެއްވާފައިވާ ކަމަށް އެސްކޫލުން ހާމަކުރެއެވެ. އެގޮތުން ހދ. އަތޮޅު ކައުންސިލުން ދެއްވާފައިވަނީ 35000ރ. ފައިސާގެ އެހީއެއް ވަނީ ދީފައެވެ.

މީގެ އިތުރުން މިތުރު ކޮންޕެނީ އާއި ކުޅުދުއްފުށީ ޕޮލިސް ސްޓޭޝަންގެ މުވައްޒަފުންވަނީ ހަޓްތައް ހެދުމުގެ މަސައްކަތުގައި އަމަލީ ގޮތުން ބައިވެރިވެފައި އެވެ.

މި މަސައްކަތަކީ ސްކޫލުގެ މެނޭޖުމެންޓުން އިސްނަގައިގެން ސްކޫލެގެ އެހެނިހެން މުވައްޒަފުންވެސް ބައިވެރިވެގެން ކުރިއަށް ގެންދިޔަ މަސައްކަތެއްކަމަށް އެސްކޫލުން މައުލޫމާތު ދެ އެވެ. މިގޮތުން އޭއީސީގެ ޓީއާރުސީ ކޯޑިނޭޓަރު އަބްދުއްރަޝީދު ސައީދާއި ލީޑިން ޓީޗަރު އަބްދުލް ހަމީދު އަދި އަހުމަދު ފަހީމުގެ މަސައްކަތް ސްކޫލުން ހާއްސަގޮތެއްގައި ފާހަގަ ކުރެއެވެ.

ހދ އަތޮޅު ތައުލީމީ މަރުކަޒަކީ އަތޮޅު ތެރޭގައި ސަރުކާރުން އެންމެ ފުރަތަމަ އިމާރާތްކުރި ސްކޫލްތަކުގެ ތެރޭގައި ހިމެނޭ ސްކޫލެކެވެ.