ހަނިމާދޫއަށް މަސްތުވާތަކެތި އެތެރެ ކުރަން އުޅުނު ބަޔަކު ފުލުހުން އަތުލައިގެންފި

ހދ. ހަނިމާދޫއަށް މަސްތުވާތަކެތި އެތެރެ ކުރަން އުޅުނު ބަޔަކު ފުލުހުން އަތުލައިގެންފި އެވެ.

އެގޮތުން ފުލުހުންގެ ބެލުމުގެ ދަށަށް ގެނެވިފައިވަނީ އުމުރުން 15 އަހަރުގެ ފިރިހެން ކުއްޖަކާއި 28 އަހަރުގެ ފިރިހެނެއްކަމަށް ފުލުހުން މައުލޫމާތު ދެއްވަ އެވެ.

މި ދެ ފަރާތް ފުލުހުންގެ ބެލުމުގެ ދަށަށް ގެންދިޔައީ މާލެއިން ހަނިމާދޫއަށް ދިޔަ ބޯޓަކުން މަސްތުވާތަކެތި އެތެރެ ކުރަން އުޅޭ ކަމުގެ މައުލޫމާތު ފުލުހުންނަށް ލިބިގެން ހދ.ހަނިމާދޫ ޕޮލިސް ސްޓޭޝަނުން ހިންގި އޮޕަރޭޝަނެއްގައި ކަމަށް އެފަރާތުން މައުލޫމާތު ދެ އެވެ. 2014 މާރޗް 1 ވަނަ ދުވަހުގެ ހަވީރު ފަހެއް ޖަހާކަންހާއިރު ހަނިމާދޫ ބަނދަރު ސަރަހައްދުން ފުލުހުންގެ ބެލުމުގެ ދަށަށް ގެނެވުނު މި ދެފަރާތުން ގެނައި ފޮށިގަނޑުން މަސްތުވާތަކެތި ކަމަށް ޝައްކު ކުރެވޭ އެއްޗެއް އަޅާފައިހުރި 1 ރަބަރު ޕެކެޓް ފެނިފައިވާކަމަށް ފުލުހުން ހާމަކުރެ އެވެ.

މިއީ މަސްތުވާތަކެތީގެ ވަބާއިން މުޖުތަމައު ސަލާމަތް ކުރުމަށް ފުލުހުން ކުރަމުންދާ މަސައްކަތުގެ ތެރެއިން ހިންގިފައިވާ އޮޕަރޭޝަނެކެވެ. ހދ. ހަނިމާދޫ ޕޮލިސް ސްޓޭޝަނުން ދަނީ މި މައްސަލަ ތަހުގީގުކުރަމުންނެވެ.