އޯޓިިޒަމް ހުންނަ ކުދިންނަށް އެހީތެރިވުމުގެ ގޮތުން ދަގަނޑޭގެ ޖާޒީއެއް ނީލަން ކިޔަނީ

އޯޓިޒަމް ހުންނަ ކުދިންނަށް އެހީތެރިވުމުގެ ގޮތުން ގައުމީ ޓީމުގެ ކެޕްޓަން އަލީ އަޝްފާގު (ދަގަނޑޭ) ސޮއިކޮށްފައިވާ ޖާޒީއެއް ނީލަން ކިޔަން ފަށައިފި އެވެ.

ކުޅުދުއްފުށީގައި ހުންނަ ހދ އަތޮޅު ތައުލީމީ މަރުކަޒުގެ 35 އަހަރީ ދުވަސް ފާހަގަކުރުމަށް ރޭ އެ ސްކޫލުގައި ބޭއްވި ރަސްމިއްޔާތެއްގައި މި ޖާޒީ ނީލަން ފައްޓަވައިދެއްވީ ކުޅުދުއްފުށީ ދިރާގު އޮޕަރޭޝަން ސެންޓަރގެ މެނޭޖަރ މުހައްމަދު ފާހިރެވެ.

މި އަހަރުގެ އޯޓިޒަން ހަފުތާ ކުޅުދުއްފުށީގައި ފާހަގަކުރާ ގޮތަށް ހަމަޖެހިފައިވާއިރު، އޯޓިޒަމް އެވެއަރނެސް ޑޭގެ ކައުންޓް ޑައުންް ފެށުމުގެ ގޮތުން އެންމެ ފުރަތަމަ ބޭއްވި މި ހަރަކަތުގާ މިޖާޒީ ނީލަން ފަށާފައިވަނީ 35000ރ. އިންނެވެ.

މި ރަސްމިއްޔާތުގާ ހދ އަތޮޅު ތައުލީމީ މަރުކަޒުގެ ޓީއަރުސީގެ ކޯޑިނޭޓަރ އަބުދުއްރަޝީދު ސައީދު ވިދާޅުވީ އޯޓިޒަމް އަކީ ބައްޔެއް ނޫން ކަމަށާއި އެއީ ނުކުޅެދުންތެރި ކަމެއް ކަމަށެވެ. އަދި އެފަދަ ފަރާތްތަކަކީ ވެސް މުޖުތަމައުގައިވާ ބައެއްކަން ފާހަގަކޮށް އެފަރާތްތަކަށް އެހީތެރިވެދިނުމަށް އެދިލެއްވި އެވެ.

ކޯޑިނޭޓަރ ވިދާޅުވީ، އުއްމީދަކީ ޤައުމި ޓީމުގެ ކެޕްޓަންގެ މިޖާޒީގެ ނީލަމުގެ އަގު މަސް ދުވަހުގެ ތެރޭގައި 1 މިލިއަން ރުފިޔާއަށް އެރުވުން ކަމަށާއި މިކަމުގައި ކުންފުނިތަކާއި އަމިއްލަ ފަރާތަކުން މިޖާޒީގެ އަގު 1 މިލިއަން ރުފިޔާއަށް އަރުވާ އެފަދަ ފަރާތަކަށް އެހީތެރިވެ ދިނުމަށް އޭނާ އެދިލެއްވި އެވެ.

އޭނާ ވިދާޅުވީ އޯޓިޒަމް ދުވަސް ފާހަގަ ކުރުމަށްޓަކައި ބޮޑު ފެސްޓިވަލެއް ބޭއްވުމަށް ގަސްދުކުރާ ކަމަށާއި ކުރިއަށް އޮތް މަސް ދުވަހުގެ ތެރޭގައި ބެލެނިވެރިންނާއި މުދައްރިސުންނަން އަމާޒު ކޮށްގެން ތަފާތު ތަމްރީނު ޕްރޮގުރާމުތައް ހިންގުމަށް ހަމަޖެހިފަވާ ކަމަށެވެ.

އަދި މިކަމުގައި އެހީތެރިވާ ހދ. ސެން ޔުނިޓާއި އިމާދުއްދީން ސްކޫލުގެ ސެން ޔުނިޓުގެ އިތުރުން ކެޕްޓަން އަލީ އަޝްފާގަށާއި އޭނާގެ ބޭބެ އަހުމަދު އަޝްފާނަން ޝުކުރުދެއްނެވި އެވެ.

މި އަހަރުގެ އޯޓިޒަމް ހަފުތާ ކުޅުދުއްފުށީގައި ފާހަގަކުރުމަށް ގިނަ ކަންތައްތަކެއް ވަނީ ރޭވިފައެވެ.