ހދ. އަތޮޅު ކައުންސިލުގެ ކުރީގެ ނައިބު ރައީސް ނަސްރުﷲ ޖުމުހޫރީ ޕާޓީ އަށް ސޮއިކޮށްފައިވަނީ 2 ލައްކަ ރުފިޔާ އަށް ކަމަށް ބުނާ އޯޑިއޯއެއް ލީކު ވެއްޖެ

ހދ އަތޮޅު ކައުންސިލުގެ ކުރީގެ ނައިބު ރައީސް އަދި ކުރިއަށް އޮތް މަޖިލިސް އިންތިހާބުގައި ކުޅުދުއްފުށީ އުތުރު ދާއިރާގެ ސަރުކާރު ކޯލިޝަންގެ ޓިކެޓުގައި ވާދަ ކުރައްވާ ނަސްރުﷲ އިސްމާއިލް މިދިޔަ ރިޔާސީ އިންތިހާބުގެ ތެރޭގައި ޖުމްހޫރީ ޕާޓީއަށް ސޮއި ކޮށްފައިވަނީ 2 ލައްކަ ރުފިޔާއަށް ކަމަށް ބުނާ އޯޑިއޯއެއް ސޯޝަލް މީޑިޔާގައި ލީކުކޮށްލައިފި އެވެ.

އެ އޯޑިއޯގައި ވާހަކަ ދައްކާފައިވާ ކަމަށް ބެލެވެނީ އެމްޕީއެލްގެ މެނޭޖަރ އަދި ކުރީގެ ކަތީބެއް ކަމަށްވާ އިބްރާހިމް ފަރުހޫދު އެވެ. ފަރުހޫދަކީ މި ފަހަރުގެ މަޖިލިސް އިންތިހާބުގައި ނަސްރުﷲ ވެސް ވާދަކުރައްވާ ކުޅުދުއްފުށީ އުތުރު ދާއިރާއަށް ނުކުންނަ ކެނޑިޑޭޓެކެވެ.

ޝޯޝަލް މީޑިއާގައި ލީކް ކޮށްލާފައިވާ އޯޑިއޯގައި، ފަރުހޫދު ވިދާޅުވެފައިވަނީ ނަސްރުﷲ ޖުމުހޫރީ ޕާޓީ އަށް ސޮއިކޮށްފައިވަނީ 2 ލައްކަ ރުފިޔާ އަށް ކަމަށާއި އެ ޑީލް ހަދާފައިވަނީ ވެސް ފަރުހޫދު ކަމަށެވެ. އަދި އެޑީލް ހަދާފައިވަނީ އެއްރޭ 2 ޖަހާއިރު ކުޅުދުއްފުށީ ފަޅުތެރޭގައި އޮތް ލޯންޗެއްގައި ކަމަށް ވެސް ލީކު ކޮށްލާފައިވާ އޯޑިއޯގަ ފަރުހޫދު ބުނެފައިވެ އެވެ.

“2 ލައްކަ ރުފިޔާ އަށް އޭނަ ޖުމުހޫރީ އަށް ދިޔައީ. އެޑީލް ހެދި މީހަކީ މަ. އެއްރޭ 2 ޖެހި އިރު އެތާ ލޯންޗަށް އަރުވައިގެން. އާދަމް ވަހީދާއެކު އެތާ ފަޅު ތެރޭގައި. މިކަން ދަންނާނެ މީހަކީ ޖާބިރު. ދޮގެއް ނަހަދަމޭ މަށެއް” ލީކު ކޮށްލާފައިވާ އޯޑިއޯގައި ފަރުހޫދު ވިދާޅުވާ އަޑު އިވެއެވެ.

އެ އޯޑިއޯގަ ބުނެފައިވަނީ ޑީލް ހެދި ރޭ އެ ލޯންޗުގައި އާދަމް ވަހީދު (ބޮޑަށް ބެލެވެނީ ހދ.އަތޮޅު ކައުންސިލުގެ ކުރީގެ މެމްބަރު އާދަމް ވަހީދު ކަމަށް) ވެސް އިންނެވި ކަމަށެވެ. އަދި އެކަން ޖާބިރު ކިޔާ މީހަކަ ވެސް އެގޭނެ ކަމަށް ފަރުހޫދު ވިދާޅުވެ އެވެ. މީގެ އިތުރުން ޖަގަހައެއްގެ ވާހަކަ ވެސް އެ އޯޑިއޯގައި ފަރުހޫދު ދައްކާފައިވާ އަޑު އިވެ އެވެ. ބެލެވޭ ގޮތުގައި އޯޑިއޯގައި ބުނާ ޖަގަހަ އަކީ ނަސްރުﷲ ކެމްޕެއިން ކުރުމަށް މިހާރު ހަދާފައިވާ ޖަގަހަ އެވެ.

“އެމްޑީޕީ އަށް ނަސްރުﷲ ދާން އެއްބަސް ނުވާހާ ހިނދަކު. އެޖަގަހަ އެއް ނުދޭނެ. އެނެގީ އެމްޑީޕީ ހަމަ ޒުވާނުން ނިކުމެގެން. ޒުވާނުން މަސައްކަތް ކޮށްގެން ކައުންސިލަށް ހޮވި ކުއްޖެއް”

ނަސްރުﷲ އިސްމާއިލް މިދިޔަ އަހަރުގެ އޮގަސްޓް މަހުގެ ފަހު ކޮޅުގައި ވަނީ އެމްޑީޕީ ދޫކުރައްވާ ޖުމްހޫރީ ޕާޓީއާ ގުޅިވަޑައިގެންފަ އެވެ. ނަސްރުﷲ ގެ އިތުރުން އޭރުގެ ކުޅުދުއްފުށީ ކައުންސިލުގެ ރައީސް އިބްރާހިމް ރަމީޒާއި ހދ. އަތޮޅު ކައުންސިލު މެމްބަރ އާދަމް ވަހީދު ވެސް ވަނީ ޖޭޕީއާ ގުޅިވަޑައިގެންފަ އެވެ.

މިކަމާ ގުޅޭގޮތުން ނަސްރުﷲ އަށް މި ނޫހުން ގުޅާލުމުން ވިދާޅުވީ، ފަރުހޫދަކީ ފިތުނަ އުފައްދަން މަސައްކަތްކުރައްވާ ބޭފުޅެއްކަމަށެވެ. އަދި އޯޑިއޯއާ ގުޅޭ ގޮތުން މައުލޫމާތު ސާފުކުރުމަށް އިތުރު މޯބައިލް ނަންބަރެއް ދެއްވާނެ ކަމަށެވެ.އެހެންނަމަވެސް ނަސްރު އިތުރު ނަންބަރެއް ދީފައެއް ނުވެ އެވެ. .

ލީކުކޮށްލާފައިވާ އޯޑިއޯގައި ވާހަކަ ދައްކާފައިވާ ކަމަށް ބެލެވޭ ފަރުހޫދު މި ނޫހަށް ވިދާޅުވީ، އެ އޯޑިއޯ އަދި އަޑުއައްސަވާފައި ނުވާ ކަމަށާއި އެހެންވެ އެކަމާ ބެހޭގޮތުން އެއްޗެއް ވިދާޅުވާން ނޭގޭ ކަމަށެވެ. އަދި ކެމްޕެއިންގެ ތެރޭގައި ފާޑުފާޑުގެ ވާހަކަ މީހުން ދައްކާނެ ކަމަށް ފަރުހޫދު ވިދާޅުވި އެވެ. ފަރުހޫދު ވިދާޅުވީ ނަސްރުއަކީ މިހާރުވެސް އެމްޑީޕީގެ މެމްބަރެއް ކަމަށާއި އަދިވެސް އެމްޑީޕީގެ ދަފުތަރުގައި ނަސްރުގެ ނަން އެބައޮތް ކަމަށެވެ.

އެމްބީސީ މަޖިލިސް ބަހުގައި ނަސްރުﷲ ވިދާޅުވެފައި ވަނީ އޭނާ އަކީ ކޮރަޕްޝަންގެ އެއްވެސް މުއާމަލާތެއް ހިންގާފައިނުވާ ސާފު މީހެއް ކަމަށެވެ.

ފަރުހޫދަކީ ކުރިން ރަށުގެ އިސްވެރިއެއްގެ ގޮތުގައި މަސައްކަތްކުރެއްވި އިރު ކޮރަޕްޝަންގެ މައްސަލަތަކެއް އޭނާގެ މައްޗަށް ތުހުމަތު ކުރެވިފައިވާ ބޭފުޅެކެވެ.