ޖަލާލުއްދީން ސްކޫލުގެ ބަޖެޓު މުހިއްބުއްދީން ސްކޫލުގެ ބަޖެޓަށްވުރެ މަދުވަނީ ޖަލާލުއްދީނުގައި ދަރިވަރުން މަދުވީމަ: ޣަފޫރު

ކުޅުދުއްފުށީގަ ހުންނަ ޖަލާލުއްދީން ސްކޫލަށް މިއަހަރު ސަރުކާރުން ދިން ބަޖެޓާއި އައްޑޫގަ ހުންނަ މުހިއްބުދީން ސްކޫލަށް ދިން ބަޖެޓާއި ތަފާތު ވެފައިވަނީ އެތަނުގެ ދަރިވަރުންގެ އަދަދު މުހިއްބުދީން ސްކޫލަށް ވުރެ މަދު ވުމުން ކަމަށް ކުޅުދުއްފުށީ އުތުރު ދާއިރާގެ މެމްބަރު އަދި ބަޖެޓު ދިރާސާކުރި ކޮމެޓީގެ މެމްބަރު އަބުދުލް ޣަފޫރު މޫސާ ވިދާޅުވެއްޖެ އެވެ.

ޣަފޫރު މިހެން ވިދާޅުވެފައި މި ވަނީ އެ ދެ ސްކޫލުގެ ބަޖެޓުގައި ބޮޑު ތަފާތުތަކެއް ހުރުމުން އެކަމާ ބެހޭގޮތުން ސޯޝަލް މީޑިޔާގައި ވާހަކަދެކެވެމުންދާ ދުވަސްވަރެއްގައި އެވެ.

ކުރިއަށް އޮތް މަޖިލިސް އިންތިހާބުގައި ވެސް ކުޅުދުއްފުށީ އުތުރު ދާއިރާއަށް ކުރިމަތިލައްވާފައިވާ ޣަފޫރު އަންގާރަ ދުވަހުގެ ރޭ ބޭއްވި ކެމްޕޭން ބައްދަލުވުމެއްގައި ވިދާޅުވީ ޖަލާލުއްދީން ސްކޫލުގެ ބަޖެޓާއި މުހިއްބުދީން ސްކޫލުގެ ބަޖެޓުގައި ބޮޑެތި ތަފާތުތަކެއް ހުރުމުން އެޑިކޭޝަން މިނިސްޓްރީއާ ސުވާލު ކުރެއްވި ކަމަށެވެ.

އޭނާ ވިދާޅުވީ މިނިސްޓްރީން ސްކޫލުތަކަށް ބަޖެޓް ދޫކުރަނީ އެތަނެއްގައި ކިޔަވާ ދަރިވަރުންގެ ނިސްބަތަށް ބަލައިގެން ކަމަށާއި އެގޮތުން މުހިއްބުދީން ސްކޫލުގައި 1082 ދަރިވަރުންނާއި 162 މުވައްޒަފުން މަސައްކަތް ކުރާ ކަމަށެވެ. ޖަލާލުއްދީން ސްކޫލުގައި ތިބެނީ 490 ދަރިވަރުނާއި 74 މުވައްޒަފުން ކަމަށް ޣަފޫރު ވިދާލުވި އެވެ.

 މުހިއްބުދީން ސްކޫލުގެ މި އަހަރުގެ ބަޖެޓަށް 25,502,422ރ. ދީފައިވާއިރު ޖަލާލުއްދީން ސްކޫލަށް ދީފައިވަނީ 10,131,927ރ. އެވެ.

މިކަމާ ގުޅިގެން ސޯޝަލް މީޑިޔާގައި ހިޔާލުފާޅުކޮށްފައިވާ ބައެއް ފަރާތްތަކުން ބުނެފައިވަނީ ޖަލާލުއްދީންގެ ބަޖެޓާއި މުހިއްބުއްދީންގެ ބަޖެޓުގައި ބޮޑު ތަފާތުތަކެއް ހުރިއިރު އެކަމާ ބެހޭގޮތުން ބަޖެޓު ކޮމެޓީ އާއި މާލިއްޔަތު ކޮމެޓީގައި ހިމެނިވަޑައިގަންނަވާ އަބްދުލް ޣަފޫރު މޫސާ އެއްވެސް ކަމެއް ކުރައްވާފައި ނުވާ ކަމަށެވެ.