މުސާރަ ނުލިބިގެން ޕްރީ ސްކޫލު ޓީޗަރުން ކުޅުދުއްފުށީ ކައުންސިލް އިދާރާ ދޮށަށް އެއްވެއްޖެ

ކުޅުދުއްފުށީގައި ހިންގާ ދެ ޕްރީ ސްކޫލު ކަމަށްވާ އިރުމަތި އަވަށު ޕްރީ ސްކޫލާއި އަމީރު އަމީން ސްކޫލުގެ ޓީޗަރުންނާއި އެ ދެ ސްކޫލުގެ އިދާރީ މުވައްޒަފުންނަށް މިދިޔަ މަހުގެ މުސާރަ ލިބިފައިނުވާ ކަމަށްބުނެ ރަށު ކައުންސިލު އިދާރާ ދޮށަށް އެއްވެއްޖެ އެވެ.

މިދިޔަ ފެބުރުއަރީ މަހުގެ މުސާރަ މިއަދާ ހަމައަށް ޖަމާ ކޮށްފައިނުވާތީ މިއަދު ހެދުނު 8:30 ގައި ކުޅުދުއްފުށީ ރަށު ކައުންސިލު ކައިރިއަށް އެއްވެ އެ މުވައްޒަފުން ކުރީ “ސުލްހަވެރި މުޒާހަރާއެއް” ކަމަށް ކުޅުދުއްފުށީ ކައުންސިލުން މައުލޫމާތު ދެއްވައެވެ.

ކުޅުދުއްފުށީ ކައުންސިލުގެ ރައީސް އަލީ މުހައްމަދު ވިދާޅުވީ ދިމާވި ހުރަސް ތަކަކާއެކު “ކުޑަކުޑަ މިސްޓޭކަކުން” ޕްރީ ސްކޫލުތަކުގެ މުވައްޒަފުންނަށް ދޭން ޖެހޭ މުސާރަ މިއަދު ހެނދުނާ ހަމައަށް ޖަމާނުކުރެވުނީ ކަމަށެވެ. އެހެންނަމަވެސް މިހާރު އެ މުވައްޒަފުންނަށް މުސާރަ ޖަމާކޮށްދީފައިވާނެ ކަމަށް ރައީސް ވިދާޅުވި އެވެ.

“އިދާރީ ގޮތުން ނިންމަން ޖެހޭ ޕްރޮސެސްތައް މިދިޔަ ބުރާސްފަތި ދުވަހަށް ނިންމަން ޖެހޭނެ. ދިމާވި ހުރަސްތަކެއްގެ ސަބަބުން އެ ޕްރޮސެސްތައް ނިމިފައިވަނީ މިއަދު. މިއަދު 2 ޖަހާއިރު ވާނީ މަސައްކަތްތައް ނިންމާ ޕްރީ ސްކޫލު ތަކަށް މުސާރަ ޖަމާކޮށްދީފަ” ކުޅުދުއްފުށީ ކައުންސިލުގެ ރައީސް އަލީ މުހައްމަދު ވިދާޅުވި އެވެ.

ކައުންސިލުގެ ރައީސް ވިދާޅުވީ ކައުންސިލުގެ މަސައްކަތްތައް ނިންމުމުގައި އެ އިދާރާގެ މުވައްޒަފުންގެ އެއްބާރުލުން ފުރިހަމައަށް ލިބޭ ކަމަށާއި އައު ކައުންސިލެއްގައި ގިރާ ކުރަން ހުރި މައްސަލަތަކެއް ހުންނާނެ ކަމަށެވެ.

މިކަމާ ބެހޭގޮތުން ޕްރީ ސްކޫލުތަކުގެ ބަހެއްވަނީ ލިބޭގޮތް ނުވެފައެވެ.