ކުޅުދުއްފުށީގައި އިމާރާތް ކޮށްފައިވާ ރޯހައުސްތަކަށް ކުރިމަތިލުމުގެ ފުރުސަތު އަންނަ ހޯމަ ދުވަހު ހުޅުވާލަނީ

ކުޅުދުއްފުށީގައި އިމާރާތް ކޮށްފައިވާ ރޯ ހައުސްތަކަށް އެދި ފޯމު ހުށަހެޅުމުގެ ފުރުޞަތު މާރޗް 17 ގައި ހުޅުވާލާނެ ކަމަށް ކުޅުދުއްފުށީ ކައުންސިލުން ހާމަކުރައްވައިފި އެވެ.

ކުޅުދުއްފުށީ ކައުންސިލަރު ޝައުފާ އިބްރާހިމް ހިލްމީ ވިދާޅުވީ ކުޅުދުއްފުށީގައި އިމާރަތްކޮށްފައިވާ ރޯހައުސްތައް ދޫކުރުމަށް މި މަހުގެ 17 ގައި އިއުލާނު ކުރާނެ ކަމަށެވެ. އޭނާ ވިދާޅުވީ ކުޅުދުއްފުށީގައި 166 ރޯހައުސް އިމާރާތް ކޮށްފައިވާއިރު އޭގެ ތެރެއިން ދެ ރޯހައުސްއެއް ފިޔަވައި އެހެން ހުރިހާ ގެ އެއް ދޫކުރުމަށް ހަމަޖެހިފައިވާ ކަމަށެވެ.

“ކުޅުދުއްފުށީގައި 166 ރޯހައުސް އިމާރާތް ކޮށްފައިވާއިރު އޭގެ ތެރެއިން ދެ ރޯހައުސް އެއް ފިޔަވައި އެހެން ހުރިހާ ގެ އެއް ދޫކުރުމަށް ވަނީ ހަމަޖެހިފައި. އެދެ ރޯހައުސްގައި ދިރިއުޅެމުންދަނީ ޅ. މާފިލާފުށިން ކުޅުދުއްފުއްޓަށް ބަދަލުވެފައިވާ ދެ އާއިލާ.” ކައުންސިލް މެންބަރު ޝައުފާ ވިދާޅުވި އެވެ.

ރޯހައުސް އަށް އެދޭ ފޯމު މި މަހުގެ 17 އިން ފެށިގެން އޭޕްރިލް މަހުގެ 17ގެ ނިޔަލަށް ކުޅުދުއްފުށީ ކައުންސިލު އިދާރާއިން ލިބެން ހުންނާނެ ކަމަށް ކައުންސިލުން މައުލޫމާތު ދެއެވެ. އަދި 23 މާރޗުން 24 އޭޕްރިލްގެ އޮފީސް ބަންދުވަންދެން ރޯހައުސް އަށް އެދޭ ފޯމު ހުށަހެޅޭނެކަމަށް ވެސް ކައުންސިލުން ހާމަ ކުރެއްވި އެވެ.

ފޯމުތައް ހުށަހަޅާ ނިމުމުން ވަރަށް އަވަހަށް ރޯހައުސްތައް ދޫކުރަން ފަށާނެ ކަމަށާއި މިކަމަށްޓަކައި 3 ކައުންސިލަރުން އަދި 2 ސިވިލް ސާރވިސް މުވައްޒަފުންގެ ކޮމިޓީއެއް ހަމަޖައްސާނެ ކަމަށް ކައުންސިލުން މައުލޫމާތު ދެއްވި އެވެ.

އެ ކޮމެޓީގައި ހިމެނިވަޑައިގަންނަވާ ކައުންސިލަރުންނަކީ އިބްރާހިމް ރަޝީދު، އަލީ ހާޝިމް އަދި އިބްރާހިމް އައްބާސް އެވެ. ސިވިލް ސާވިސްއިން ބޭފުޅުން އަދި އެ ކޮމެޓީއަށް ހަމަޖައްސާފައެއް ނުވެއެވެ.

ކުޅުދުއްފުށީގެ ރޯހައުސް ދޫކުރަން ހަމަޖެހިފައިވަނީ ރަށުންނާއި ރަށުން ބޭރު މީހުންނަށެވެ. 60 އިންސައްތަ ރަށުގެ މީހުންނަށް ދޫކުރުމަށް ހަމަޖެހިފައިވާއިރު 40 އިންސައްތަ ރަށުން ބޭރުމީހުންނަށް ދޫކުރުމަށް ހަމަޖެހިފައިވާ ކަމަށް ވެސް ކައުންސިލުން މައުލޫމާތު ދެއެވެ.

ކުޅުދުއްފުށިން ރޯހައުސް ދިނުމަށް ހަމަޖެހިފައިވާއިރު ރަށުގައި އިމާރާތްކޮށްފައިވާ ފްލެޓްތައް ދޫކުރާނެ ވަކި ތާރީހެއް އިއުލާނުކޮށްފައެއް ނުވެއެވެ.

ރޯހައުސްތަކުގެގެ ޑައުން ޕޭމެންޓާއި މަހުން މަހަށް ދައްކަންޖެހޭ އިންސްޓޯލްމަންޓް ސަރުކާރުން ދާދިފަހުން ވަނީ ކުޑަކޮށްފައެވެ. ޑަައުން ޕޭމެންޓުގެ ގޮތުގައި މިހާރު ދައްކަންޖެހެނީ 19000ރ. އެވެ. އަދި އިންސްޓޯލްމެންޓުގެ ގޮތުގައި މަހަކު ދައްކަން ޖެހެނީ 3000ރ އެވެ.