ކުޅުދުއްފުށީ އައިޕީއެސް ސްކޫލުގެ 6 ވަނަ އަހަރީ ދުވަސް ފާހަގަކުރުމުގެ ހަރަކާތްތައް ފަށައިފި

ކުޅުދުއްފުށީ އިރުމަތި އަވަށު ޕްރީ ސްކޫލް (އައިޕީއެސް)ގެ ހަވަނަ އަހަރީ ދުވަސް ފާހަގަ ކުރަމަށް ކުރިއަށް ގެންދާ ހަރަކާތްތައް އެ ސްކޫލުގައި ފަށައިފި އެވެ.

ކުޅުދުއްފުށީގައި ދެވަނައަށް ހުޅުވި ޕްރީ ސްކޫލުކަމަށްވާ އައިޕީއެސްގެ އަހަރީ ދުވަސް ފާހަގަ ކުރުމުގެ ގޮތުން އެލްކޭޖީ، ޔޫކޭޖީ ދަރިވަރުންނާއި ސްކޫލުގެ މުވައްޒަފުން އަދި ސްކޫލު ބޯޑާއި ޕީޓީއޭ ބައިވެރިވެގެން މިއަދު ހެދުނު ހާއްސަ އެސެންބްލީއެއް ބާއްވާފައިވާ ކަމަށް އެސްކޫލުން މައުލޫމާތު ދެއެވެ.

މި އެސެންބްލީގައި ސްކޫލަށް އެންމެ ގިނަ ދުވަހު ހިދުމަތް ކޮށްދެއްވާފައިވާ ދެ މުވައްޒަފުންނަށް ހާއްސަ އެވޯޑެއް ދީފަ އެވެ. އެ އެވޯޑު ހަވާލުކޮށްދެއްވާފައިވަނީ އެސެމްބްލީގެ ޝަރަފުވެރި މެހެމާނު އިރުމަތި އަވަށު ކޮމިޓީ މެންބަރު އަބްދުލް މުހައިމިނެވެ. އެވޯޑު ލިބިފައިވަނީ އައިޝަތު އިސްމާއިލް އާއި ޝަރީފާ ގާސިމަށެވެ.

މީގެ އިތުރުން މި ރަސްމިއްޔާތުގައި ކޭކު ފެޅުން ވެސް އޮތެވެ. އަދި އެސެންބްލީއަށްފަހު އެލްކޭޖީގެ ދަރިވަރުން ސްކޫލުގެ ދިދަ އަދި ޔޫކޭޖީގެ ދަރިވަރުން ސްކޫލުގެ ބެޖް ކޮލާޖް ކޮށްފަ އެވެ.

ސްކޫލުގެ އަހަރީ ދުވަހުގެ މުނާސަބަތުގައި މިއަދު ސްކޫލުގެ ކޮންމެ ދަރިވަރަކަށް އައިސް ކޯނަކާއި ކެޕެއް ދިނުމަށް ހަމަޖެހިފައިވާ ކަމަށާއި މިއަދު ހަވީރު ސްކޫލުގެ ގޯތި ތެރޭގައި ބެލެނިވެރިންނާއި ސްކޫލުގެ މުވައްޒަފުންގެ ސްޕޯޓްސް މީޓެއް ބޭއްވުމަށް ހަމަޖެހިފައިވާ ކަމަށްވެސް އެ ސްކޫލުން މައުލޫމާތު ދެއެވެ. އަދި މާދަމާ ސްކޫލުގެ މުވައްޒަފުންނާއި ކުޅުދުއްފުށީ ހޮސްޕިޓަލުގެ މުވައްޒަފުންނާ ދެމެދު ރަހުމަތްތެރި ކަމުގެ ފުޓުބޯޅަ މެޗެއް ކުޅުމަށް ވަނީ ހަމަޖެހިފަ އެވެ.

އައިޕީއެސްގައި މިހާރު ޖުމުލަ 400 ދަރިވަރުން ތައުލީމު ހާސިލު ކުރަމުން އަންނައިރު 28 މުވައްޒަފުން އެ ސްކޫލުގައި ވަޒީފާ އަދާކުރަމުން ދެ އެވެ.