ބާރު ސްޕީޑްގައި ދުއްވާފައި ދިޔަ ސައިކަލެއް ކާރެއްގައި ޖެހި އެކްސިޑެންޓް ވެއްޖެ

ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލް ނުކުރެވިގެން ކާރެއްގައި ޖެހި އެކްސިޑެންޓް ވެއްޖެ އެވެ.

މިއަދު މެންދުރު 2 ޖަހާ އިރު ކުޅުދުއްފުށީ ލޯކަލް ބަނދަރު ސަރަހައްދުގައި ހިނގި މި އެކްސިޑެންޓުގައި މާ ބޮޑު އަނިޔާ އެއްވެސް ފަރާތަކަށް ނުވެ އެވެ.

މިހާދިސާގައި ސައިކަލު ދުއްވަން އިނީ ކުޅުދުއްފުށީ ޕެންޓަގަން، އަހުމަދު ހަސަން (22) އެވެ. އަދި ޓެކްސީ ދުއްވަން އިނީ ކުޅުދުއްފުށީ، ރިޔާ، އިބުރާހިމް ހަސަން (47) އެވެ.

މަންޒަރު ދުއް މީހަކު ކުޅުދުއްފުށި އޮންލައިނާ ވާހަކަ ދައްކަމުން ބުނީ ކާރާއި ސައިކަލް މުޑި އަރާފައި ވަނީ ކުޅުދުއްފުށީ ލޯކަލް ބަނދަރު ސަރައްހައްދުގައި އިމާރާތް ކުރަމުން އަންނަ މަސްޖިދިލް ފިރުދައުސް ކައިރީން އުތުރުން ދެކުނަށް ބާރު ސްޕީޑްގައި ދުއްވާފަ ދިޔަ ސައިކަލެއް ކޮންޓުރޯލް ނުކުރެވިގެން މިސްކިތުގެ އުތުރު ފަރާތު މަގުން ބަނދަރަށް ނުކުތް ޓެކްސީ އަކާ ޖެހި ގެން ކަމަށެވެ.

މި އެކްސިޑެންޓްގެ ސަބަބުން ޓެކްސީގެ ވާތްފަރާތު ކުރިމަތި ދޮރަށާއި އެފަރާތު ލޯގަނޑަށް އެކި ވަރުގެ ގެއްލުން ވެފަވާ އިރު ސައިކަލަށް ވެސް ވަނީ ގެއްލުން ވެފަ އެވެ.

މިމައްސަލަ މިހާރު ދަނީ ފުލުހުން ތަހްގީގު ކުރަމުން ނެވެ.