ބޮޑުތިލަދުންމަތީގެ އަޣުލަބިއްޔަތު ސަރުކާރު ކޯލިޝަނަށް!

އިއްޔެ ބޭއްވި ރައްޔިތުންގެ މަޖިލީހުގެ އިންތިހާބުގައި މިހާތަނަން ގުނާ ނިމުނު ވޯޓު ފޮށިތަކުގެ ވަގުތީ ނަތީޖާ ދައްކާ ގޮތުން ބޮޑު ތިލަދުންމަތީގެ އަޣުލަބިއްޔަތު ސަރުކާރު ހިންގާ ޕްރޮގްރެސިވް ކޯލިޝަނުން ހޯދައިފި އެވެ.

ބޮޑުތިލަދުންމަތީގައި ހިމެނޭ ޖުމްލަ 15 ދާއިރާގެ ތެރެއިން ވަގުތީ ނަތީޖާ ދައްކާގޮތުން ސަރުކާރު ކޯލިޝަނަށް 9 ދާއިރާއެއް ވަނީ ލިބިފައެވެ. އެމްޑީޕީއަށް ލިބިފައިވަނީ 4 ދާއިރާއެކެވެ. އަމިއްލަ ގޮތުން ވާދަކުރެއްވި ކެނޑިޑޭޓަކު އެއް ދާއިރާގެ ގޮނޑި ކާމިޔާބު ކޮށްފައިވާއިރު 1 ގޮނޑި އަދާލަތު ޕާޓީންވެސް ކާމިޔާބު ކޮށްފައި ވެއެވެ.

ބޮޑުތިލަދުންމަތީގައި ހިމެނޭ ހއ އަތޮޅުގެ 5 ދާއިރާއިން މިހާތަނަށް ގުނާ ނިމުނު ފޮށިތަކުގެ ވަގުތީ ނަތީޖާގައި މެޖޯރިޓީ ހޯދާފައިވަނީ ސަރުކާރު ކޯލިޝަނުންނެވެ. ހއ އަތޮޅުގެ އެންމެ ގޮނޑިއެއްވެސް އެމްޑީޕީއަށް ލިބިފައިނުވާކަން ފާހަގަ ކޮށްލެވެއެވެ.

އެގޮތުން ހއ. ހޯރަފުށީ ދާއިރާއިން އެންމެ ކުރީގައި އުޅެނީ އެމްޑީއޭގެ ކެނޑިޑޭޓު މުހައްމަދު އިސްމާއީލެވެ. އެއީ 1351 ވޯޓުންނެވެ. އެނައާ އެންމެ ގާތުން އެ ދާއިރާއަށް ވާދަކުރެއްވި އެމްޑީޕީގެ ކެނޑިޑޭޓު އަހުމަދު ސަލީމް (ސައްލެ) އަށް އަދި ލިބިފައިވަނީ 1297 ވޯޓެވެ.

އިހަވަންދޫ ދާއިރާއިން އެންމެ ކުރީގައި އުޅެނީ ޖޭޕީގެ ކެނޑިޑޭޓު މުހައްމަދު އަބުދުﷲ (މުހައްމާ) އެވެ. އެއީ 1166 ވޯޓެވެ. އޭނައާ އެންމެ ގާތުން ވާދަކުރައްވާ ކުރީގެ ވެސް އިހަވަންދޫ ދާއިރާގެ މެމްބަރު އަހުމަދު އަބުދުﷲ އަށް އަދި ލިބިފައިވަނީ 976 ވޯޓެވެ.

ހއ އަތޮޅުގެ ބާރަށު ދާއިރާގެ މިހާތަނަން ގުނައި، ނަތީޖާ އިއުލާނު ކުރި ފޮށިތަކުން ދައްކާ ގޮތުން އެ ދާއިރާގެ މިހާރުގެ މެމްބަރު މުހައްމަދު ޝިފާޒަށް ވަނީ 1210 ވޯޓާ އެކު ގޮނޑި ގެއްލިފަ އެވެ. އެ ދާއިރާއިން ގޮނޑި ކާމިޔާބު ކޮށްފައިވަނީ 1779 ވޯޓާއެކު ޕީޕީއެމް ކެނޑިޑޭޓު އިބްރާހީމް ސުޖާއު އެވެ.

ދިއްދޫ ދާއިރާގެ ވަގުތީ ނަތީޖާ ދައްކާ ގޮތުން 868 ވޯޓާއެކު އެންމެ ކުރީގައި އުޅެނީ އަމިއްލަ ކެނޑިޑޭޓު އަބްދުއް ލަތީފު މުހައްމަދެވެ. ދެވަނަގައި އެ ދާއިރާއިން އުޅެނީ 723 ވޯޓާއެކު އެމްޑީޕީގެ ކެނޑިޑޭޓު މުހައްމަދު ހާޝިމެވެ. ކެލާ ދާއިރާއިން 731 ވޯޓު ހޯދާއިގެން ކުރީގަ އުޅެނީ މިހާރުގެ ވައިކަރަދޫ ދާއިރާގެ މެމްބަރު އަލީ އާރިފެވެ. ދެވަނައިގައި އުޅެނީ އެމްޑީޕީގެ ކެނޑިޑޭޓު އިބުރާހިމް ޝަރީފެވެ. އެއީ 503 ވޯޓުނެވެ.

ބޮޑުތިލަދުންމަތީގެ އެންމެ އާބާދީ ބޮޑު ހދ އަތޮޅަށް ބަލާލާއިރު، ސަރުކާރު ކޯލިޝަނަށް 2 ގޮނޑި ލިބިފައިވާއިރު އަދާލަތު ޕާޓީއަށް އެއް ގޮނޑި ލިބިފައި ވެއެވެ. އަދި ވަރަށް ހަނިގޮތަކަށް އެމްޑީޕީއަށް 3 ގޮނޑި ހދ އަތޮޅުން ލިބިފައިވެ އެވެ.

އެމްޑީޕީއަށް ހދ އަތޮޅުން ލިބިފައިވާ ދާއިރާތަކުގެ ތެރޭގައި ކުޅުދުއްފުށީ އުތުރު ދާއިރާ އާއި ނޮޅިވަރަމް ދާއިރާ އަދި ވައިކަރަދޫ ދާއިރާ ހިމެނެއެވެ.

ކުޅުދުއްފުށީ އުތުރު ދާއިރާގެ އެމްޑީޕީ ކެނޑިޑޭޓު އަބުދުލް ޣަފޫރު މޫސާއަށް 1038 ވޯޓު ލިބިފައިވާ އިރު ޕީޕީއެމް ކޯލިޝަނުގެ ކެނޑިޑޭޓު ނަސްރުﷲ އިސްމާއިލަށް 1023 ވޯޓު ވަނީ ލިބިފައެވެ.

ނޮޅިވަރަމް ދާއިރާގެ އެމްޑީޕީ ކެނޑިޑޭޓު 461 ވޯޓާ އެކު ކުރީގަ އުޅޭ އިރު ކޯލިޝަނުގެ ޖޭޕީ ކެނޑިޑޭޓު ހުސެއިން އަރީފް އުޅެނީ އެމްޑީޕީ ކެނޑިޑޭޓަށް ވުރެ އެންމެ 10 ވޯޓުގެ ތަފާތަކުން ދަށުގައި އެވެ.

ހދ އަތޮޅުގެ ވައިކަރަދޫ ދާއިރާގެ އެމްޑީޕީގެ ކެނޑިޑޭޓު މުހައްމަދު ނާޒިމް 628 ވޯޓާއެކު ކުރީގައި އުޅޭއިރު ކޯލިޝަނުގެ ޖޭޕީ ކެނޑިޑޭޓު އިގްބާލު އާދަމް ލިބިފައިވަނީ 615 ވޯޓެވެ.

ސަރުކާރު ހިންގާ ކޯލިޝަނަން ހދ އަތޮޅުން ލިބިފައިވާ 3 ގޮނޑި ވަނީ ދާދި ކަށަވަރުވެފަ އެވެ. އެއީ ކުޅުދުއްފުށީ ދެކުނު ދާއިރާގެ ގޮނޑި އާއި މަކުނުދޫ ދާއިރާގެ ގޮނޑި އަދި ހަނިމާދޫ ދާއިރާގެ ގޮނޑި އެވެ.

ކުޅުދުއްފުށީ ދެކުނު ދާއިރާގެ މިހާރުގެ ވެސް މެމްބަރު މުހައްމަދު ނަޝީދު ވަނީ 823 ވޯޓާއެކު ގޮނޑި ދިފާއު ކޮށްފަ އެވެ. އޭނައާ އެންމެ ގާތުން ވާދަ ކުރި އެމްޑީޕީގެ ކެނޑިޑޭޓު އައިޝަތު ލީޝާއަށް ވަގުތީ ނަތީޖާ ދައްކާ ގޮތުން ލިބިފައިވަނީ 760 ވޯޓެވެ.

ހަނިމާދޫ ދާއިރާގެ ކޯލިޝަނުގެ ޖޭޕީ ގޮނޑި ވެސް ވަނީ ކަށަވަރު ވެފަ އެވެ. ޖޭޕީގެ ކެނޑިޑޭޓު ހުސެއިން ޝައުދީ 690 ވޯޓު މިހާތަނަން ލިބިފައިވާ އިރު އޭނަ އާއި އެންމެ ގާތުން ވާދަކުރައްވާ ކެނޑިޑޭޓު ރައީސް ވަހީދުގެ ކޮއްކޮ އިފްހާމް ހުސެއިން އަށް ލިބިފައިވަނީ 487 ވޯޓެވެ.

މަކުނުދޫ ދާއިރާގެ ގޮނޑި އަދާލަތުގެ ކެނޑިޑޭޓު އަނާރާ ނައީމަށް ކަށަވަރު ވެފައިވާއިރު އޭނައަށް މިހާތަނަން ލިބިފައިވަނީ 964 ވޯޓެވެ. އެންމެ ގާތުން ވާދަ ކުރާ އެމްޑީޕީގެ ކެނޑިޑޭޓު އަލީ ގާސިމަށް ލިބިފައިވަނީ 487 ވޯޓެވެ.

ށ އަތޮޅުގެ ހަތަރު ދާއިރާއިން 13 ކެނޑިޑޭޓުން ވާދަ ކުރިއިރު، މިހާތަނަށް ވަގުތީ ނަތީޖާއިން ދައްކާގޮތުން ސަރުކާރު ހިންގާ ކޯލިޝަނަށް އެ އަތޮޅުގެ ތިން ދާއިރާގެ ގޮނޑިއެއްވަނީ ކަށަވަރު ވެފައެވެ. އެ އަތޮޅުން އެމްޑީޕީއަށް ކަށަވަރުވެފައިވަނީ ކޮމަންޑޫ ދާއިރާގެ ގޮނޑި އެވެ. އެ ދާއިރާއިން ވާދަކުރި އެމްޑީޕީ ކެނޑިޑޭޓު އަހުމަދު ނާޝިދު (އޭޑީކޭ ނާޝިދު)އަށް ލިބިފައިވަނީ 1059 ވޯޓެވެ. އޭނާއާ އެންމެ ގާތްކުރި ޕީޕީއެމް ކޯލިޝަންގެ ޖޭޕީގެ ކެނޑިޑޭޓް ނަހުލާ އަލީއަށް ލިބިފައިވަނީ 611 ވޯޓެވެ.

ކަނޑިތީމު ދާއިރާއިން ޖޭޕީގެ ކެނޑިޑޭޓު މުހައްމަދު ހުސެއިން 1090 ވޯޓާއެކު ކުރީގައި އުޅޭއިރު އެމްޑީޕީގެ ކެނޑިޑޭޓް އަހުމަދު އާތިފް އަށް ލިބިފައިވަނީ 757 ވޯޓެވެ.

މިލަންދޫ ދާއިރާއިން ޖޭޕީގެ ކެނޑިޑޭޓް ހަސަން މުފީދު 1095 ވޯޓާއެކު ކުރީގައި އުޅޭއިރު އޭނާއާ އެންމެ ވާދަކުރާ އެދާއިރާގެ މިހާރުގެ މެންބަރު އަލީ ރިޒާއަށް ލިބިފައިވަނީ 1085 ވޯޓެވެ.

ފުނަދޫ ދާއިރާއިން މިހާރުގެ ވެސް އެ ދާއިރާގެ މެންބަރު އަލީ ސަލީމް 888 ވޯޓާއެކު ކުރީގައި އުޅޭއިރު އެމްޑީޕީގެ ކެނޑިޑޭޓް އައްބާސް މުހައްމަދަށް އަދި ލިބިފައިވަނީ 786 ވޯޓެވެ.

މި ނަތީޖާތަކަކީ ވަގުތީ ނަތީޖާތަކަކަށް ވާތީ މި ނަތީޖާތަކަށް ބަދަލު އައުމަކީ އެކަށީގެންވާ ކަމެކެވެ. ބޮޑުތިލަދުންމަތީގެ މެޖޯރިޓީ ކުރިން އޮންނަނީ އެމްޑީޕީއަށް ކަމުގައި ވީނަމަވެސް މި ފަހަރުގެ އިންތިހާބުގައި ޕީޕީއެމް އާއި ޖުމުހޫރީ ޕާޓީން ގިނަ ގޮނޑިތަކެއް ވަނީ ކާމިޔާބު ކޮށްފައެވެ.