މިއަހަރުވެސް ކުޅުދުއްފުށީގައި އާރތް އަވާރ ކުލަގަދަކޮށް ފާހަގަކުރަނީ

އަރތް އަވާރ އަކީ ކަރަންޓަށް ކުރާ ހޭދަ ކުޑަކުރުމަށްޓަކާ ރައްޔިތުން ހޭލުންތެރި ކުރުމުގެ ގޮތުން ވޯލްޑް ވައިލްޑް ލައިފް ފަންޑާއި އާރތް އަވާރ ފައުންޑޭޝަނާ ގުޅިގެން ކޮންމެ އަހަރަކު ބާއްވަމުން އަންނަ ހަރަކާތެކެވެ.

މިއަހަރުވެސް ކުޅުދުއްފުށީގައި އާރތް އަވާރ ކުލަގަދަކޮށް ފާހަގަ ކުރަން ނިންމާފައިވާ ކަމަށް ކުޅުދުއްފުށީގައި މިހަރަކާތް ހިންގަން އިސްކޮށް އުޅުއްވާ އާރތް އަވާރ ފައުންޑޭޝަންގެ ކުޅުދުއްފުށީގައި ހުންނަ ކޯޑިނޭޓަރު އިހުސާނު އަހުމަދު މައުލޫމާތުދެ އެވެ.

އިހުސާން ވިދާޅުވީ މިމަހުގެ 29 ވަނަ ދުވަހުގެ ރޭ 8:30 ން 9:30 ށް އާރތް އަވާރގެ ހަރަކާތްތައް ހިއްކި ސަރަހައްދުގައިި ކުރިޔަށް ގެންދިއުމަށް ހަމަޖެހިފައިވާ ކަމަށެވެ. އެގޮތުން މިއަހަރު ވެސް މިސްގާލްގެ ބޮޑުބެރު ހަރަކާތްތައް އެސަރަހައްދުން ފެނިގެން ދާނެ ކަމަށް އޭނާ ވިދާޅުވި އެވެ.

ކޯޑިނޭޓަރ އިހުސާން ވިދާޅުވީ މިއަހަރު އާރތް އަވާރ ފާހަގަ ކުރުމުގެ ގޮތުން ޕްރޮމޯޝަނަލް ހަރަކާތްތައް ބުރާސްފަތި ދުވަހުން ފެށިގެންދާނެ ކަމަށެވެ. އެގޮތުން ބުރާސްފަތި ދުވަހު ހަވީރު އާރތް އަވާރ ފާހަގަކުރުމަށް ހޭލުންތެރި ކުރުމުގެ ގޮތުން ހިނގާލުމެއް ބާއްވަން ހަމަޖެހިފައިވާ ކަމަށް އޭނާ މައުލޫމާތު ދެއްވި އެވެ.

ކުޅުދުއްފުށީގެ ކުރީގެ ފުޓުބޯޅަ ކުޅުންތެރިންނާއި ޒުވާން ކުޅުންތެރިންގެ މެދުގައި މިމަހު 28 ވަނަ ދުވަހު އާރތް އަވާރ ޕްރޮމޯޝަނަލް މެޗެއް ކުޅުމަށް ހަމަޖެހިފައިވާ ކަމަށް އެފަރާތުން މައުލޫމާތު ދެއެވެ.

ހޮނިހިރު ދުވަހުގެ ރޭ އާރތް އަވާރ ފާހަގަ ކުރާ އެއްގަޑިއިރުގެ ތެރޭގައި ވީހާވެސް މަދުން ކަރަންޓު ބޭނުން ކުރުމަށް އެފަރާތުން އިލްތިމާސް ކުރެ އެވެ.

މިދިޔަ އަހަރު އާރތް އަވާރ ފާހަގަ ކުރުމުގެ ގޮތުން ކުޅުދުއްފުށީގައި ހިންގި ހަރަކާތަށް ގިނަ ބައެއްގެ ފަރާތުން ބޮޑު ތަރުހީބެއް ލިބިފައިވެ އެވެ. އަދި އެ އެއްގަޑިއިރުގެ ތެރޭގައި އާއްމުކޮށް ކަރަންޓު ބޭނުންކުރާ ވަރަށްވުރެ 89 ކިލޯވޯޓުގެ ކަރަންޓު ދަށްކުރެވިފައިވެ އެވެ.