މި ވަގުތު އެންމެ އިސްކަމެއް ދެނީ ކައުންސިލް އިދާރާގެ ހިންގުން ހަރުދަނާކުރުމަށް: ކުޅުދުއްފުށީ ކައުންސިލް

މި ވަގުތު އެންމެ އިސްކަމެއް ދީގެން ކުރަމުން އަންނަނީ ކުޅުދުއްފުށީ ކައުންސިލް އިދާރާގެ އޮނިގަނޑަށް ގެންނަންޖެހޭ ބަދަލުތައް ގެނެސް އެ އިދާރާގެ ހިންގުން ހަރުދަނާ ކުރުމުގެ މަސައްކަތް ކަމަށް ކުޅުދުއްފުށީ ކައުންސިލުގެ ރައީސް އަލީ މުހައްމަދު ވިދާޅުވެއްޖެ އެވެ.

ކައުންސިލް ރައީސް އަލީ މުހައްމަދު “ކުޅުދުއްފުށި އޮންލައިން” އަށް މައުލޫމާތު ދެއްވަމުން ވިދާޅުވީ ކައުންސިލް އިދާރާގެ އޮނިގަނޑު ރަނގަޅުކޮށް ޒިންމާދާރުކުރުވުމަށް އެ އިދާރާގެ މުވައްޒަފުންނާ މަޝްވަރާ ކުރަމުން އަންނަ ކަމަށެވެ.

ރައީސް ވިދާޅުވީ އަންނަ މަހުގެ ފުރަތަމަ ހަފުތާގެ ތެރޭގައި ކުޅުދުއްފުށީގެ އާންމު ރައްޔިތުންނާ ބައްދަލުކުރުމަށް މަސައްކަތް ކުރައްވަމުން އަންނަ ކަމަށެވެ.

” މިއަންނަ އޭޕްރިލް މަހުގެ ފުރަތަމަ ހަފުތާގެ ތެރޭގައި ރައްޔިތުންނާ ބައްދަލުކުރަން ވަރަށް ބޮޑަށް މަސައްކަތް ކުރާނަން” ކައުންސިލުގެ ރައީސް ވިދާޅުވި އެވެ.

ކުޅުދުއްފުށީގައި އަލަށް އިންތިހާބުކުރި ކައުންސިލުގެ އިދާރީ މަސައްކަތްތައް ކުރަމުން އަންނައިރު، އަލަށް އިންތިހާބުވި އަތޮޅު ކައުންސިލުން އަތޮޅުގެ ރަށްރަށަށް ޒިޔާރަތްކުރުމުގެ ޕްރޮގްރާމެއް ވަނީ ފަށާފައެވެ.