ކުޅުދުއްފުއްޓަށް ކަރަންޓް ދިނުމަށް ބޭނުންކުރާ އެންމެ ބޮޑު އިންޖީނަށް ދިމާވި މައްސަލައަކާ ގުޅިެން އެކި ސަރަހައްދުތަކުން ކަރަންޓު ކަނޑަނީ

ކުޅުދުއްފުށީގައި ކަރަންޓު ދިނުމަށް ބޭނުންކުރާ އެންމެ ބޮޑު އިންޖީނުގެ ބަޔަކަށް މައްސަލަ ދިމާވުމާ ގުޅިގެން ރަށުގެ އެކި ސަރަހައްދުތަކުން ކަރަންޓު ކަނޑަމުން އެބަގެންދެއެވެ.

1 މެގަ ވޯޓުގެ މި އިންޖީނަށް މައްސަލައެއް ދިމާވުމާ ގުޅިގެން ރަށަށް ބޭނުންވާ މިންވަރަށް ކަރަންޓު ނުދެވޭތީ މިހާރުވެސް ރަށުގެ އެކި ސަރަހައްދުތަކުން އަންނަނީ ކަރަންޓު ކަނޑަމުންނެވެ.

ކުޅުދުއްފުށީގައި ކަރަންޓުގެ ހިދުމަތް ދެމުން އަންނަ ފެނަކަ ކޯޕަރޭޝަންގެ ރީޖަނަލް މެނޭޖަރު ވިދާޅުވީ އިންޖީނުގެ ފޭންއަށް ދިމާވި މައްސަލައެއްގެ ސަބަބުން ރަށުން “ޑިމާންޑު” ކުރާ ވަރަށް ކަރަންޓު ނުއުފެއްދޭތީ އެކި ސަރަހައްދުތަކުން ކަރަންޓު ކަނޑަމުންދާ ކަމަށެވެ. އަދި މިހާރުވަނީ އެ އިންޖީނުގެ ފޭންއެއް ގެނައުމުގެ މަގުމަތީގައި ކަމަށްވެސް އޭނާ ވިދާޅުވި އެވެ.

އިންޖީނުގެ ފޭން ލިބުމުން އެ ޖެނެރޭޓަރު މަރާމާތުކުރުމުގެ މަސައްކަތް މިއަދުގެ ހަވީރުގެ ވަގުތެއްގައި ނިމޭނެ ކަމަށް އޭނާ ވިދާޅުވި އެވެ.

ކުޅުދުއްފުށީގައި ބޭނުންކުރާ އެންމެ ބޮޑު އިންޖީނަށް މައްސަލަ ދިމާވި ފަހުން އިންޖީނުގޭގެ 1 ނަންބަރު ޓްރާންސްފޯމަރ އަށްވެސް މިހާރު ވަނީ މައްސަލަތަކެއް ދިމާވެފައި ކަމަށް މި ނޫހަށް ވަނީ އެނގިފައެވެ.

1100 ވޯޓުގެ މި ޓްރާންސްފޯމަރ އަށް ދިމާވެފައިވާ މައްސަލަތައް ހައްލުކުރުމަށް ވަގުތު ނަގާނެ ކަމަށާއި އިންޖީނުގޭގެ ހުރިހާ އޮފިޝަލުން މިހާރު އެ މަސައްކަތުގައި އުޅޭ ކަމަށް އާދަމް މުހައްމަދު ވިދާޅުވި އެވެ.

އަދި ކަރަންޓުގެ ހިދުމަތް ފުރިހަމައަަށް ފޯރުކޮށްދެވޭނީ ކޮންވަގުތެއްގައިކަން ދަންނަވަން ނޭނގޭ ކަމަށް އޭނާ ވިދާޅުވި އެވެ.

ކުޅުދުއްފުއްޓަށް ކަރަންޓުގެ ހިދުމަތް ދިނުމަށް މިހާރު ބޭނުންކުރަނީ 600 ކިލޯވޯޓުގެ އިންޖީނަކާއި 640 ކިލޯވޯޓުގެ އިންޖީނެއްގެ އިތުރުން 1 މެގަވޯޓުގެ އިންޖީނެކެވެ. 800 ކިލޯވޯޓުގެ އިންޖީނު އޯވަހޯލު ކުރުމުގެ މަސައްކަތްތައް ކުރަމުންދާތީ އެ އިންޖީނު މިވަގުތު ބޭނުމެއް ނުކުރެއެވެ.