ހުޅުމާލޭގައި ދަމާސްއިން އިމާރާތްކުރާ އެޕާޓްމެންޓްތައް ވިއްކަން ފަށައިފި

ހުޅުމާލޭގައި ދަމާސްއިން ހަދާ އެޕާޓުމެންޓު އިމާރާތްތައް ދުރާލާ ވިއްކަން ފަށައިފި އެވެ.

ދަމާސް ކުންފުނީގެ ސަބްސިޑަރީ، ދަމާސް ރިއަލް އެސްޓޭޓްގެ މާކެޓިން އެންޑް ސޭލްސް މެނޭޖާ ހަސަން އާތިރު އައްބާސް “ހަވީރަ”ށް މައުލޫމާތު ދެއްވަމުން ވިދާޅުވީ ފަސް ބުރީގެ އެ އިމާރާތުގައި 10 އެޕާޓުމެންޓު ހުންނާނެ ކަމަށެވެ.

“އައިލްސް ރެސިޑެންސް”ގެ ނަމުގައި އިމާރާތްކުރާ މި ކޮންޕްލެކްސްތަކުގެ ކޮންމެ ފުލޯއެއްގައި ދެ އެޕާޓުމެންޓު ހުރެ އެވެ. އެއީ ތިން ކޮޓަރި އެޓޭޗް ފާހާނާ އެކު ސިޓިން ރޫމެއް ހުންނަ އެޕާޓްމަންޓްތަކެއް ކަމަށާއި އެ އެޕާޓްމަންޓްތައް ވިއްކަނީ 1.6 މިލިއަން ރުފިޔާ އާއި 2.5 މިލިއަން ރުފިޔާއާ ދެމެދުގެ އަގެއްގައި ކަމަށް އޭނާ ވިދާޅުވި އެވެ.

އާތިރު ވިދާޅުވީ މި ފްލެޓްތަކަށް ގަނޑުކޮށް ފައިސާ ދެއްކުމުގެ ފުރުސަތު އޮވެފައި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީއެފްސީ)ގެ ލޯނެއްގައިވެސް އެފްލެޓުތައް ގަނެވޭނެ ކަމަށެވެ. އަދި އެ ލޯނުގެ ދަށުން އެޕާޓްމެންޓު ގަންނަން އަސްލު އަގުގެ 20 އިންސައްތަ ދައްކަން ޖެހޭނެ ކަމަށް ވެސް ދަމާސް އިން ބުނެފައި ވެއެވެ. ނަމަވެސް ފްލެޓުތައް ވިއްކުމުގައި އިސްކަން ދޭނީ ގަނޑުކޮށް ފައިސާ ދައްކާ ފަރާތްތަކަށް ކަމަށް އެފަރާތުން ބުންޏެވެ.

އެޕާޓްމެންޓު ގަތުމަށް މި މަހުގެ 22 ވަނަ ދުވަހުން ފެށިގެން އަންނަ 27 ވަނަ ދުވަހާ ހަމައަށް ފޯމު ދޫކުރާނެ އެވެ. އަދި އެޕާޓުމެންޓުތައް ހަވާލު ކުރާނީ މާޗް މަހުން ފެށިގެން ކަމަށާއި ތަނަކީ އެންމެ ލަގުޒަރީ ތަންތަން ނޫންކަމުގައިވިޔަސް ޖާގައިގެ ގޮތުން ތަނަވަސް ހިތްގައިމު އެޕާޓުމެންޓު ތަކަކަށް ވާނެ ކަމަށް އާތިރު ވިދާޅުވި އެވެ.

ގަންނަ ފަރާތްތަކަށް ފްލެޓްތައް ހަވާލު ކުރާނީ ރަޖިސްޓްރޭޝަނާ ހުރިހާ ކަމެއް ނިންމުމަށް ފަހުގައި ކަމަށާއި ފްލެޓުތަކަށް އެދި މިހާތަނަށް 100 އެއްހާ ފަރާތުން ނަން ނޯޓްކޮށްފައިވާ ކަމަށް އާތިރު ވިދާޅުވި އެވެ.