އޯޓިޒަމް އެވެއާރނެސް ޕްރޮޑަކްޓްސް ވިއްކަން ފަށަނީ

އޯޓިޒަމް އެވެއާނެސް ޕްރޮޖެކްޓުގެ ދަށުން ބާއްވާ ހަރަކާތްތަކުގެ ތެރޭގައި ހިމެނޭ އޯޓިޒަމް އެވެއާރނެސް ޕްރޮޑަކްޓްސްތައް މާދަމާ ވިއްކަން ފަށާނެ އެވެ.

އެގޮތުން ބެޖާއި، ޕިން، ކާޑް ޗެއިން، ތަޅުދަނޑި ފޫ، ތޮފި، އަދި އަތުގައި އަޅާ ބޭންޑު ފަދަ ތަކެތި ވިއްކުމަށް ހަމަޖެހިފައިވާ ކަމަށް އޯޓިޒަމް ހަރަކާތްތަކުގައި އިސްކޮށް އުޅުއްވާ ޓީއާރުސީގެ ކޯޑިނޭޓާރ އަބްދުއްރަޝީދު ސައީދު ވިދާޅުވި އެވެ.

ކޯޑިނޭޓާރ ވިދާޅުވީ ހދ. އަތޮޅު ތައުލީމީ މަރުކަޒުގެ ޓީއާރުސީގައި ގާއިމް ކުރެވިފައިވާ އޯޓިޒަމް އެވެއާނެސް ޓާސްކު ފޯސް އޮފީހުން މިތަކެތި ލިބެން ހުންނާނެ ކަމަށާއި ވީހާވެސް ގިނަ ފަރާތްތަކުން މިޕްރޮޑަކްޓްސްތައް ބައްލަވައި ގަތުމަށެވެ. ހެނދުނު 10:00 ފަށައިގެން 4:30 އަށް އަދި ރޭގަނޑު 8:30 ން 10:30 އަށް އެއޮފީހުން މިތަކެތި ލިބެން ހުންނާނެ އެވެ.

އޯޓިޒަމް ދުވަސް ފާހަގަ ކުރުމުގެ ގޮތުން ބާއްވާ “ލައިޓް އިޓް އަޕް ބްލޫ” ނުވަތަ ނޫކުލައިން ދިއްލާލުމުގެ ހަރަކާތުގައި ވީހާވެސް ގިނަ އިމާރާތްތަކެއް ނޫކުލައިން ދިއްލާފައި ބެހެއްޓުމަށާއި އޯޓިޒަމް ދުވަހު ވީހާވެސް ގިނަ ފަރާތްތަކުން ނޫކުލައިގެ ހެދުން ބޭނުން ކުރުމަށް އަބްދުއްރަޝީދު އިލްތިމާސް ކުރެއްވި އެވެ.

އޯޓިޒަމްއާ ބެހޭގޮތުން ހޭލުންތެރިކުރުމުގެ ޕްރޮގުރާމުގެ ދަށުން ގާއިމް ކުރެވިފައިވާ ފޭސްބުކް ޕޭޖަކާއި ހޮޓްލައިން ނަންބަރެއްވެސް މިހާރުވަނީ ތައާރަފް ކުރެވިފަ އެވެ. އޯޓިޒަމްއާ ބެހޭ އެއްވެސް މައުލޫމާތެއް ސާފުކޮށްލަން ބޭނުންވާނަމަ 7699587 މިނަންބަރަށް ގުޅާލުމުން އެމައުލޫމާތެއް ލިބެން ހުންނާނެ އެވެ.

އޯޓިޒަމް ދުވަހަކީ އޭޕްރީލް މަހުގެ ދެވަނަ ދުވަހެވެ.