އާރތް އަވާ ޕްރޮމޯޓުކުރުމަށް ކުޅުދުއްފުށީގައި ހިނގާލުމެއް ބާއްވައިފި

މިއަންނަ ހޮނިހިރު ދުވަހުގެ ރޭ ބޭއްވުމަށް ހަމަޖެހިފައިވާ އާރތް އަވާ ޕްރޮމޯޓު ކުރުމަށް އިއްޔެ ހަވީރު ކުޅުދުއްފުށީގައި ހިނގާލުމެއް ބާއްވައިފި އެވެ.

މިހިނގާލުން ފެށުނީ 4:30ގައި ޖަލާލުއްދީން ސްކޫލު ކުރިމަތިންނެވެ. ސަރުކާރުގެ މުއައްސަސާތަކުގެ މުވައްޒަފުންނާއި ސްކޫލުތަކުގެ ދަރިވަރުންގެ އިތުރުން ސްކައުޓުން އަދި ރަށުގެ ކުދި ބޮޑު ފަރާތްތަކުން ބައިވެރިވި މިހިނގާލުމުގައި ހޮނިހިރު ދުވަހުގެ ރޭ އާރތް އަވާގައި ބައިވެރިވެ އެއްގަޑިއިރުގެ ތެރޭގައި ވީހާވެސް ގިނަ ފަރާތްތަކަކުން ކަރަންޓު ބޭނުންކުރާވަރު މަދުކުރުމަށް އެދިފައިވެ އެވެ.

މީގެ އިތުރުން މިހިނގާލުމުގެ ބައިވެރިންވަނީ ކަރަންޓު ބޭނުންކުރުން މަދުކުރުމަށާއި ތިމާވެށި ހިމާޔަތް ކުރުމަށް ހޭލުންތެރި ކުރުމާއި ބެހޭ ޕޯސްޓަރުތައް ބޭނުން ކޮށްފަ އެވެ.

މިހަރަކާތުގައި ރާވާ ހިންގުމުގައި އާރތް އަވާރ ފައުންޑޭޝަންގެ ކުޅުދުއްފުށީ ގޮފީގެ ފަރާތްތަކުންނާއި އާރތް އަވާރ އިވެންޓުގެ ވޮލަންޓިއަރުންގެ އިތުރުން ފުލުހުން ވަނީ ސެކިއުރިޓީ ބެލެހެއްޓުމުގައި އެހީތެރިވެދެއްވާފަ އެވެ.

ރަށުގެ ބޮޑެތި މަގުތަކުގައި ހިނގާލުމަށްފަހު މިހަރަކާތް ނިންމާފައިވަނީ ހިނގާލުން ފެށި ހިސާބަށެވެ. އަދި މިހަރަކާތުގެ ބައިވެރިން ވަނީ ހިނގާލުން ނިންމުމަށްފަހު އެތަނުގައި އާރތް އަވާރގެ ލޯގޯ ކަމަށްވާ +60 އެޅޭ ގޮތަށް އެތުރިލާފަ އެވެ.

އާރތް އަވާރގެ ޕްރޮމޯޝަނަލް ހަރަކާތެއްގެ ގޮތުން މާދަމާ ހަވީރުވަނީ ޒޯން ސްޓޭޑިއަމްގައި އެކުވެރި ކަމުގެ ފުޓުބޯޅަ މެޗެއް ކުޅުމަށް ހަމަޖެހިފަ އެވެ. މިމެޗުގައި ވާދަ ކުރާނީ ކުޅުދުއްފުށިން ހޮވާލެވުުނު ކުރީގެ މަޝްހޫރު ކުޅުންތެރިންގެ ޓީމަކާއި ޒުވާން ޓީމެކެވެ.