ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހަކީ މުޅި އެ ނިޒާމު ފުނޑުފުނޑުކޮށްލުން ފަދަ ކަމެއް: ހދ އަތޮޅު ކައުންސިލް މެމްބަރ މުހައިމިން

އައު ކައުންސިލުތައް ފަށައިގަތުމާ ދިމާކޮށް ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހަކީ މުޅި އެ ނިޒާމު ފުނޑުފުނޑުކޮށްލުން ފަދަ ކަމެއް ކަމަށް ހދ. އަތޮޅު ކައުންސިލް މެމްބަރު އަބްދުލް މުހައިމިން ވިދާޅުވެއްޖެ އެވެ.

ޕީޕީއެމް ކޯލިޝަނުގެ އަޣުލަބިއްޔަތު އޮންނަ ހދ އަތޮޅު ކައުންސިލް މެމްބަރު އަދި އެ ކައުންސިލުގެ ތަރުޖަމާނު އަބްދުލް މުހައިމިނު ވިދާޅުވީ އައު ކައުންސިލުތައް ފެށިގެން ރައްޔިތުންގެ އިތުބާރު އެނިޒާމަށް ހޯދުމަށް މަސައްކަތްކޮށް އެނިޒާމު ހަރުދަނާކޮށް ރަނގަޅު ކުރަން ކަންތައްތަކެއް ކައުންސިލުތަކުން ފަށާފައިވާ މިދަނޑިވަޅުގައި، ކައުންސިލުތަކުގެ ބަހެއްނެތި ސަރުކާރުން ލާމަރުކަޒީ ގާނޫނަށް ހުށަހެޅި މިއިސްލާހަކީ ކައުންސިލުތަކުން ރައްޔިތުންނަށް ފޯރުކޮށްދޭ ހިދުމަތްތައް މަޑު ޖެހި ކައުންސިލުތަކުގެ ޝައުގުވެރިކަން ގެއްލިގެން ދާނެ ކަމެއް ކަމަށެވެ.

“އައު ކައުންސިލުތަކުގެ ފަށައިގަތުމާ ދިމާކޮށް ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހަކީ މުޅި ލާމަރުކަޒީ ނިޒާމު ފުނޑުފުނޑުކޮށްލުން ކަހަލަ ކަމެއް” އަދާލަތު ޕާޓީގެ ޓިކެޓެއްގައި ކައުންސިލަރުކަމަށް އިންތިހާބުވި މުހައިމިން ވިދާޅުވި އެވެ.

އޭނާ ވިދާޅުވީ މި އިސްލާހުގެ ސަބަބުން ރަށު ކައުންސިލުތަކުގެ “މޯޓިވޭޝަން” ގެއްލި ކައުންސިލުތައް “ޑީމޯޓިވޭޓް” ވެފައިވާ ކަމަށެވެ.

ލާމަރުކަޒީ ގާނޫނުގެ ބޮޑު ބަޔަކަށް ސަރުކާރުން އިސްލާހު ހުށަހަޅާފައިވާއިރު، އެ ގާނޫނުގެ 120 ވަނަ މާއްދާއަށް ހުށަހަޅާފައިވާ އިސްލާހުގައި ބުނެފައިވަނީ ކައުންސިލުގެ ރައީސް އާއި ނައިބު ރައީސްއަށް ލިބޭނީ މަހު މުސާރައެއް ކަމަށާއި ކައުންސިލުގެ އެހެން މެންބަރުންނަށް ލިބޭނީ އެ މެންބަރުން ހާޒިރުވާ ކައުންސިލްގެ ބައްދަލުވުންތަކަށް ދެވޭ އެލަވަންސެއް ކަމަށެވެ.

ސަރުކާރުން ހުށަހަޅާފައިވާ އިސްލާހުތަކުގައި ބުނެފައިވަނީ ކައުންސިލްގެ ރައީސް އާއި ނައިބު ރައީސް ފިޔަވައި އެހެން މެންބަރުންނަކީ ދުވަހުން ދުވަހަށް ކައުންސިލު ހިންގައި އަމަލީގޮތުން ބައިވެރިވާ ބައެއް ނޫންކަމަށެވެ.

އެގޮތުން އެ މެންބަރުންގެ މަސްއޫލިއްޔަތަކީ ކައުންސިލުގެ ޖަލްސާތަކަށް ހާޒިރުވެ ކައުންސިލުގެ ނިންމުންތައް ނިންމުމުގައި ބައިވެރިވުމާއެކު، ކައުންސިލުގެ މަގުސަދުތައް ހާސިލުކުރުމައްޓަކައި، ކައުންސިލުން ކަނޑައަޅާ ގޮތެއްގެ މަތިން އެހީތެރިވެދިނުން ކަމަށް ސަރުކާރުގެ ފަރާތުން މާވަށު ދާއިރާގެ މެންބަރު މަޖިލީހަށް ހުށަހަޅުއްވާފައިވާ ބިލުގައި ބުނެފައިވެ އެވެ.

މި އިސްލާހު ސަރުކާރުން ހުށަހަޅާފައިވާއިރު ސަރުކާރު ހިންގާ ކޯލިޝަނުން މަޖިލީހުގެ ސާފު އަޣުލަބިއްޔަތު ވަނީ ހޯދާފަ އެވެ. އެހެންކަމުން މިއިސްލާހު ފާސްވުމަކީ ދުރުގައިވާ ކަމެއް ނޫނެވެ.