ނޮޅިވަރަމަށް ދިމާވެފައިވާ ކަރަންޓު މައްސަލަ ހައްލުކުރުމަށް 180 ކިލޯ ވޯޓުގެ އިންޖީނެއް ގެންނަނީ!

ހދ. ނޮޅިވަރަމަށް ދިމާވެފައިވާ ކަރަންޓު ކެނޑުމުގެ މައްސަލަ ހައްލުކުރުމަށްޓަކައި 180 ކިލޯ ވޯޓުގެ އިންޖީނެއް ގެނައުމުގެ މަސައްކަތް ކުރައްމުން އަންނަ ކަމަށް ފެނަކަ ކޯޕަރޭޝަނުން ބުނެފި އެވެ.

ފެނަކަ ކޯޕަރޭޝަނުގެ ރީޖަނަލް މެނޭޖަރ މުހައްމަދު އާދަމް ވިދާޅުވީ ނޮޅިވަރަމަށް ދިމާވެފައިވާ ކަރަންޓު ކެނޑުމުގެ މައްސަލަ ހައްލުކުރުމަށްޓަކައި އެ ރަށަށް އިންޖީނެއް ގެނައުމުގެ މަސައްކަތް ކުރަމުންދާ ކަމަށާއި ކުރިއަށް އޮތް 3 ނުވަތަ 4 ދުވަސް ތެރޭގައި ނޮޅިވަރަމަށް ދިމާވެފައިވާ ކަރަންޓުގެ މައްސަލަ ހައްލުވެގެންދާނެ ކަމަށެވެ.

އޭނާ ވިދާޅުވީ އެރަށް ދިމާވެފައިވާ ކަރަންޓުގެ މައްސަލަ ހައްލުކުރުން ލަސްވެގެންދިޔައީ އެކަމަށް ގެންނަ އިންޖީނު ޓެސްޓް ކުރުމުގެ ކަންތައްތައް ކުރިއަށްދާތީ ކަމަށާއި މިއަދު ކުޅުދުއްފުށީ “ސިކަންދަރު” ބޯޓަށް އިންޖީނު އަރުވާފައިވާ ކަމަށް އާދަމް ވިދާޅިވި އެވެ.

” އާ އިންޖީނެއް ނޫން އެކަމަކު އޯވަ ހޯލު ކޮށްފައި ހުރި އިންޖީނެއް އެއީ. ލަސްވެގެން މިދިޔައީ އިންޖީނުގެ އެއްވެސް މައްސަލައެއް ހުރި ތޯ ބަލާފަ އެކަން ޔަގީން ކޮށްފަ ނޫނީ އެރަށަށް ނުގެންދަން ވެގެން. މިހާރު ވަނީ އިންޖީނު ޓެސްޓް ކޮށް ރަގަޅަ ހިނގާތޯ ބަލާފަ. އެކަމުގެ އެކްސްޕާޓުން ރަގަޅަށް ހިނގާ އިންޖީނެއް ކަމަށް ވިދާޅުވުމުން އަޅުގަނޑުމެން މިގެންދަނީ” ރީޖަނަލް މެނޭޖަރ ވިދާޅުވި އެވެ.

ނޮޅިވަރަމް ކައުންސިލުގެ ރައީސް މަރިޔަމް ހަބީބާ ވިދާޅުވީ ދޭތެރެދޭތެރެއިން ކަރަންޓު ކަނޑާތީ ގޭބިސީތަކުގައި ބޭނުންކުރާ އިލެކްޓޯނިކް ސާމާނުތަކަށް ބޮޑެތި ގެއްލުންތައް ވަމުން އަންނަ ކަމުގެ ޝަކުވާ ކައުންސިލަށް ލިބެމުންދާ ކަމަށެވެ.

މިދިޔަ މަހުގެ 25 ވަނަ ދުވަހު ނޮޅިވަރަމުގައި ކަރަންޓު ދެމުންދިޔަ 3 އިންޖީނުގެ ތެރެއިން 2 އިންޖީނަން ދިމާވި މައްސަލައަކާ ގުޅިގެން މިހާރު އެރަށަށް ކަރަންޓު ދެމުން އަންނަނީ 160 ވޯޓުގެ ޖަނަރޭޓަރަކުނެވެ.