އޯޓިޒަމް ހުންނަ ކުދިން ޅަފަތުގައި ދެނެގަތުމަށް އެހީތެރިވެދޭ ސެންޓަރެއް ކުޅުދުއްފުށީގައި ގާއިމު ކުރާނަން: އެޑިއުކޭޝަން މިނިސްޓްރީގެ ނައިބު

އޯޓިޒަމް ހުންނަ ކުދިން ޅަފަތުގައި ދެނެގަތުމަށް އެހީތެރިވޭ ސެންޓަރެއް ހދ ކުޅުދުއްފުށީގަ އާއި ފުވައްމުލަކުގައި ގާއިމް ކުރުމުގެ މަސައްކަތް ކުރައްވަމުންދާ ކަމަށް އެޑިއުކޭޝަން މިނިސްޓްރީގެ ނައިބު ޑރ. އަބުދުﷲ ނަޒީރު ވިދާޅުވެއްޖެ އެވެ.

ޑރ. ނަޒީރު މިހެން ވިދާޅުވީ މުޅި ދުނިޔޭގައި ވެސް މިއަދު ފާހަގަ ކުރާ އޯޓިޒަމް ހަރަކާތްތަކުގެ ތެރެއިން ރާއްޖޭގައި މި ފެސްޓިވަލް ފައްޓަވައި ދެއްވުމުގެ ގޮތުން މިއަދު ހަވީރު ހދ ކުޅުދުއްފުށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ޑރ. ނަޒީރު ވިދާޅުވީ ޅަފަތުގައި އޯޓިޒަމް ހުންނަ ކުދިން ދެނެގަތުމަށް އެހީތެރިވެދޭ ސެންޓަރުގެ ފުރަތަމަ ވޯކްޝޮޕް ކުޅުދުއްފުށީގައި ފެށިގެންދާނެ ކަމަށެވެ. އޭނާ ވިދާޅުވީ މިހާރުވެސް އޯޓިޒަމް ހުންނަ ކުދިންނަށް ކިޔަވައި ދިނުމަށްޓަކައި ސެން ކުލާސް ތަކެއް ރާއްޖޭގެ އެކި ކަންކޮޅު ތަކުގައި ގާއިމް ކުރެވިފައިވާ ކަމަށާއި އިތުރު 5 ސެން ކުލާސް މިއަހަރު ތެރޭގައި ގާއިމު ކުރައްވާނެ ކަމަށެވެ.

އެތައް ސަތޭކަ ބަޔަކު ބައިވެރިވި މި ރަސްމިއްޔާތުގައި ޑރ. ނަޒީމު ވިދާޅުވީ އޯޓިޒަމް ހުންނަ ކުދިންނަށް ވީވަރަކުން އެހީތެރިވެދީ ގައުމު ތަރައްގީ ކުރުމުގައި އެކުދިން ހިއްސާ އެއްވަރަކަށް ގެންދެވޭނެ ގޮތް ހައްދަވައި ދެއްވުމަށް ރައްޔިތުންގެ ކިބައިން އެދިވަޑައިގެންނެވި އެވެ.

މިފެސްޓިވަލް ފެށުމުގެ ގޮތުން ވައިގެ ތެރެއަށް ވަނީ ނޫކުލައިގެ ފުއްޕާހަން ތަކެއް ދޫކޮށްލާފަ އެވެ. ތަފާތު ކުޅިވަރު ސްޓޯލު ތަކާއި ރާއްޖޭގެ މަޝްހޫރު ލަވަ ކިޔުންތެރިޔާ މީރާގެ ހުށައެޅުންތައް ފެނިގެން ގޮސްފައިވެ އެވެ.