ދުނިޔޭގެ ޞިއްޙަތު ދުވަހާ ގުޅޭ: ކުދި ސޫފި، ޞިއްޙަތަށް ހުރި ބޮޑު ނުރައްކަލެއް

އާދަމް އިބްރާހީމް ދުރުމީ، ހދ.ކުޅުދުއްފުށި

ހާދަހާ ނުރައްކަލޭ ސޫފިތައް މި ކުދި އުޅޭ

ހާދަ ގެއްލުމެއް ދެޔޭ ސޫފިތައް މިތިބަ އުޅޭ

ނޭގެޔޭ މިވާގޮތެއް ސޫފި ގިނަވެދާ ގޮތެއް

އޭގެ އަޞްލަކަށް ވަނީ ގޭގަ ހުންނަ ” ޗަކަވަޅޭ ”

ފާޑު ފާޑު ނަންކިޔާ، ހާދަ އުނދަގުލެއް ކުރާ

ފާޑު ފާޑު ސޫފިތައް އަހަރެމެން ވަށާ އުޅޭ

މަދިރިއާއި ސެއްޅިއާ މެހި، ކުރަފި، އުކުނުތަކާ

ކުދި ވިޔަސް އެސޫފިތައް ޞިއްޙަތާ ވަރަށް ކުޅޭ

މަދިރި އޭގެ ޒާތުގައި ބަލިތަކެއް އުފުއްލަޔޭ

މަދިރި އެފަދަ ކަންކަމަށް ނޭގުނަސް ވަރަށް މޮޅޭ

މަދިރި އުފެދެމުންދަނީ ކީއްވެކަން މޮޅަށް އެނގޭ

މަދިރި ހާއްޔަކަށް ވަނީ ފެން އެހުންނަ ފުޅިދަޅޭ

ސެއްޅިދޭ ހަމަލަތަކުން ގައިކަހާފަ ހިރުވަޔޭ

ކެއްނުވާ ވަރަށް ކަހާ ގައިގެ ހަން އެކީ ނޮޅޭ

އުކުނު، ބޮލުގެ ލޭ ބޮއޭ، ނުކުޅަދާނަ ކުރުވައޭ

ނުކުރެވޭ އެހެން ކަމެއް ބޯކެހީމަ ހަން ފޮޅޭ

ކެހިދެމުން އުދުހި އުޅޭ އެންމެނަށް ތުރާ ކުރާ

މެހިތަކުން އެ ހަޑިވަނީ ކާން އެހުންނަ ބަތްކޮޅޭ

ސާފުކަން ނެތީމައޭ ސޫފިތައް މި ގިނަވަނީ

ސާފުކޮށް ހަދާށެ ވީ ގެދޮރުތައް މި ދިރިއުޅޭ

މީހުނަށް ނުވިސްނެޔޭ ނޭނގި ކަން ވެވޭގޮތެއް

މީހުނަށް ނުވެސް އެނގޭ ބަލިތަކަށް މިހުށައެޅޭ

އެންމެހާ ހަމަލަތަކުން ޞިއްޙަތަށް އަމާޒުވާ

ފެންނަނީ ފަހުން ތަނޭ ތިންކަފުން އެކީ އޮޅޭ