މަރުވެފައި އޮއްވާ ފެނުނު މުހައްމަދު ރަޝާދު ވަނީ މަސްތުވާތަކެތީގެ 2 ބާވަތަކަށް ޕޮޒިޓިވް ވެފައި: ޕޮލިސް

ހ. އަންނާރުމާގެއިން މިމަހު 1 ވަނަ ދުވަހު މަރުވެފައި އޮއްވާ ފެނުނު ހދ.ކުޅުދުއްފުށީ ،އާހަމަ، މުހައްމަދު ރަޝާދު (24 އަހަރު) މަސްތުވާތަކެތީގެ 2 ބާވަތަކަށް ޕޮޒިޓިވް ވެފައިވާ ކަމަށް ފުލުހުން ބުނެފި އެވެ.

ތަހުލީލުތަކުން ދައްކާގޮތުން މަސްތުވާތަކެތީގެ ދެ ބާވަތެއްކަމަށްވާ އޯޕިއަމް އާއި ބެންޒޮޑައިޒޮޕީންގެ ހައި ކޮންސެންޓްރޭޝަނެއް އެނާގެ ކުޑަކަމުދާތަކެތީގައި އެކުލެވިގެންވާ ކަމަށް ފުލުހުންގެ މީޑިއާ އިން މައުލޫމާތުދެ އެވެ.

މުހައްމަދު ރަޝާދު މަރުވެފައި އޮއްވާ ފެނުނީ ހިންމަފުށީގައި ހުންނަ ޑްރަގް ރިހެބިލިޓޭޝަން ސެންޓަރުން ފަރުވާ ފުރިހަމަ ކުރުމަށް ފަހު ގެއަށް ދޫކޮށްލިތާ 24 ގަޑި އިރުވެސް ނުވަނީސް އެވެ. މީނާއަކީ މަސްތުވާތަކެތި ބޭނުންކުރުމުގެ ކުށް ޝާބިތުވެގެން، ހަ އަހަރުގެ ޖަލު ހުކުމެއްކޮށްފައިވާ މީހެކެވެ. އޭނާ އަށް ރިހެބް ފުރުސަތުދީފައި ވަނީ މިދިޔަ އަހަރު ޑިސެމްބަރު މަހުގަ އެވެ.

މުހައްމަދު ރަޝާދަކީ އޭނާގެ އާއިލާގެ އެންމެ ދޮށީ މެމްބަރެވެ. މި މަހު 01 ވަނަ ދުވަހު މި މައްސަލަ ފުލުހުންނަށް ރިޕޯޓްކޮށްފައިވަނީ ޢާއިލާގެ ފަރާތުން އެ ދުވަހު ހެނދުނު 0915 ހާއިރުއެވެ..