ފުލުހުންގެ އަހަރީ ދުވަސް ފާހަގަކުރުމަށް ކުޅުދުއްފުށީގައި ރޭގަނޑުގެ ހާއްސަ ފަރިއްކޮޅެއް ބާއްވައިފި

ފުލުހުންގެ 81 ވަނަ އަހަރީ ދުވަސް ފާހަގަކުރުމުގެ ގޮތުން ކުޅުދުއްފުށީގައި ރޭގަނޑުގެ ހާއްސަ ފަރިއްކޮޅެއް ބާއްވައިފިއެވެ.

މިމަހުގެ 3 ވަނަ ދުވަހުގެ ރޭ ކުޅުދުއްފުށީގައި ޕޮލިސް ސްޓޭޝަނުގައި ބޭއްވި ރޭގަނޑުގެ ހާއްސަ ފަރިއްކޮޅުގައި ފާއިތުވި އަހަރު ކުޅުދުއްފުށީ ޕޮލިސް ސްޓޭޝަނަށް އެކިގޮތްގޮތުން އެހީތެރިކަން ފޯރުކޮށްދީފައިވާ މުއައްސަސާތަކަށާއި އަމިއްލަ ފަރުދުންނަށް އަގުވަޒަން ކުރުމުގެ ގޮތުން ހަނދާނީ ފިލައެއް ދީފައިވެއެވެ.

ފުލުހުންގެ މީޑިޔާއިން މައުލޫމާތު ދޭ ގޮތުގައި މި ހަފުލާގައި ކުޅުދުއްފުށީ ޕޮލިސް ސްޓޭޝަނުގައި މަސައްކަތްކުރާ އާއްމު މުވައްޒަފުން ކުރަމުންދާ މަސައްކަތުގެ އަގު ވަޒަންކުރުމުގެ ގޮތުން އެ ފަރާތްތަކަށް ވެސް ހަނދާނީ ލިޔުން ދީފައިވެއެވެ.

މީގެއިތުރުން ހދ. އަތޮޅުން 2014 ވަނަ އަހަރު ފުލުހުންގެ ހަށިހެޔޮކަން ބެލުމުގެ އިމްތިހާނުން ރަން މެޑަލް ހާސިލްކޮށް ސްޓޭޝަނަށް ރީތި ނަން ހޯދައިދިން 09 ފަރާތަކަށް ހަނދާނީލިޔުން ދީފައިވާއިރު 2013 ވަނަ އަހަރު ހުރިހާ ގޮތަކުން އެންމެ ރަގަޅު މުވައްޒަފަކަށް ހޮވުނު ޕޮލިސް ސާޖަންޓް ޢަބްދުލްއަނީ އިބްރާހިމް އަށް ހަނދާނީ ލިޔުމާއި ޓްރޮފީ ދީފައި ވެއެވެ.

ބޮޑު ބެރުގެ ހަރަކާތްތަކަކާއެކު ކުރިއަށްދިޔަ މި ފަރިއްކޮޅުގައި ހަނދާނީ ލިޔުން ބައްސަވާ ދެއްވީ ހދ. އަތޮޅު ކޮމާންޑަރ އަދި އަޕަރ ނޯތް ޕޮލިސް ޑިވިޜަން ހިންގުމާ ވަގުތީގޮތުން ހަވާލުވެހުރި ސަބް އިންސްޕެކްޓަރ އޮފް ޕޮލިސް އިބްރާހިމް މުޙައްމަދު އެވެ.

ފުލުހުންގެ 81 ވަނަ އަހަރީ ދުވަސް ފާހަގަކުރުމުގެ ގޮތުން ފުލުހުން ގާއިމުވެތިބޭ ގިނަ ރަށްރަށެއްގައި މިފަދަ ހަރަކާތްތައް އަންނަނީ ހިންގަމުންނެވެ.

ފުލުހުންގެ ހިދުމަތަށް 81 އަހަރު ފުރުނުއިރު ސިފައިންނާއި ފުލުހުން ވަކި ދެ މުއައްސަސާއެއްގެ ގޮތުގައި ހަމަޖެއްސެވީ 2004 ވަނަ އަހަރު އެވެ.