ފުޓްސަލް ދަނޑު އަޅަން ހަމަޖެހިފައިވާ ބިން ސާފުކޮށްފި

ކުޅުދުއްފުށީގައި ފުޓްސަލް ދަނޑު އަޅަން ހަމަޖެހިފައިވާ ބިން ސާފުކޮށްފި އެވެ.

ޔޫތުމިނިސްޓްރީގެ “ސްޕޯޓްސް އެރީނާ މަޝްރޫއު”ގެ ދަށުން ކުޅުދުއްފުށީގައި ގާއިމްކުރާ މިފުޓްސަލް ދަނޑު ހެދުމަށް ހަމަޖެހިފައިވާ ބިމުގައިވާ ރުއް ގަސް ނަގާ އެސަރަހައްދު ސާފުކޮށްފައިވަނީ މިމަހު ދިހައެއްގަ އެވެ.

އެމްއެންޑީއެފްއާ ހަވާލާދީ ކުޅުދުއްފުށީ ކައުންސިލު މެންބަރު އިބްރާހިމް އައްބާސް މިނޫހަށް މައުލޫމާތު ދެއްވަމުން ވިދާޅުވީ ދަނޑުހެދުމުގެ އަމަލީ މަސައްކަތް މިއަންނަ އަންގާރަ ދުވަހު ފެށޭނެ ކަމަށާއި ދަނޑު ހަދަން ފަށާތާ 90 ދުވަހުގެ ތެރޭގައި ދަނޑު އަޅާ އެއްކޮށް ނިންމާނެ ކަމަށެވެ. މި ފުޓްސަލް ދަނޑު އަޅަން ހަމަޖެހިފައިވަނީ ޒޯން ސްޓޭދިއަމްގެ ހުޅަނގު އުތުރު ކަނުގަ އެވެ.

“ޔުނިޓީ ތްރޫ ފުޓްސަލް” ޕްރޮގްރާމުގެ ދަށުން ޔޫތު މިނިސްޓްރީން ހަދާ ފުޓްސަލް ދަނޑުތައް ހަދަނީ އެމިނިސްޓްރީ އާއި ޑިފެންސް މިނިސްޓްރީ އަދި ސިފައިންގެ އިތުރުން އެސްޓީއޯ އަދި އެފްއޭއެމް ގުޅިގެންނެވެ.

ސްޕޯޓްސް އެރީނާގެ ޕްރޮޖެކްޓްގެ ދަށުން ރާއްޖޭގެ އެކި ކަންކޮޅުތަކުގައި 34 އެރީނާ މިއަހަރު ނިމުމުގެ ކުރިން ގާއިމް ކޮށްދެއްވާނޭ ކަމަށް ޔޫތު މިނިސްޓްރީން ވަނީ ވައުދު ވެފަ އެވެ.