އާދަޔާ ހިލާފު ބިހެއް ކަނޑުމަހެއްގެ ބަނޑުތެރެއިން ފެނިއްޖެ

ކުޅުދުއްފުށީ މަސް ދޯންޏަކުން މިއަދު މަހަށް ގޮސް ބޭނި މަހެއްގެ ބަނޑުތެރެއިން އާއްމުކޮށް ނުފެންނަ ވައްތަރެއްގެ ބިހެއް ފެނިއްޖެ އެވެ.

ކުޅުދުއްފުށީ ރަންދީ 2 ދޯނި މިއަދު މަހަށް ގޮސް ބޭނިމަސް، މިއަދު މެންދުރު ކުޅުދުއްފުށީގައި ވިއްކި އިރު، ކުޅުދުއްފުށީ ނޫރާނީވިލާ، މޫސާ މުޙައްމަދު (63 އަހަރު) މަސްގަނެގެނެގެން ގެޔަށް އައިސް މަސްކެނޑިއިރު، މަހުގެ ބަނޑުން އެހެންޏާ ނުފެންނަ ކަހަލަ ބިހެއް ފެނުމުން ހުރީ ވަރަށް ހައިރާންވެފަ އެވެ.

“ކޮންމެ ދުވަހަކުހެން މަސް ގަނެގެން މިހެން ބޭނުން ކުރާއިރު، ދުވަހަކުވެސް ނުދެކެން މިކަހަލަ ބިހެއް.” މޫސާ މިނޫހަށް ކިޔައިދިނެވެ.

އާއްމުކޮށް ކަނޑުމަހުގެ ބަނޑުގައި ހުންނަނީ ދޮންބިސް ނުވަތަ ކިރުބިސް ކަމުގައި ވިޔަސް، މިއަދު ފެނިފައިވާ ބިހަކީ ދޮންބިހަކާއި ކިރުބިހެއް މެދުން ގުޅިފައިވާ ބިހެކެވެ.

ބިސް ފެނިފައިވަނީ 3.5 ކިލޯ ހުރި ކަޅުބިލަމަހަކުންނެވެ.

ކުޅުދުއްފުށީ ރަންދީ 2 ދޯނިން މިއަދު ވަނީ 2 ޓަނު މަސް ބާނާފަ އެވެ. ކިލޯއެއް ވިއްކާފައިވަނީ 30 ރުފިޔާ އަށެވެ.