ހދ އަތޮޅު ގުރުއާން މުބާރާތުގެ އެއްވަނަ ވައިކަރަދޫ އަށް

ހދ. އަތޮޅު ކައުންސިލުން ބޭއްވި ގުރުއާން މުބާރާތުގެ އެއްވަނަ ވައިކަރަދޫ ހޯދައިފި އެވެ.

ހދ. އަތޮޅު ކައުންސިލުން އިންތިޒާމުކޮށްގެން މި މަހުގެ 17 އިން 19 އަށް ބޭއްވި އަތޮޅު ޤުރުއާން ކިޔެވުމުގެ މުބާރާތުގައި ބަލައިގެން އަދި ނުބަލާ ކިޔެވުމުގެ ގޮފިން ވެސް އެއްވަނަ ހޯދާފައިވަނީ ވައިކަރަދޫގައި ހުންނަ ހދ. އަތޮޅު މަދަރުސާ އެވެ.

11 ރަށެއްގެ 17 ސްކޫލަކުން އަދި އަމިއްލަ 2 ގުރުއާން ކުލާހަކުންވެސް ބައިވެރިވި މި މުބާރާތުން ދެވަނައަށް ގޮސްފައިވަނީ ހދ. މަކުނުދޫ އެވެ. އަދި ބަލައިގެން ކިޔެވުމުގެ ގޮފިން ދެވަނަ މަކުނުދޫ ހޯދާފައިވާއިރު މުޅި މުބާރާތުގެ ނުބަލާ ކިޔެވުމުގެ ގޮފިން ތިންވަނަ ވެސް ހޯދާފައިވަނީ މަކުނުދޫ އެވެ.

މުޅި މުބާރާތުން ތިންވަނައަށް ގޮސްފައިވާ ރަށަކީ ކުޅުދުއްފުއްޓެވެ. މީގެ އިތުރުން މުޅި މުބާރާތުގެ ނުބަލާ ކިޔެވުމުގެ ގޮފިން ދެވަނައަށް ގޮސްފައިވަނީވެސް ކުޅުދުއްފުއްޓެވެ. މުޅި މުބާރާތުން ބަލައިގެން ކިޔެވުމުގެ ގޮފިން ތިންވަނައަށް ގޮސްފައިވާ ރަށަކީ ހަނިމާދޫ އެވެ.

130 ދަރިވަރުން ވާދަކުރި މިމުބާރާތުގެ އެއްވަނައަށް 2 ދަރިވަރަކު ގޮސްފައިވެ އެވެ. އެއީ ވައިކަރަދޫ ގުރަހާތަރި އަހުމަދު އަރުޝަމާއި ކުމުންދޫ އެލްޕާސޯ ރާއިދާ މޫސާ އެވެ. މުޅި މުބާރާތުން ދެވަނަ އަދި ތިންވަނަ ލިބޭވަރަށް އެއްވެސް ދަރިވަރަކަށް މާކުސް ލިބިފައެއް ނުވެ އެވެ.

ނުބަލާ ކިޔެވުމުގެ ގޮފިން އެއްވަނަ ހޯދާފައިވަނީ ހދ. މަކުނުދޫ ރޯޝަނީއާގެ އައިޝަތު އީލާފް އަލީ ނަޝީދު އެވެ. ހަމަ މިގޮފިން ދެވަނައަށް ގޮސްފައިވަނީ ހަނިމާދޫ ޒަވާދަވިއު މަރިޔަމް ޝައުފާ އެވެ. އަދި ތިންވަނައަށް ގޮސްފައިވަނީ ވައިކަރަދޫ ފަލްކަމް ފައިހާ އަބްދުއްﷲ އަގީލެވެ. ބަލައިގެން ކިޔެވުމުގެ ގޮފިން އެއްވެސް ދަރިވަރަކަށް އެއްވަނަ ލިބޭވަރަކަށް މާކުސް ލިބިފައެއް ނުވެ އެވެ. ބަލައިގެން ކިޔެވުމުގެ ގޮފިން ދެވަނަ ހޯދާފައިވަނީ ވައިކަރަދޫ ރަންކޮކާގެ އުލާ އަބްދުއްﷲ ޖަލީލެވެ. އަދި މިގޮފިން ތިންވަނައަށް ގޮސްފައިވަނީވެސް ވައިކަރަދޫ ގިރިޓީގެ އަމާން ރަބީއު އެވެ.

މިމުބާރާތުގެ ހާއްސަ ވަނަތައް ހޯދާފައިވާ ދަރިވަރުންނަށް އިނާމާ ޓްރޮފީ ހަވާލުކޮށްދެއްވީ ޝަރަފުވެރި މެހެމާނު ގައުމީ ޔުނިވާސިޓީގެ ފެކަލްޓީ އޮފް އިސްލާމިކް ސްޓަޑީޒްގެ އަރަބިކް ލޭންގްއޭޖް ޑިޕާޓުމެންޓްގެ އެސޯސިއޭޓް ލެކްޗަރާ އައްޝައިހް އަލީ ރިޒާ އެވެ.

މިއަހަރު މާލޭގައި ބާއްވާ ގައުމީ ޤުރުއާން ކިޔެވުމުގެ މުބާރާތުގައި ހދ. އަތޮޅުން ތަމްސީލު ކުރާނެ 15 ދަރިވަރުންނަކީ

1. އަހުމަދު އަރުޝަމް، ގުރަހާތަރި / ހދ. އަތޮޅު މަދަރުސާ

2. ރާއިދާ މޫސާ، އެލްޕާސޯ / ކުމުންދޫ ސްކޫލް

3. އުލާ އަބްދުއްﷲ ޖަލީލް، ރަންކޮކާގެ / ހދ. އަތޮޅު މަދަރުސާ

4. އަމާން ރަބީއު، ގިރިޓީގެ / ހދ. އަތޮޅު މަދަރުސާ

5. ފާތިމަތު ރާޝިދާ، ކެޕްރިކޯން / ޖަލާލުއްދީން ސްކޫލް

6. ފާތިމަތު ޝިއުރާ، ކަނބުރު / ހދ. އަތޮޅު މަދަރުސާ

7. މަޒީނާ މުހައްމަދު، ލިލީގެ / ނޮޅިވަރަމް ސްކޫލް

8. އައިމިނަތު ރާޔާ، ނިރޮޅު / މަކުނުދޫ މަދަރުސާ

9. އައިޝަތު އީލާފް އަލީ ނަޝީދު، ރޯޝަނީއާގެ / މަކުނުދޫ މަދަރުސާ

10. މަރިޔަމް ޝައުފާ، ޒަވާދަވިއު / ހަނިމާދޫ ސްކޫލް

11. ފައިހާ އަބްދުއްﷲ އަގީލް، ފަލްކަމް / ހދ. އަތޮޅު މަދަރުސާ

12. ފާތިމަތު ނިހާލް މުހައްމަދު، ކަޝްމީރުވާދީ / ހދ. އަތޮޅު މަދަރުސާ

13. ފާތިމަތު ފައިހާ އަލީ، ގުލްހަޒާރުގެ / މަކުނުދޫ މަދަރުސާ

14. އަހުމަދު އަތޫފް މުހައްމަދު، ފަސްތަރި / ހދ. އަތޮޅު ތައުލީމީ މަރުކަޒު

15. މިޒުހާ ހުސެއިން ޖަލީލް، ނާރެސް / މަކުނުދޫ މަދަރުސާ

ރޭ ހދ. ނޭކުރެންދޫ ސްކޫލުގައި ބޭއްވި އިނާމު ދިނުމުގެ ރަސްމިއްޔާތުގައި ހދ. އަތޮޅު ކައުންސިލުގެ ރައީސް އާދަމް ނާސިރާއި އެކައުންސިލުގެ ނައިބު ރައީސް އަހުމަދު އާތިފްގެ އިތުރުން ނޭކުރެންދޫ ކައުންސިލުގެ މެންބަރުންގެ އިތުރުން ގިނަ އަދަދެއްގެ އާއްމުން ބައިވެރިވި އެވެ.