ކުޅުދުއްފުށީގައި އިމާރާތްކުރި ރޯ ހައުސްތަކަށް 628 ފަރާތަކުން ފޯމު ހުށަހަޅައިފި

ކުޅުދުއްފުށީގައި އިމާރާތް ކޮށްފައިވާ ރޯހައުސްތަކަށް އެދި ފޯމް ހުށަހެޅުމުގެ ފުރުސަތު މިދިޔަ ބުރާސްފަތި ދުވަހު ހަމަވެފައިވާއިރު އެ ކަމަށް އެދި 628 ފަރާތަކުން ފޯމު ހުށަހަޅައިފި އެވެ.

ކުޅުދުއްފުށީ ކައުންސިލު މެންބަރު ޝައުފާ ހިލްމީ މިނޫހަށް މައުލޫމާތު ދެއްވަމުން ވިދާޅުވީ ރޯހައުސަށް އެދުމުގެ ފުރުސަތު މިދިޔަ ބުރާސްފަތި ދުވަހަށް ހަމަވިއިރު 628 ފަރާތަކުން ފޯމް ހުށަހަޅާފައިވާއިރު އޭގެ ތެރޭގައި ރަށުން ބޭރު 168 ފަރާތަކާއި ރަށުގެ 460 ފަރާތެއް ހިމެނޭ ކަމަށެވެ.

ޝައުފާ އިތުރަށް ވިދާޅުވީ ގުރުއަތު ނަގަން ހަމަޖެހިފައިވާ ދުވަހެއް އަދި ކަނޑައަޅާފައި ނުވާ ކަމަށާއި އެކަމާ މެދު ހައުސިންގ މިނިސްޓްރީއާ ވާހަކަ ދައްކަވަމުން އަންނަ ކަމަށެވެ.

ކުޅުދުއްފުށީގައި އިމާރާތް ކޮށްފައިވާ 166 ރޯހައުސްގެ ތެރެއިން 2 ރޯހައުސެއްގައި ދިރިއުޅެމުންދަނީ ޅ. މާފިލާފުށިން ކުޅުދުއްފުއްޓަށް ދިރިއުޅުން ބަދަލު ކުރި ދެ އާއިލާ އެކެވެ.

ކުޅުދުއްފުށީގެ ރޯހައުސް ދޫކުރުމަށް ހަމަޖެހިފައިވަނީ ރަށު މީހުންނަން 60 އިންސައްތަ އަދި ރަށުން ބޭރު މީހުންނަން 40 އިންސައްތަ އެވެ. ޑަައުން ޕޭމެންޓުގެ ގޮތުގައި ރޯހައުސަށް ދައްކަންޖެހެނީ 19000ރ އެވެ. އަދި އިންސްޓޯލްމެންޓުގެ ގޮތުގައި މަހަކު ދައްކަން ޖެހެނީ 3000ރ އެވެ.