ކަނޑައެޅިފައިވާ ރޭޓަށްވުރެ އިތުރަށް މުއާސަލާތީ ހިދުމަތްތަކުން ޖީއެސްޓީ ނަގާނަމަ އެކަން އެންގުމަށް އިލްތިމާސްކޮށްފި

މުއާސަލާތީ ހިދުމަތްތަކުން ޖީއެސްޓީ ނަގަން ފެށުމާއެކު ބައެއް ފަރާތްތަކުން، ކަނޑައެޅިފައިވާ އަދަދަށް ވުރެ އިތުރަށް ޖީއެސްޓީ ނަގަމުން އަންނަކަމުގެ ޝަކުވާ އިތުރުވެފައިވާތީ، އެފަދަ ކަމެއް ހިނގާނަމަ އެކަން މޯލްޑިވްސް އިންލެންޑް ރެވެނިޔު އޮތޯރިޓީ (މީރާ) އަށް އެންގުމަށް މީރާއިން އިލްތިމާސްކޮށްފި އެވެ.

މީރާ އިން މިއަދު ނެރެފައިވާ ބަޔާނެއްގައި ބުނެފައި ގޮތުގައި، ޖީއެސްޓީ ރަޖިސްޓްރީ ކޮށްފައިވާ ފަރާތަކުން ފޯރުވައިދޭ މުއާސަލާތީ ހިދުމަތްތަކުން ކަނޑައެޅިފައިވާ ރޭޓަށްވުރެ އިތުރަށް ޖީއެސްޓީ ނެގުމަކީ ގާނޫނީ ކުށެއް ކަމަށެވެ.

މީރާއިން މައުލޫމާތު ދޭ ގޮތުގައި މުއާސަލާތީ ހިދުމަތްތަކުގައި އަގު ޖަހައިފައި ހުންނަންވާނީ ޖީއެސްޓީގެ އަދަދު ނުހިމަނައެވެ. އަދި އެކަން އަންގައިދޭ ނޯޓިސްއެއް ވިޔަފާރިކުރާ ތަނުގައި އާންމުންނަށް ފެންނަން ހުންނާނެހެން ބަހައްޓަންވާނެ ކަމަށް ވެސް މީރާއިން މައުލޫމާތު ދެއެވެ.

މުއާސަލާތީ ހިދުމަތްތަކުން 1 މެއި ގައި ޖީއެސްޓީ ނަގަން ފެށުމުން، ބައެއް ފަރާތްތަކުން ރީލޯޑް އަދި ރާސްޓަސް ހިދުމަތް ދޭއިރު، ކަނޑައެޅިފައި އޮންނަ ރޭޓަށް ވުރެ އިތުރަށް ލާރި ނަގާކަމަށް ހިދުމަތް ހޯދާ ފަރާތްތަކުން އަންނަނީ ބުނަމުންނެވެ.