ހަނިމާދޫ ޒުވާނުންގެ ޖަމިއްޔާއިން އެރަށު މަގު ބައްތިތައް ލެޑް ލައިޓަށް ބަދަލު ކުރަނީ

ހަނިމާދޫ ޒުވާނުންގެ ޖަމިއްޔާއިން އެރަށުގެ މަގު ބައްތިތައް ލެޑް ލައިޓަށާއި ސޯލާ ހަކަތައިން ދިއްލޭ ލައިޓަށް ބަދަލު ކުރުމުގެ ޕްރޮޖެކްޓެއް ފަށައިފި އެވެ.

ޔޫއެންޑީޕީގެ ޕްރޮޖެކްޓެއްގެ ދަށުން 7 ލައްކައަށް ވުރެ ބޮޑު މި ޕްރޮޖެކްޓާ ބެހޭގޮތުން ހަނިމާދޫ ޒުވާނުންގެ ޖަމިއްޔާގެ ރައީސް އިބްރާހިމް ހަލީލް ވިދާޅުވީ މި ޕްރޮޖެކްޓަކީ ޔޫއެންޑީޕީއިން ހުޅުވާލީ ފުރުސަތަކުން ބިޑް ކާމިޔާބު ކޮށްގެން އެ ޖަމިއްޔާއިން ހޯދި ޕުރޮޖެކްޓެއް ކަމަށެވެ.

މިޕުރޮޖެކްޓަކީ 49810 ޑޮލަރުގެ ޕްރޮޖެކްޓެކެވެ. އޭނާ ވިދާޅުވީ މިޕްރޮޖެކްޓް ނިމޭއިރު ހަނިމާދޫގައި މަގު ބައްތީގެ ގޮތުގައި ހުރި ޖުމްލަ 168 ބައްތީގެ ތެރެއިން 75 އިންސައިގެ ބައްތީގައި ލެޑް ހަރުކުރެވޭނެ ކަމަށާއި އަދި ބާކީ 25 އިންސަތަ ބައްތި ސޯލާއިން ދިންލޭނެގޮތް ހެދިގެންދާނެ ކަމަށެވެ.

އޭޕްރީލް ފަހު ހަފްތާގައި އަމަލީ މަސައްކަތް ފެށިފަވާއިރު މި މަހުގެ ނިޔަލަށް މިޕުރޮޖެކްޓް ނިންމާލެވޭ ވަރު ވާނެކަމަށް ހަލީލު ވިދާޅުވި އެވެ.

ލެޑްލައިޓް ހަރުކުރުމުގެ އަމަލީ މަސައްކަތުގައި އެ ޖަމްއިއްޔާގެ މެމްބަރުން ދައްކަވާ އާދަޔާ ހިލާފު ހިތްވަރު ފާހަގަ ކޮށް އެފަރާތްތަކަށް ޖަމިއްޔާގެ ރައީސް ޝުކުރުދަންނަވަ އެވެ. އަދި މި މަސައްކަތުގައި ހަނިމާދޫ ކައުންސިލާއި ޕަވާރ ސްޓޭޝަނުން ދެއްވާ އެއްބާރުލުމަށް ވެސް ހަލީލު ޝުކުރު ދެންނެވި އެވެ.

ހަނިމާދޫ ޒުވާނުންގެ ޖަމްއިއްޔާއަކީ ރަށުގެ ތަރައްގީ އަށް ގިނަ ހަރަކާތް ތަކެއް ހިންގާ ޖަމިއްޔާއެކެވެ.