ޖަލާލުއްދީން ސްކޫލަށް “ސްކޫލް ޕްރޮގްރެސް އެވޯޑް” ލިބިއްޖެ

މިދިޔަ އަހަރު ފަހުކޮޅުގައި ބޭއްވި އެސްއެސްސީ އަދި އޯލެވެލް އިމްތިހާނުގެ ނަތީޖާ ރަނގަޅުކޮށް ޖަލާލާލުއްދީން ސްކޫލް ކުރިއެރުން ހޯދުމާ ގުޅިގެން އެޑިޔުކޭޝަން މިނިސްޓްރީގެ ފަރާތުން ދޭ އެވޯޑް “ސްކޫލް ޕްރޮގްރެސް އެވޯޑް” ޖަލާލުއްދީން ސްކޫލަށް ލިބިއްޖެ އެވެ.

ސްކޫލް ޕްރޮގްރެސް އެވޯޑަކީ 10 ޕަސެންޓް ނޫނީ އެއަށްވުރެ މަތިން ކުރިއެރުން ހޯދާ ސްކޫލްތަކަށް ދެވޭ އެވޯޑެކެވެ. މި އެވޯޑްދިނީ ސާނަވީ ނިންމި ދަރިވަރުންނަށް ޓޮޕް އެޗީވަރޒް އެވޯޑް ދިނުމަށް ރޭ ދަރުބާރުގޭގައި ބޭއްވި ރަސްމިއްޔާތުގައެވެ.

މި ރަސްމިއްޔާތުގައި ޓޮޕް އެޗީވަރޒް އެވޯޑް ޖަލާލުއްދީން ސްކޫލްގެ 6 ދަރިވަރަކު ހާސިލްކޮށްފައިވެއެވެ. އެއީ ހުރީހާ މާއްދާއަކުން އޭ ފާސް ހޯދައިގެން އެއްވަނަ ހޯދި އަނާން ފަރީދާއި ދެވަނަ ހޯދި މުހައްމަދު އިބްރާހީމްގެ އިތުރުން ހަތަރުވަނައިގައި ހިމެނުނު ސިނާ ހަސަން އަދި ހަވަނައިގައި ހިމެނުނު އައިޝަތު ޖަޒީލާ ހުސައިން އާއި ސަނާ އިބްރާހީމެވެ. އަދި ނުވަ ވަނައިގައި ހިމެނުނު މުހަންމަދު އީމާން އާދަމް އެވެ.

ޖަލާލުއްދީން ސްކޫލުން ހާމަކުރިގޮތުގައި 2013 ވަނަ އަހަރަކީ، ތައުލީމީގޮތުންނާއި ކޯކަރިކިއުލަރ ހަރަކާތްތަކުންވެސް އެ ސްކޫލަށް ކާމިޔާބު އަހަރެކެވެ. މި ކާމިޔާބީގެ ފަހަތުގައިވަނީ ދަތިތަކާއެކުވެސް ޓީޗަރުން ކުރެއްވި ބުރަމަސައްކަތާއި ބެލެނިވެރިން ކުދިންގެ ކިޔެވުމަށް ދެއްވި ސަމާލުކަން ކަމުގައި އެ ސްކޫލުން މައުލޫމާތު ދެއެވެ.

މިދިޔަ އަހަރު ބޭއްވި އިމްތިހާނުން ގަދަ ދިހައެއްގައި ހިމެނުނު ދަރިވަރުންނަށް އިނާމު ދޭން ރޭ ބޭއްވި ޖަލްސާގައި ގަދަ ދިހައެއްގައި ހިމެނުނު 479 ދަރިވަރަކަށް އިނާމު ދީފައި ވެއެވެ. ކުޅުދުއްފުށީ ޖަލާލުއްދީން ސްކޫލުގެ އިތުރުން އަފީފުއްދީން ސްކޫލުގެ އެއް ދަރިވަރަކު ގަދަ ދިހައެއްގައި ހިމެނިފައި ވެއެވެ.