މެޓާނިޓީ ވެއިޓިން ހޯމްގެ ކޮންސްޓްރަކްޝަންގެ 99 އިންސައްތައިގެ މަސައްކަތް ނިންމާ، ހިޔާ ކުރުމުގެ މަސައްކަތް ފަށައިފި

މާބަނޑު މީހުން ބޭތިއްބުމަށް ހދ. ކުޅުދުއްފުށީގައި އިމާރާތް ކުރަމުންދާ މެޓާނިޓީ ވެއިޓިން ހޯމްގެ ކޮންސްޓްރަކްޝަންގެ 99 އިންސައްތައިގެ މަސައްކަތް ނިންމާ، ހިޔާކުރުމުގެ މަސައްކަތް ފަށައިފި އެވެ.

މިއިމާރާތުގެ ކޮންޓުރެކްޓަރ ޔޫމަން ކޮންސްޓުރަކުޝަންގެ ސައިޓް މެނޭޖަރ ހުސެއިން އަލީ މިނޫހާ ވާހަކަ ދައްކަވަމުން ވިދާޅުވީ އިމާރާތުގެ ކޮންސްޓްރަކްޝަނުގެ 99 އިންސައްތައިގެ މަސައްކަތް ނިމިފައިވާ ކަމަށާއި މިހާރު ކުރިއަށްދަނީ ހިޔާކުރުމުގެ މަސައްކަތްކަމަށެވެ.

އިމާރާތް ހިޔާކޮށް ދެތިން ދުވަހުގެ ތެރޭގައި ނިންމާލެވޭނެ ކަމަށް ހުސެއިން ވިދާޅުވި އެވެ. އަދި ސިމެންތި މަސައްކަތްތަކުގެ ތެރެއިން ނުނިމިވަނީ ހަމައެކަނި ސިމެންތި ޖެހުމާއި ތަޅުން އެޅުމުގެ މަސައްކަތް ކަމަށާއި ހިޔާކޮށް ނިމުމުން ލަކުޑީގެ މަސައްކަތްތައް ކުރިއަށްދާނެ ކަމަށް އޭނާ ވިދާޅުވި އެވެ.

އިންޑިޔާއިން ހިލަޔާއި ހިލަވެލި ލިބުން ދަތިވުމުގެ ސަބަބުން ގިނަދުވަސްތަކެއްގެ މެދުކެނޑުމަކަށްފަހު މިހާރު މެޓާނިޓީ ހޯމްގެ މަސައްކަތް ދަނީ ވަރަށް ބާރަށް ކުރެވެމުންނެވެ. އިމާރާތުގެ މަސައްކަތް ޖުލައި މަސްތެރޭގައި ނިންމާލުމަށް ކޮންޓުރެކްޓަރ އަމާޒު ހިފާފައިވާއިރު ތަކެތި ލިބުމުގެ އެއްވެސް ދަތިކަމެއް މިހާރު ނެތް ކަމަށް އެފަރާތުން ހާމަކުރެ އެވެ.

9.1 މިލިއަން ރުފިޔާ ހަރަދުކޮށްގެން އަޅާ މިއިމާރާތަކީ މާބަނޑުވުމާއި އަދި ވިހެއުމާގުޅިގެން އެފަދަ ފަރާތްތައް ކުޅުދުއްފުށީގައި މަޑުކޮށްލުމަށް ތައްޔާރުކުރެވޭ އިމާރާތެކެވެ. މި ވެއިޓިން ހޯމަކީ 2011 ވަނަ އަހަރު ބިންގާ އެޅި އިމާރާތެކެވެ. ދެ ބުރީގެ މިއިމާރާތުގައި 13 ކޮޓަރި އާއި ކެފޭއަކާއި ފެމެލީ ވެއިޓިން އޭރިއާއެއް ހިމެނެއެވެ.

[yass cats=74]