ޕްރީ ސްކޫލުތަކުގެ ގާނޫނަށް އިސްލާހު ހުށަހެޅުމަށް އަތޮޅު ކައުންސިލުން ފާސްކޮށްފި

ރައްޔިތުންގެ މަޖިލީހުގެ ހދ އަތޮޅުގެ އެކި ދާއިރާތަކަށް އިންތިހާބުވެފައިވާ މެންބަރުން މެދުވެރިކޮށް، ޕްރީ ސްކޫލުތަކުގެ ޤާނޫނަން އިސްލާހު ހުށަހެޅުމަށް ހދ އަތޮޅު ކައުންސިލުން މިއަދު ފާސްކޮށްފި އެވެ.

މިގޮތަށް ކައުންސިލުން ފާސްކޮށްފައިވަނީ ވައިކަރަދޫ ދާއިރާގެ މެންބަރު ޢަބްދުލް މުހައިމިން ހުށަހެޅުއްވި، ނާސަރީ އަދި ބޭބީ ނާސަރީ ޓީޗަރުންނަށް ސަރުކާރުން މުސާރަ ނުދޭތީ އެކަމާމެދު މަޝްވަރާކޮށް ގޮތެއް ނިންމުންމަށް މިއަދު މަކުނުދޫގައި ބޭއްވި އަތޮޅު ކައުންސިލުގެ ތާރީހީ ޖަލްސާ ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.

މައްސަލަ ހުށަހަޅުއްވަމުން މުހައިމިނު ވިދާޅުވީ ހދ އަތޮޅުގައި ހިންގަމުން އަންނަ ޕްރީ ސްކޫލުތަކުގައި އެކަށީގެންވާ ހިދުމަތް ނުލިބި ތަފާތު އެކި ދަތިތަކާ ދިމާވަމުން އަންނަކަމުގެ ޝަކުވާ ތަކުރާރުކޮށް ލިބެމުން އަންނާތީ އެކަމަށް ހައްލެއް ހޯދުމަށް އަތޮޅު ކައުންސިލުގައި މަޝްވަރާކޮށް ގޮތެއް ކަނޑައެޅުމަށެވެ. އަދި ހދ އަތޮޅުގައި މީހުން ދިރިއުޅޭ 13 ރަށެއްގައި 19 ޕްރީސްކޫލެއް ހިންގަމުން އަންނައިރު ސަރުކާރު ހަރަދުގައި 1091 ދަރިވަރުންނާއި 58 ޓީޗަރުން މަސައްކަތް ކުރައްވާއިރު، ސަރުކާރުން ހަރަދުނުކުރާ 900 އަށްވުރެ ގިނަ ދަރިވަރުންނާއި 70 އެއްހާ ޓީޗަރުން މަސައްކަތް ކުރާ ކަމަށް މުހައިމިން ވިދާޅުވި އެވެ.

އޭނާ ވިދާޅުވީ ގިނަ ޕްރީސްކޫލުތައް ހިންގަމުން އަންނަނީ ވަރަށް ދަތި ހާލުގައި ކަމަށާއި އެގޮތުން މާލީދަތިތައް އޭނާ ފާހަގަ ކުރެއްވި އެވެ.

ހދ އަތޮޅު ކައުންސިލުން ކުޅުދުއްފުށި ނޫން ރަށެއްގައި ބޭއްވި ފުރަތަމަ ޖަލްސާގައި ބައިވެރިވެވަޑައިނުގަންނަވަނީ ކުޅުދުއްފުށީ އުތުރު ދާއިރާގެ މެމްބަރު އަބުދުﷲ މުހައްމަދާއި ހަނިމާދޫ ދާއިރާގެ މެމްބަރު މުހައްމަދު ވަސީމެވެ.

ދިވެހި ރާއްޖޭގެ ޕްރީސްކޫލުތަކުގެ ޤާނޫނުގައި ބުނެފައިވަނީ ރާއްޖޭގެ ފަށާ ތައުލީމަކީ 4 އަހަރު ކަމަށެވެ. މިޤާނޫނުގައި ނަސަރީ އަދި ބޭބީ ނަސަރީގެ ދަރިވަރުންނެއް ނުހިމެނެ އެވެ.