ފިނި ތަރުހީބަކުން ފެއްޓި ޖަލްސާ ނިންމާލަންޖެހުނީ ހޫނުގަދަ ބަހުސްތަކަކަށްފަހު

ހދ އަތޮޅު ކައުންސިލުން އަތޮޅުގެ މީހުން ދިރިއުޅޭ ރަށްށަށް ކުރައްވަމުން ގެންދަވާ ދަތުރުތަކުގައި ރޭ މަކުނުދޫގައި ރައްޔިތުންނާ ބައްދަލުކުރަން ބޭއްވި ޖަލްސާ ފިނި ތަރުހީބަކުން ފެށުނު ނަމަވެސް ހޫނުގަދަ ބަހުސްތަކަކަށްފަހު ޖަލްސާ ދިގުލައިގެން ގޮސްފި އެވެ.

އަތޮޅު ކައުންސިލަރުން މަކުނުދޫ ރައްޔިތުންނާ ބައްދަލުކުރުމަށް ރޭ ބޭއްވި ޖަލްސާ އެ ރަށު ސްކޫލުގައި ފެށިގެން ދިޔައީ 20 ޒުވާނުންނާ އެކީގައި އެވެ. މިއީ ރައްޔިތުންނަން ގޮވާލުމުން އަތޮޅު ކައުންސިލުގެ ބައްދަލުވުމަކަށް މިހާތަނަން އެންމެ މަދު ރައްޔިތެއް ހާޒިރުވި ޖަލްސާ އެވެ. ކައުންސިލަރުންގެ ވާހަކަތަކަށް ފަހު އަތޮޅު ކައުންސިލާ ގުޅުންހުރި ސުވާލު ކުރެވުމަށް ހުޅުވާލުމުން ޒުވާނުގެ ފަރާތުން ކައުންސިލަށް އަމާޒު ކުރެއްވިގެންދިޔައީ ނިމިދިޔަ ރަށު ކައުންސިލުން ދޫކޮށްފައިވާ ގެވަޅުތަކަށް އެދިހުށަހެޅި 111 ފޯމް ރަށު ކައުންސިލުން ބާތިލުކޮށްފައިވާތީ، އެކަމުގެ ޝަކުވާ އެވެ.

އަތޮޅު ކައުންސިލަށް ޝަކުވާ އުފުލަމުން ޒުވާނުން ބުނެފައިވަނީ ނިމިދިޔަ ކައުންސިލުން ގެވަޅަށް އެދި ހުށަހެޅި ފޯމު ތަކުގެ ތެރެއިން 40 ވަރަކަށް ފޯމު ޝަރުތުހަމަނުވާތީ، އެފޯމުތައް ގެވަޅު ކޮމިޓީން ބާތިލުކުރުމުން، އެކޮމެޓީއަށް އެންގުމަކާ ނުލާ ބާކީ ހުރި ހުރިހާ ފޯމުތައް ކައުންސިލުގެ ބައްދަލުވުމަކުން ބާތިލުކޮށްފައިވަނީ ރައްޔިތުންގެ ހައްޤުތައް ގެއްލިގެންދާ ގޮތަށް ކަމަށެވެ. އަދި އެކަން އަތޮޅު ކައުންސިލުން އިންސާފުވެރިގޮތެއް ބަލާދިނުމަށް އެ ރަށުގެ ޒުވާނުން ވަނީ އެދިފައެވެ.

ގެވަޅު ކޮމެޓީ ބާތިލުކުރި ފޯމުތަކުގެ ތެރޭގައި ރަށު ކައުންސިލަރުން ގޯތިދޭން ބޭނުންވާ 2 މީހަކު ހިމެނޭތީ ސައްހަ ހުރިހާ ފޯމުތަކެއް ބާތިލުކޮށްލީ ކަމަށް ވެސް ޒުވާނު ބުނަމުންގެންދިޔަ އެވެ.

ރައްޔިތުންގެ ސުވާލުތަކަށް ޖަވާބުދެއްވަމުން ރަށު ކައުންސިލުގެ ރައީސް ވިދާޅުވީ އެއްވެސް ރައްޔިތެއްގެ ހައްގު ގެއްލިގެންދާ ފަދަ ގޮތަކަށް ކައުންސިލުން އަމަލުކޮށްފައި ނުވާނެ ކަމަށެވެ. އެހެންނަމަވެސް ރަށު ކައުންސިލުގެ ރައީސްގެ ވިދާޅުވަމުން ގެންދެއްވި ވާހަކަ އެތަނުގައި ތިބި ރައްޔިތުންނެއް ގަބޫލެއް ނުކުރި އެވެ.

އަތޮޅު ކައުންސިލުގެ ރައީސް އާދަމް ނާސިރު މިމައްސަލާގައި ވާހަކަ ދައްކަވަމުން ވިދާޅުވީ ގެވަޅު ދޫކުރުމުގެ މައްސަލައަކީ އަތޮޅު ކައުންސިލުގެ މެންޑޭޑުގައި ހިމެނޭ ކަމެއް ނޫން ކަމަށާއީ އެހެންނަމަވެސް ރަށު ކައުންސިލާ ވާހަކަ ދައްކައިގެން ގެވަޅު މައްސަލަ ހައްލުކުރައްވާނެ ކަމަށެވެ.

ރޭ 22:00 ވުމުން އަތޮޅު ކައުންސިލުގެ ރައީސް ޖަލްސާ ނިންމާލަން އިއުލާނުކުރުމުން ޒުވާނުން ޖަލްސާ ނިންމާލުމަށް ދެކޮޅު ހެދިއެވެ. އަދި އޭގެ ފަހުންވެސް ބައިގަޑިއެއްހާ އިރަށް ޖަލްސާ ދިގުދެމިގެން ދިޔަ އެވެ.

ދެފަރާތުގެ ދެމެދުގައި ވާހަކަ ދެކެވުމަށްފަހު އަތޮޅު ކައުންސިލުން ބުނީ ހަފުތާއެއްގެ ތެރޭގައި އެކަށީގެންވާ ޖަވާބެއް އެރަށުގެ ރައްޔިތުންނަށް ދެއްވާނެ ކަމަށާއި މަކުނުދޫ ގެވަޅު މައްސަލަ ހައްލުކުރެއްވުމަށް އަތޮޅު ކައުންސިލުން ކުރެވެންހުރި މަސައްކަތްތައް ކުރައްވާނެ ކަމަށެވެ.

[yass cats=78]