ތިމާވެށި ދުވަސް ފާހަގަކުރަން ޖަލާލުއްދީން ސްކޫލުން ގަސް އިންދުމުގެ ޕްރޮގްރާމެއް ހިންގަނީ

ތިމާވެށި ދުވަސް ފާހަގަ ކުރުމުގެ ގޮތުން ޖަލާލުއްދީން ސްކޫލުގެ އިކޯ ކްލަބުން އިސްނަގައިގެން ބަނދަރު މަތީގައި ގަސް އިންދުމުގެ ޕްރޮގްރާމެއް ހިންގުމަށް ހަމަޖެހިފައިވާ ކަމަށް އެ ސްކޫލުން ބުނެފި އެވެ.

ޖަލާލުއްދީން ސްކޫލާ އަލަށް ގުޅިވަޑައިގެންނެވި ޕްރިންސިޕަލް މަހުދީ ޝާހިދު މި ނޫހަށް މައުލޫމާތު ދެއްވަމުން ވިދާޅުވީ މިއީ ސްކޫލުގެ އަހަރީ ކަލަންޑަރުގައި ހިމެނިގެން ތިމާވެށި ދުވަހާ ގުޅުވައިގެން ޖޫން 4 ވަނަ ދުވަހު ކުރުމަށް ރޭވިފައިވާ ކަމެއް ކަމަށެވެ. އަދި މިޕްރޮގްރާމުގެ ސަބަބުން ބަނދަރު މައްޗާއި ބަނދަރާއި ގުޅިފައި އޮންނަ މަގުގައި ގަސް އިންދާ މުޖްތަމައަށް ފައިދާތަކެއް ލިބޭނެ ކަމަށެވެ.

ޕްރިންސިޕަލް ވިދާޅުވީ އިންދުމަށް 1200 އެއްހާ ފިތުރޯނު ގަސް ހުޅުމާލެއިން ގެނައުމަށް ހަމަޖެހިފައިވާ ކަމަށާއި އެގަސްތައް ލިބިފައިވަނީ އެޗްޑީސީގެ ހެޔޮއެދުންތަކާ އެކު ކަމަށެވެ. އެއީ ސްކޫލުގައި އުޅޭ 500 އެއްހާ ދަރިވަރުން، ކޮންމެ ދަރިވަރަކު ދެ ގަސް އިންދުމަށެވެ. ކޮންމެ ދަރިވަރަކަށް ގަހަކާއި އެކުއްޖެއްގެ އާއިލާއަށް ގަހެކެވެ.

ޕްރިންސިޕަލް ވިދާޅުވީ މިކަމާ ގުޅޭގޮތުން ރަށު ކައުންސިލާ މަޝްވަރާ ކުރެވިފައިވާނެ ކަމަށާއި ކައުންސިލުން މިޕްރޮގްރާމަށް އެއްބާރުލުން ދޭނެ ކަމުގެ ޔަގީންކަން ދީފައިވާ ކަމަށެވެ.

ގަސް އިންދުމުގެ ޕްރޮގުރާމުގައި ޖަލާލުއްދީން ސްކޫލުގެ ދަރިވަރުންގެ އިތުރުން މެނޭޖުމެންޓާއި ޓީޗަރުން އަދި ބެލެނިވެރިންވެސް ބައިވެރިވުމަށް ހަމަޖެހިފައިވެ އެވެ.

ބައިނަލްއަގުވާމީ ތިމާވެށީގެ ދުވަހަކީ ޖޫން މަހުގެ 5 ވަނަ ދުވަހެވެ.