ކުޅުދުއްފުށީ ހޮސްޕިޓަލުގައި މާބަނޑު އަންހެނަކު ވިއްސަންވެގެން ކަފާލިތަން ބޮޑުވެ ޑޮކްޓަރަށް ފަހަން ނުކެރިފައި!

ކުޅުދުއްފުށީ ރީޖަނަލް ހޮސްޕިޓަލަށް ދިޔަ މާބަނޑު އަންހެނަކު ވިއްސަން ޑޮކްޓަރުން ކަފާލިތަން “ކަފާލަންޖެހޭ” ވަރަށް ވުރެ ބޮޑުކޮށް ކަފާލެވިގެން ފަހަން ނުކެރި 20 ގަޑިއިރަށް ވުރެ ފަހުން މާލެ ފޮނުވާލަން ނިންމައިފި އެވެ.

ކުޅުދުއްފުށީ އޮންލައިނަށް އެނގިފައިވާ ގޮތުގައި ވިއްސަން ވެގެން ޑޮކްޓަރުންނަށް ކަފާލެވުނުލެއް ބޮޑުވުމުން އެތަން ފަހަން ޑޮކްޓަރަށް ނުކެރުނީ އެވެ. 28 އަަހަރުގެ މިއަންހެން މީހާ ވިހާފައިވަނީ އިއްޔެ އިރުއޮއްސި 6:30 އެހާއިރު އެވެ.

އާއިލާގެ ފަރާތުން މިނޫހަށް މައުލޫމާތު ދިން މީހަކު ބުނީ ވިއްސަން ވެއްދުމަށްފަހު، ކުއްޖާ ބޮޑުކަމަށް ބުނިކަމަށާއި އެހެންނަމަވެސް ސިޒޭރިއަން ނުހަދާ ކުއްޖާ ނެގޭނެކަމަށް ޑޮކްޓަރ ބުނިކަމަށެވެ. ކުއްޖާ ނުވިއްސޭ ވަރަށްވުރެ ބޮޑު ކަމަށްވަންޏާ ސިޒޭރިއަނަކަށް ދިއުމަށް އާއިލާގެ ފަރާތުން އެދުމުންވެސް ހުރިހާކަމެއް ގޯސްނުވެ ރަގަޅު ވާނެ ކަމަށް ޑޮކްޓަރ ބުނިކަމަށް އޭނާ މައުލޫމާތު ދިނެވެ.

ކަފާލިތަން ފަހަން ހޭނައްތަން ޖެހޭނެ ކަމަށާއި ހޭނައްތަން މާލެ ގެންދަން ޖެހޭނެ ކަމަށް ހޮސްޕިޓަލުން ބުނީ ރޭ 1:30 ހާއިރު ކަމަށާއި އަދި މާލެ ގެންދަން ޖެހޭނީ އަންހެން މީހާގެ ސިއްހީ ހާލަތު ހުރި ގޮތުން ކުޅުދުއްފުށި ރީޖަނަލް ހޮސްޕިޓަލްގައި އެކަން ކުރެވެން ނެތުމުން ކަމަށް އާއިލާއިން ބުނެ އެވެ.

އެތެރެހަށީގެ ޑޮކްޓަރެއް ނެތުމުން ހަދަން ޖެހޭ ބައެއް ޓެސްޓުތައް ނުހެދޭނެކަމަށް ޑޮކްޓަރ ބުނެފައިވާ ކަމަށް އޭނާ މައުލޫމާތުދިނެވެ. ނޭކުރެންދޫއަށް ނިސްބަތްވާ މިއަންހެން މީހާ މިހާރުވެސް އޮތީ އައިސީޔޫގަ އެވެ. މިމީހާ މާލެ ފޮނުވާލުމުގެ މަސައްކަތް މިހާރު ދަނީ ކުރަމުންނެވެ.