ރެޑްކްރެސެންޓްގެ ފަރާތުން ފަސްޓްއެއިޑް ޓްރޭނިން ޕްރޮގްރާމެއް ކުޅުދުއްފުށީގައި ފަށައިފި

ރެޑް ކްރެސެންޓްގެ ފަރާތުން ސްޓޭންޑާރޑް ފަސްޓްއެއިޑް ޓްރެއިނިން ޕްރޮގްރާމެއް ފަށައިގެން ކުރިޔަށް އެބަގެންދެ އެވެ.

މި ނޫހަށް މައުލޫމާތު ދެމުން ރެޑް ކުރެސެންޓް ކުޅުދުއްފުށީ ގޮފިން ބުނީ އާންމުންނަށް ހުޅުވާލައިގެން ކުރިއަށް ގެންދާ މި ޕްރޮގްރާމް ބާއްވަން ހަމަޖެހިފައިވަނީ 3 ދުވަހުގެ މުއްދަތަށް ކަމަށެވެ. މިއަދުގެ އިތުރުން މި ޕްރޮގްރާމް ބާއްވާނީ ހޮނިހިރު ދުވަހާއި އަންނަ ހަފުތާގެ އާދިއްތަ ދުވަހު އެވެ.

ރެޑް ކްރެސެންޓުގެ ފަރާތުން ކުރިއަށް ގެންދާ މި ޓްރޭނިން ޕްރޮގްރާމުގައި 25 ފަރާތަކުން ބައިވެރިވެފައިވާއިރު މި ޓްރޭނިން ޕްރޮގްރާމުގައި ކިޔަވައިދެއްވަނީ ރެޑް ކްރެސެންޓްގެ ހެލްތް ޕްރޮގުރާމް އޮފިސަރ ފާތިމަތު ހިމްޔާ އެވެ.

މިމަހު 2 އިން 4 އަށް ފުލުހުންނަށް އަމާޒުކޮށްގެންވެސް ވަނީ މިފަދަ ޓްރޭނިން ޕްރޮގުރާމެއް ހިންގާފަ އެވެ.

މި ޕްރޮގްރާމުގައި ފަސްޓް އެއިޑަކީ ކޮބައިކަމާއި އެމަޖެންސީ ހާލަތްތަކުގައި ކަންތައްތައް ކުރާނެ ގޮތާއި ބެހޭގޮތުންނާއި ލޭ މަނާ ކުރާނެ ގޮތްތަކާއި ސީ.ޕީ.އާރު ދޭނެ ގޮތުގެ އިތުރުން ފަސްޓް އެއިޑާ ގުޅުންހުރި ގިނަ ބައިތައް ކިޔަވައިދިނުމަށް ވަނީ ހަމަޖެހިފަ އެވެ.